Hatutan.com, (06 Fevereiru 2023), Díli- Sekretáriu Jerál Partidu Frente Revolucionário Timor-Leste Independénte (FRETILIN), Marí Bin Amude Alkatiri, husu atu Prezidente Repúblika (PR), José Ramos-Horta, tetu fatór sira hotu molok dekreta loron eleisaun parlamentár 2023.

Lee Mós : FRETILIN Tenke Hateke Bá Oin ho Objetividade

Estrutura partidu FRETILIN ko’alia bá jornalista sira hafpin hasoru-malu ho PR Ramos-Horta iha Pálasiu Prezidensiál, Segunda (06/02/2023). Foto/Elio dos Santos da Costa

Sekretáriu Jerál Partidu FRETELIN, Marí Bin Amude Alkatiri hateten FRETILIN hanesan partidu boot liu iha Parlamentu Nasionál, ohin, Xefe Estadu simu bá audiénsia ikus liu husi partidu polítiku sira seluk.

Tuir Mari Alkatiri, enkontru ne’e di’ak tebes, no Xefe Estadu tau preokupasaun barak hahú husi preokupasaun kona-bá desizaun labele kontra konstituisaun RDTL, ne’e normál aktu ida polítika Xefe Estadu nian, biar polítika de’it la’ós juridiku, maibé iha Konstituisaun rasik define ona rekezitu atu desizaun ne’e bele halo maibé labele viola konstituisaun RDTL.

Enkontru ne’e fundamentalmente Prezidente Repúblika nia preokupasaun furak tebes tanba hakarak data saida mak nia marka sosiadade tomak bele asesu.

“Enkontru ne’e lá’os finál, Prezidente Repúblika sei hasoru malu ho Sosiédade Sivil no sei hasoru malu ho setór sira seluk tan, depois sei presija ko’alia fila fali partidu polítiku sira no ami husi partidu  FRETILIN sei bolu fali, ka konvida fali ami atu mai ko’alia fila fali depois mak sei marka data bá eleisaun,” Marí Bin Amude Alkatiri hateten bá jornalista sira iha Palásiu Prezidensiál, Segunda (06/02/2023).

Sekretáriu Jerál Partidu FRETILIN ne’e hatutan FRETILIN desde moris to’o agora nia preokupasaun mak povu, estadu, no nasaun tanba ne’e FRETILIN sei kontribui ba povu nia di’ak, atu hametin estadu, atu harii nasaun.

FRETILIN prontu bá solusaun, maibé para estadu ne’e atu sai Estadu ida rezidente demokrátiku tenke tau konstituisaun no lei iha leten.

“Ami seidauk diskute data tentativa, ha’u la marka data eleisaun tanba ne’e kompeténsia Xefe Estadu nian, ami mai fó opiniaun ba Xefe Estadu la’ós bá públiku,” Mari Alkatiri subliña.

Jornalista: Vito Salvadór