Hatutan.com, (19 Janeiru 2023), Díli—Prezidente Repúblika (PR), José Ramos-Horta preokupa ho direitu feto no labarik ne’ebé kontinua la hetan atensaun iha mundu, liu-liu direitu ba saúde no ai-han.

Prezidente Repúblika (PR), José Ramos-Horta preokupa ho direitu feto no labarik ne’ebé kontinua la hetan atensaun iha mundu, liu-liu direitu ba saúde no ai-han. Preokupasaun ne’e Xefe Estadu espressa durante selebrasaun Loron Deklarasaun Universal Direitus Humanus (DUDH) ba dala 75 ne’ebé hala’o iha Sidade Davis, Suíça, Kuarta (18/01/2023). Foto/Média PR.

Preokupasaun ne’e Xefe Estadu espressa durante selebrasaun Loron Deklarasaun Universal Direitus Humanus (DUDH) ba dala 75 ne’ebé hala’o iha Sidade Davis, Suíça, Kuarta (18/01/2023).

Lee Mós: Ramos-Horta ho Primeiru-Ministru Kosovo Diskute Kooperasaun Iha Futuru

“Maske ohin loron, atensaun ba Direitus Umanus aumenta, iha feto no labarik feto barak mak ninia direitu sei nega nafatin, hanesan direitu ba saúde no ai-han, ba ema barak sei la iha. Direitus Umanus tun tanba nasaun riku sira ne’ebé deside destinu hosi nasaun ki’ak sira, la iha meius atu rezolve situasaun ida-ne’e,” Hatutan.com sita komunikadu.

Xefe Estadu dehan, tenki hadi’a medida ekonómika hodi tulun nasaun ki’ak sira ne’ebé afetadu mós husi COVID-19, hodi bele rezolve problema sub-nutrisaun, saúde materna no garante direitu labarik sira-nian.

“Laiha medida konkreta hosi komunidade internasionál hodi rekupera ekonomia hosi nasaun ki’ak sira no rezolve eskravatura labarik. Iha Jullu tinan 2022, ha’u hamutuk ho sira seluk husu ba grupu G20 atu fó perdaun ba tusan hosi nasaun ki’ak sira,” Ramos-Horta fundamenta.

Nasaun ki’ak sira hasoru ameasa hosi tusan externa, hanesan situasaun ne’ebé Srilanka hasoru ho tusan bo’ot hosi Xína, nune’e garantia ba direitu labarik, saúde materna, nutrisaun no asesu ba alimentasaun hetan redusaun. Situasaun hanesan, akontese mós iha Afganistaun no nasaun seluk tán.

Relasiona ho situasaun iha Myanmar, Xefe Estadu hateten, kualidade demokrasia tun, tanba iha sidadaun koletivu Myanmar balun de’it mak luta ba Direitus Umanus.

Xefe Estadu mós ko’alia kona-bá servisu ONU nian, iha ne’ebé halo aproximasaun maka’as hamutuk ho sosiedade sivil, hodi halo protesaun ba direitus ba povu minoritáriu sira, maske esforsu iha tinan ikus ne’e ladun makas.

“Bainhira Antigu Administradór Tranzitória ONU nian iha Timor  Sérgio Vieira de Melo sei hanesan Altu Komissáriu ba Direitus Umanus, ha’u hato’o ba nia atu ko’alia kona-bá violasaun direitus umanus, maske dala ruma ema ida de’it mak mate, ita ba ko’alia ho Amerika no Inglaterra  atu ajuda, maibé, iha mós rejime balun uza sala kestaun direitus umanus,” informa.

Prezidente Repúblika, José Ramos-Horta bá Suíça hodi partisipa iha reuniaun anuál Forúm Ekonómiku Mundiál iha Davos, liu husi konvite Fundadór no Prezidente Ezekutivo Forum ida ne’e, Professor Klaus Schwab.

Jornalista: Vito Salvadór