Hatutan.com, (20 Janeiru 2023), Díli—Komisaun B iha Parlamentu Nasionál (PN) preokupa no kestiona makas ho serbisu sira autoridade polisiál nian, liu-liu kapasidade ekipa intelijénsia ne’ebé to’o oras ne’e seidauk deskobre paradeiru autór prinsipál bá kazu omesídiu iha área Delta-Elemloi.

Prezidente Komisaun B Parlamentu Nasionál, José Agostinho Sequeira “Somotxo”. Foto/Elio dos Santos da Costa.

Kazu omesídiu iha área Delta-Elemloi ne’e akontese iha Sesta (06/01/2023), mosu grupu deskoñesidu ne’ebé mak ho kro’at sona vítima Isaac Hornai Baptista iha hirus-matan ho kotuk-laran, rezulta kanek grave to’o mate fatin.

Lee Mós: Kazu Omesídiu Elemloi, PNTL Bolu no Halo Ona Identifikasaun bá Sidadaun 23

Iha Kinta (20/01/2023) Komisaun B organiza audiénsia ho Policia Ciêntífica e de Investigação Criminal (PCIC) ho Servisu Nasionál bá Intelijénsia (SNI), ko’alia kona-bá oinsá autoridade polisiál sira bele serbisu hamutuk, tanba to’o oras-ne’e autór prinsipál sei fujitivu (buronan) polisia.

“Audiénsia kona-bá omesidiu sira ne’ebé mosu iha ita nia rain hanesan iha Elemloi no ponte BJ Habibie. Objetivu ida ne’e mak halo ami bolu sira tanba autór sira bá omesidiu ne’e to’o ohin loron la kaptura,” José Agostinho Sequeira “Somotxo” hateten iha PN, Kinta (23/01/2023).

Somotoxo observa katak, durante ne’e PCIC ho Servisu Investigação Criminal (SIC), Polisia Nasionál Timor-Leste (PNTL), ‘ladun serbisu hamutuk’. Tánba ne’e mak Komisaun esforsu halo Lei da Organização Investigação Criminal (LOIC) hodi fahe tipulojia de krime.

“Ida ne’e, krime ida ne’ebé mak bá PCIC, no ida ne’ebé mak bá SIC, ne’ebé baibain bolu dehan PNSIK. Mais ida ne’e la eziste ona no muda ona bá SIC. Ida-idak hanesan rai informasaun ka informasaun ne’e tenke fahe bá órgaun polisia de investigasaun kriminal kompetente atu hala’o,” Somotxo hateten.

Kazu omesidiu sona matebian Isaac Hornai Baptisa iha área Delta-Elemloi ne’e mosu iha Sesta (06/01/2023), tuku 02:00, madrugada Otl, iha Aldeia São José Ai-meti Laran, Suku Comoro, Postu Administrativu Dom Aleixo, Munisipiu Dili.

Jornalista: Rogério Pereira Cárceres