Hatutan.com, (02 Fevereiru 2023), Díli—Partidu Demokrátiku (PD) sempre preparadu bainhira Xefe Estadu, José Ramos-Horta dekreta loron eleisaun Parlamentár tinan 2023.

Estrutura Partidu Demokratiku (PD) hasoru-malu ho Xefe Estadu José ramos-Horta iha Palásiu Prezidensiál Nicolau Lobato Bairru-Pité, Kinta (02/02/2023).

“PD laiha opsaun ba desizaun Prezidente Repúblika nian hodi dekreta loron eleisaun Parlamentár 2023 no prontu hasoru eleisaun tuir prinsípiu Demokrátiku ne’ebé Timor-Leste opta,” Sekretáriu Jerál Partidu Demokrátiku (PD), António da Conceição ‘Kalohan’ hateten hafoin ho estrutura hasoru-malu ho Xefe Estadu iha Palásiu Prezidensiál Nicolau Lobato Bairru-Pité, Kinta (02/02/2023).

Lee Mós: Dekreta Loron Eleisaun, KHUNTO Hakru’uk bá Desizaun Prezidente Repúblika

Sorumutu ne’e hanesan reuniaun ida ne’ebé Prezidente Repúblika mak konvida no ohin oportunidade ba Partidu Demokrátiku mai fahe hanoin ba Xefe Estadu kona-bá preparasaun ba eleisaun parlamentár 2023 ne’ebé sei mai.

Partidu Demokrátiku mai ho ninia estrutura nasionál, Prezidente Partidu hamutuk ho Prezidente CPN no Vise sira mai hasoru Xefe Estadu hodi fó hanoin tetu ba situasaun sira ne’ebé oras ne’e daudaun la’o hela no kaer mós ba regra normál ne’ebé hatuur iha Konstitusaun RDTL.

“PD nafatin hein desizaun ne’ebé Prezidente Repúblika iha no kaer metin nafatin ba prinsipiu sira iha Konstituisaun RDTL katak governu ne’e iha kada tinan lima nia laran. Bainhira loos mak governu foun ne’e atu mosu liu husi eleisaun parlamentár ida ne’e desizaun iha Xefe Estadu nia liman,” Kalohan subliña.

Kona-bá preparasaun, Kalohan dehan, estrutura PD la’o iha aldeia hotu-hotu no estrutura sira ne’e tuir baze de dadus iha ona 29.000 ne’ebé tama estrutura Partidu Demokrátiku ne’e iha teritóriu nasionál hodi halo servisu no halo preparasaun ba eleisaun parlamentár nian.

Partidu Demokrátiku nafatin la’o hela iha baze no aldeia sira no PD nia espetativa mak prepara an ba eleisaun ho pozisaun ida ne’ebé PD iha ona katak Maubere oan prontu serbí.

Jornalista: Vito Salvadór