Hatutan.com, (24 Janeiru 2023), Díli—Polísia Nasionál Timor Leste (PNTL) liu hosi Komandu Munisípiu Díli, rekoñese konfrontu iha área Mascarenhas, Segunda (23/01/2023) maizumenus tuku 18:26 lorokraik otl involve hosi membru arte marsiál PSHT ho arte rituál 77 ho evidénsia motór tolu mak hetan estragus.

Konfrontu iha área Mascarenhas, Segunda (23/01/2023) maizumenus tuku 18:26 lorokraik estraga evidénsia motór tolu. Foto/repro facebook.

Kazu insidente ne’e mosu bainhira membru arte rituál Sete-Sete fila hosi semiteiru públiku Becusse no to’o iha área Maskareñas hetan tuda ho fatuk hosi sidadaun joven balun mai hosi organizasaun arte marsiál PSHT.

Lee Mós:Vítima Ne’ebé Hetan Sona iha Área Ponte Habibie Seidauk Fó Informasaun bá Polísia

“Loos duni komandu hatene no ema barak akompaña, konfrontu entre organizasaun arte marsiais ho rituál iha área Mascarenhas ninian, hafoin grupu Sete-Sete (77) lori ninia maluk bá hakoi, depois fila mak mosu akontesimentu ida-ne’e,” Komandante PNTL Munisípiu Díli, Superintendente Xefe Polísia, Natércia Eufrasia Martins Soares hateten Centro de Formação e Academia Polisia, iha Comoro, Tersa (24/01/2023).

Iha altura ne’ebá, polisia halo intervensaun maibé, akontese ona rezulta mós estragus balun maibé laiha autór ida ne’ebé mak polisa kaptura, tanba autór sira ne’e depois de halo agresaun, sira mós husik hela fatin ho laís.

“Hafoin konfrontu ne’e, iha kalan ne’e kedan, vítima sira balun bá ona iha komandu polísia hato’o ona informasaun balun, no mós autór balun ne’ebé sira koñese, ida-ne’e tama ona iha prosesu. Ohin, PNTL liuhosi eskuadra Verra Cruz, parte investigasaun halo ona, serbisu bá ida ne’e,” Superintendente Xefe Polísia, Natércia Eufrasia Martins Soares esplika.

Komandu kontinua halo identifikasaun liuhosi vitima no testamuña sira ne’ebé mak aprezenta an, sei komunika bá Ministériu Públiku, oinsá bele hetan mandadu de detensaun, nune’e polísia buka autór sira ne’ebé mak konsege halai liu hosi polisia nia operasaun.

Evidénsia sira ne’ebé hetan estragus mak hanesan motorizadas nomós armas brankas ne’ebé mak sira uza atu halo sira ninia asaun krime ne’e rekolla ona hosi ninia eskuadra hodi submete bá iha prosesu.

Provizoriamente komandu simu informasaun, iha motorizada tolu mak estragus no sira halo apreensaun bá motorizada ida.

Oras-ne’e dadaun, prosesu investigasaun bá kazu asalta no tuda-malu ne’e sei la’o no bainhira iha ona konkluzaun maka públiku foin hateten motivu loloos.

Husu Responsabilidade Líder GAM-GAR

Komandante Natércia husu líder sira Grupu Arte Marsiál (GAM) ho Grupu Arte Rituál (GAR) nian, atu responsábiliza ninia membru sira nia aktu krime tuir Lei.

“Tanba ne’e atu evita konflitu ne’e bá oin maka ohin komandu orienta ona, atu bolu lider sira hosi artes marsiais, sei halo enkontru ho sira. Ha’u primeira vez mai iha munisipiu Dili no seidauk hasoru-malu ho sira. Tanba ne’e, ha’u presiza atu ko’alia ho sira atu bele toma responsábilidade, hanesan lider hosi grupu sira ne’e,” Natércia hateten.

Komandu Munisipiu Dili mos deklara katak, sei la tolera kualker krime iha sidade ne’e no husu kuelkér sidadaun atu kontribui kria ambiente moris hakmatek.

Jornalista: Rogério Pereira Cárceres