Hatutan.com, (29 Janeiru 2023), Díli—Prezidente Repúblika (PR), José Ramos-Horta agradese bá Irmá Franciscana Missionário Nossa Senhora iha Leleia ne’ebé kontribui bá área edukasaun hodi forma Timor Oan sira iha área Laleia Manatutu no munisípiu sira seluk.

Prezidente Repúblika (PR), José Ramos-Horta agradese bá Irmá Franciscana Missionário Nossa Senhora iha Leleia ne’ebé kontribui bá área edukasaun hodi forma Timor Oan sira iha área Laleia Manatutu no munisípiu sira seluk. Foto/Média PR.

Ramos-Hortahato’o agradesimentu no apresiasaun ne’e bainhira hala’o vizita bá eskola Irmã Franciscana Missionário Nossa Senhora Laleia, hodi haree direta prosesu aprendizazen no konstrusaun rezidénsia bá Irmã Franciscana sira.

Lee Mós: Konstrusaun Rezidénsia bá Irmã Franciscana Iha Laleia Tuir-duni Dezeñu

Xefe Estadu konsidera modelu prosesu aprendizazen hosi eskola ne’e hatudu duni kualidade tanba opta formasaun integradu ba ema nia moris.

Advertisement

“Agradese tanba prosesu hanorin alunu sira, rejista pasu pozitivu hodi dezenvolve sistema edukasaun Timor-Leste liu-liu iha área Laleia, Baucau no fatin seluk bele lori oan sira ba aprende materia oin-oin. Ha’u mai vizita Madre Franciscana sira iha Laleia, sira apoiu ba edukasaun iha labarik na’in 180 ne’ebé madre sira hosi Portugál fó apoiu fundus hosi Governu Portugál hodi konstrui uma atu hanorin,” Prezidente Repúblika José Ramos-Horta hateten iha komunikadu.

Konstrusaun Rezidénsia bá Irmãn sira, harii iha rai ektare ida oferese hosi povu Laleia no proesu konstrusaun durante ne’e la’o hetan apoiu mós hosi Lider Istoriku, Kay Rala Xanana Gusmão no Prezidente Repúblika José Ramos-Horta durante tinan ida fulan haat.

Koordenadora Kongregasaun Irmã Franciscana, Madre Albina haksolok tebes ho vizita Xefe Estadu Ramos-Horta no Embaixadora Portugál hodi haree sira nia edifisiu no prosesu aprendizazen.

“Ami agradese ba vizita hosi Prezidente Ramos-Horta ne’ebé konsege mai haree direta ami nia fatin no vizita estudante sira,” Madre Albina hateten.

Edifísiu ne’e finaliza ona no hahú loke prosesu rejistu bá estudante sira ne’ebé sei apreende matéria oin-oin tuir kurríkulu Portugál no Timor-Leste nian.

Advertisement

Edifísiu modernu kompostu hosi Koléjiu, formasaun, kampu futsál, jardin halimar ba labarik no rezidénsia komunidade relijioza provinsía Portugueza, konstrui hosi Arquiteto Cesar Almeida hosi Empresa CC Construcões Portugál ho totál orsamentu milliaun $1.4.

Durante halo observasaun, Ramos-Horta hetan esplikasaun direta hosi Arquiteto Cesar Almeida hodi introduz prosesu kontrusaun too finaliza obra ne’ebé tuir dezeñu hosi padre sira.

Kompañia ne’e mós harii ona barajen bee boot iha rai kuak ho kuantidade boot hodi halibur udan been, atu bele utiliza iha tempu bai-loron nuene’e mós bele rega ai-funan no ai-horis ne’ebé sei kuda hele’u rezidénsia iha foho leten Laleia nian.

Tuir planu iha fulan Marsu no Abril tinan ne’e bele halo ona inagurasaun, bainhira kompaña finaliza ona prosesu konstrusaun.

Jornalista: Vito Salvadór

Advertisement