Hatutan.com, (19 Janeiru 2023), Díli—Ministériu Públiku (MP) liu Prokuradór titulár hasai despaixu ba iha Banku Sentrál Timor-Leste (BCTL, sigla portugés) hodi husu atu fó fila osan $130.000 ne’ebé antes ne’e parte seguransa hamutuk ho Servisu Nasionál Intelijénsia no Alfândega halo apreensaun iha aeroportu internasionál Nicolau Lobato, tanba la prienxe rekizitu sira ba krime brankamentu kapitál.

Advogadu Privadu Partidu KHUNTO, Ismael Assunção Lopes Hala’o Konferénsia Imprensa iha otél Timor, Kona-bá polémika Osan $130.000 ne’ebé antes ne’e autoridade seguransa preened iha Aeroportu Comoro, Kinta (19/01/2023).

Advogadu Privadu Partidu KHUNTO, Ismael Assunção Lopes rekoñese katak, públiku akompaña no sente xokadu ho osan $130.000 ne’ebé militante ida ka suspeitu ida ne’ebé lori atu ba kompra atributu partidu nian nu’udár preparasaun ba eleisaun Parlamentár 2023 nian.

Lee Mós: Vídeo Viral, Dezentendimentu SNI ho Dirijente KHUNTO Kona-bá Osan $130.000

Osan ne’ebé atu lori sai ne’e partidu halo pedidu ba iha Banku Sentrál maibé osan ne’e ba to’o iha aeroportu hetan apreensaun hosi SNI no Alfândega, katak osan ne’e labele liu no sai husi territóriu nasionál tanba montante bo’ot no deskonfia krime ida naran brankamentu kapitál ne’ebé mak konsta iha kódigu penál artigu 213 no Lei própriu brankamentu kapitál númeru 11/2017.

Situasaun ida-ne’e fó interpretasaun tuir ema hotu nia hakarak no dalabarak la tuir buat ne’ebé iha, maibé auxília Ministériu Públiku nia kompeténsia tuir hela kódigu prosesu penál ne’ebé konsta iha artigu 49 ne’ebé dehan katak, Ministériu Públiku mak iha lejitimidade atu akuza no mós halo inskrisaun hanesan na’in ba krime.

Iha Ministériu Públiku nian ne’eba kumpri duni, auxiliár ba Ministériu Públiku PSIK atua ba Ministériu Públiku hodi rona mós suspeitu ida ne’ebé altura ne’eba lori osan, suspeitu MB no rona mós osan na’in ne’ebé altura ne’eba Ministériu Públiku konstitui hanesan sasin.

Tuir kádigu penál artigu 12 hateten katak, responsabilidade kriminál kabe ba ema ida ne’ebé lori tanba ne’e mak Ministériu Públiku suspeita ba sasin hodi rona.

“Hafoin rona tiha sasin sira, Ministériu Públiku haree katak evidénsia ida ba iha krime brankamentu kapitál ne’e la prienxe, iha artigu 313 kódigu prosesu penál dehan katak baibhira iha krime brankamentu kapital bainhira ajente ne’ebé lori osan ne’e antes ne’e iha ona krime ruma ne’ebé julgadu ona iha Tribunál, hanesan burla agravadu, korrupsaun, venda de pessoa no krime seluk tán ne’ebé kuandu tranzit julgada ona iha Tribunál tinan haat maka karakteriza ba krime ida brankamentu kapitál,” advogadu Privadu Partidu KHUNTO Ismael Assunção Lopes hateten iha otél Timor, Kinta (19/01/2023).

Ministériu Públiku intende katak, la prienxe krime brankamentu kapitál, nune’e horisehik iha parte lorokraik notifika advogadu hanesan reprezentante ba arguidu no osan na’in hodi ba imediata iha banku sentrál tanba Ministériu Públiku koordena autus ba iha Banku Sentrál atu devolve osan tanba la prienxe krime brankamentu kapitál no arguidu sira viola de’it regra administrativa hosi Lei númeru 11/2007 kona-bá importasaun no esportasaun.

“Horisehik Autoridade banku sentral devolve fila fali osan $130,000 no parte osan na’in selu koima ho montante 5.000 tanba viola regra administrativa hanesan Lei númeru 11/2007 hateten,” nia haktuir.

Tuir Ministériu Públiku nia haree laiha tán faktus sufisenste ruma atu assegura tán osan ne’e. Tanba ne’e mak Ministériu Públiku liu hosi Prokuradór Titulár hatun despaixu ba BCTL hodi autoriza devolve osan ne’e ba nia na’in.

Jornalista: Vito Salvadór