Hatutan.com, (23 Janeiru 2023), Díli—Polísia Nasionál Timor-Leste (PNTL), Komandu Munisipiu Dili, liuhosi Seksaun Tránzitu, rejísta joven barak ne’ebé ho idade produtivu mak involve iha asidente tráfegu.

Sinais tránzitu iha Kruzamentu Kolmera Dili.

Komandante Polisia Tránzitu Munisipiu Dili, Inspetór Polisia Domingos Sarmento informa, iha inisiu 2023 sura hosi 01 to’o 20 Janeiru rejísta kazu asidente tráfegu 42, iha kapitál Dili maski la rejista asidente fatál ka ema mate.

Lee Mós: 2022, Ema Na’in-105 Lakon Vida Tanba Asidente

“Asidente sira ne’e mosu kauza hosi motorista sira rasik kondús hela sira nia transporte, maibé la kontrola aan no balun mós konsumu alkólikas. Sira ne’ebé involve iha asidente sira ne’e, maiória joven sira ho idade produtivu hosi 30 anus bá kraik,” Komandante Domingos Sarmento Gama, hateten iha kna’ar fatin Komandu Caicoli, Segunda (23/01/2023).

Advertisement

Tuir Lei kódigu estrada, sidadaun sé de’it mak kondús ninia transporte hanesan motór ka karreta iha sidade laran, tenke halai ho velosidade ne’ebé mínimu, kilometrájen 40.

Maibé, dala-ruma joven sira ne’e halai liu tiha fali ida ne’e. Ida ne’e mak PNTL konsidera katak, falta kontrolu hosi motorista sira.

“Tanba ne’e ita husu nafatin bá sidadaun sira, liu-liu joven sira, favór ida, kumpri regra tuir Lei, katak, halai iha kapitál ne’e tenke ho de’it 40 kilometrájen, labele liu ida ne’e,” komandante Domingos Gama, fó hanoin.

Hosi totál kazu asidente tráfegu 32 ne’ebé polisia rejísta, iha kazu balun oras ne’e enkamiña ona bá Ministériu Públiku hodi prosesa tuir Lei.

Maibé, kazu balun parte rua ne’ebé mak involve iha asidente, sira deside rezolve tuir familia. Katak, ida prontu atu responsábiliza liuhosi ka hadi’a fila-fali ida seluk ne’ebé ninia motór ka karreta ne’ebé hetan xoke no aat.

Advertisement

Jornalista: Rogério Pereira Cárceres