Hatutan.com, (01 Fevereiru 2023), Díli—To’o oras ne’e, operasaun bus Damri ho rute Díli bá Kupaun Nusa Tenggara Timur (NTT) Indonésia seidauk realiza tanba Timor-Leste seidauk iha preparasaun másimu, liuliu seidauk prepara infrsestrutura hanesan fatin estasionamentu no mós auto-carro seidauk iha.

“Normalmente, preparasaun sira hanesan ne’e prezia liuhosi prosesu ida, liu-liu haree mós bá TL nia preparasaun interna. Primeiru, TL ninia transporte sira ne’e iha ona ka la’e. Segundu, liga bá infra-estrutura, hanesan fatin bá halo estasionamentu ka atu para karreta, tanba iha akordu ne’e nia laran, temi hotu buat sira ne’e,” Ministru Transporte no Komunikasaun (MTK), José Agustinho da Silva hateten hafoin sorumutu Konsellu Ministru ordináriu iha Palásiu Governu, Díli, Kuarta (01/02/2023).

Lee Mós: Dezembru, Bís 10 Hahú Operasaun Díli-Kupaun

Advertisement

José Agustinho da Silva dehan, parte Indonézia nian preparadu tanba sira nia Governu investe inklui seitór privadu sira mós investe, maibé TL nian depende bá Orsamentu Jerál Estadu (OJE) no seitór privádu sira mós tuir loloos tenke fó be víndo bá situasaun ida-ne’e ho halo investimentu.

“Ita nian bá para iha ne’ebé-ne’ebé ne’e ema prepara kedan maibé sira nian atu mai karik para iha ne’ebé. Entaun, ita tenke kria kondisoins. Agora, infra-estrutura ho auto-carro, buat rua ne’e mak ita problema,” José Agustinho, hateten.

MTK mós foin lalais ne’e hetan informasaun hosi empreza Timoroan feto sira ne’ebé inform aba Governu katak, sira hakarak atu investe hodi hola autocarro hodi prepara bá akordu ne’e.

“Só que depois de ha’u simu informasaun hosi sira, atualiza katak, buat ne’e sei iha dalan. Agora, iha parte sorin ema preparadu, oinsá mak ita atu halo lansamentu. Mais, atu halo lansamentu, ita tenke garante katak ita nian iha ona tanba ema nian iha, depois ita lansa dala-ida,” nia hateten.

Ministru ne’e fiar katak, implementasaun bá akordu ne’e sei bele hahú iha tempu badak, maski ho kondisaun sira ne’ebé mak Timoroan hotu hatene ‘mínimu’.

Advertisement

Iha juñu 2022, Ministru José Agustinho da Silva selebra akordu ho ho MTK Indonézia nian, nu’udár akordu resiprosidade entre nasaun rua, foka liu oinsá Governu rua kria kondisaun liu hosi fasilita meiu sira transporte ruma, hodi hala’o operasaun entre Kupaun-Díli.

Selebrasaun arkodu ida-ne’e, iha ámbitu vizita Estadu Prezidente Repúblika (PR), José Ramos-Horta nian bá Repúblika Indonézia (RI), hodi hasoru malu ho nia omólogu Prezidente Repúblika Indonéza, Joko Widodo.

Bainhira fila mai Timor, ministru José Agustinho rasik deklaradu bá públiku katak, iha Dezembru 2022, Bus Damri ne’e rasik bele hahú ona ninia operasaun bá mai Kupaun Dili, Timor-Leste, maibé, infelizmente to’o oras ne’e seidauk tanba sei iha ‘problema tékniku’.

Jornalista: Rogério Pereira Cárceres

Advertisement