Hatutan.com, (06 Fevereiru 2023), Díli—Embaixadór Korea Súl iha Timor-Leste, Shin Mantaek husu ba Prezidente Repúblika (PR), José Ramos-Horta atu fó apoiu bá Korea Súl nia kandidatura hanesan nasaun membru naun permanete bá United Nations Security Council (UNSC).

Embaixadór Korea Súl Shin Mantaek hala’o enkontru ho Ramos-Horta iha Palásiu Prezidensiál Nicolau Lobato Bairru-Pité, Segunda (06/02/2023).

“Iha enkontru ne’e ha’u husu bá Xefe Estadu atu apoia Korea Súl ninia kandidatu ba nasaun membru naun permanente iha United Nations Security Counsil nian. Prezidente Repúblika José Ramos Horta prontu atu apoiu,” Embaixadór Korea Súl Shin Mantaek hateten hafoin enkontru ho Ramos-Horta  iha Palásiu Prezidensiál Nicolau Lobato Bairru-Pité, Segunda (06/02/2023).

Lee Mós: Prezidente Repúblika Kondekora Embaixadór Korea Súl ho Medalla Méritu

Shin Mantaek  foin asume kargu hanesan Embaixadór Repúblika Korea nian iha Timor Leste,  no aproveita hodi hala’o vizita kortezia ida ba Xefe Estadu, diskute asuntu lubuk ida kona-bá kooperasaun atu bele kontribui ba dezenvolvimentu Timor Leste ninian.

Timor Leste ho Korea Súl iha esperiénsia iha parte istória nian, iha similaridade buat barak ne’ebé hanesan entermus istória, tanba ne’e Korea Súl depois funu sofre estragus barak.

Ho esperiénsia sira ne’ebé Korea iha, nu’udár Embaixadór hakarak atu mai introdús no replika fali esperiénsia sira ne’e hodi bele ajuda dezenvolvimentu Timor Leste.

Iha sorumutu ho Xefe Estadu, diskute assuntu barak iha area oin-oin maibé sei iha enkontru tuir mai oinsá bele halo planu detallu ba área sira ne’ebé diskute nune’e bele ajuda duni Timor Leste ninia dezenvolvimentu.

Área importante ne’ebé diskute ho Xefe Estadu maka kona-ba Timor Leste nia esforsu atu adere ASEAN, no Governu Korea komprometidu atu apoiu Timor Leste ba preparasaun liu-liu kapasitasaun rekursu umanu Korea prontu bainhira de’it Timor Leste presiza sei apoia área ida ne’e atu ajuda Timor Leste sai membru ne’ebé full iha ASEAN nian.

“Timor Leste ho Korea tinan kotuk halo tiha ona tinan 20 estabelese relasaun bilaterál entre Korea hi Timor Leste, tinan ida ne’e hahú fali tinan primeiru atu konta ba tinan 20 oin tan mai sei nafatin servisu hamutuk sai nasaun país amigu ne’ebé di’ak ba futuru nune’e nafatin tulun malu iha parte ne’ebé de’it,” nia dehan.

Asuntu ida seluk ne’ebé ohin ko’alia ho Xefe Estadu kona-ba Timor Leste ninia apoiu ba Korea atu sai uma na’in ba expo Busan ne’ebé sei realiza iha 2030.

Jornalista: Vito Salvadór