Hatutan.com, (22 Marsu 2023), Díli—Diretór Ezekutivu Klínika Bairru-Pité, Inácio dos Santos husu Prezidente Repúblika (PR), José Ramos-Horta atu fó apoiu bá Klínika ne’e tanba daudaun ne’e enfrenta difikuldade iha ambulánsia no mós edifísiu ne’ebé la viável.

Diretór Ezekutivu Klínika Bairru-Pité, Inácio dos Santos hala’o enkontru ho Prezidente Repúblika (PR), José Ramos-Horta iha Palásiu Prezidensiál Nicolau Lobato, Bairru-Pité, Kuarta (22/03/2023). Foto/Média PR.

Durante enkontru ho Xefe Estadu, Inácio dos Santos relata bá kona-bá servisu ne’ebé klínika ne’e halo ona, progressu servisu balun liu-liu relata kona-bá difikuldade barak ne’ebé hasoru, tanba Xefe Estadu mós hanesan padroiru ba Klínika ne’e rasik atu bele buka solusaun hamutuk.

Lee Mós: MS Redús Orsamentu Klínika Bairru-Pité Hodi Responde ba SNAEM

Klínika Bairru-Pité nia servisu foku ba defesaun kazu Tuberkuloze (TBC), HIV-SIDA ho má-nutrisaun no agora daudauk defesaun kazu má-nutrisaun aas.

Xefe Estadu rasik suporta mós programa ba inan isin-rua ne’ebé ho má-nutrisaun, inan fó-susu no mós labarik ho idade 0-7 ne’ebé problema má-nutrisaun, hato’o bá Xefe Estadu atu bele suporta nafatin programa ne’e no atividade sira ne’ebé Klínika Bairu Pite hala’o kontinua nafatin.

“Difikuldade barak ne’ebé ita hasoru liu-liu transporte tanba Klínika Bairr-Pité iha ambulánsia ida de’it atu bele hala’o movimentu ba tula pasiente liu-liu pasiente balun ne’ebé iha área rurál sira presiza suporta,” Inácio dos Santos hateten iha Palásiu Prezidensiál Nicolau Lobato Bairru-Pité, Kuarta (22/03/2023).

Difikuldade seluk ne’ebé klínika ne’e enfrenta mak hanesan edifísiu ne’ebé la viável tebes tuir padraun saúde, nune’e ko’alia ho Xefe Estadu oinsá buka solusaun.

Edifísiu Klinika Bairru-Pité rasik iha ona fundus ne’ebé oferese hosi sosiédade sivil auditória sosiál no mós tau fundus ona ba dezeñu BOQ nune’e ohin mai ko’alia ho Xefe Estadu atu iha posibilidade bele suporta ba konstrusaun fasilidade sira.

Jerente ne’e mós esplika katak, tinan 2023 klínika Bairru-Pité rejista moras as maka moras respirasaun, TBC hahú hosi fulan Janeiru to’o agora detekta kazu 120.

Alende ne’e, kazu HV-SIDA rasik mós aas ne’ebé agora daudaun tratamentu ba ema ne’ebé moras HIV-SIDA iha Klínika Bairru-Pité hamutuk 226 no mós má-nutrisaun agora daudaun iha 200-resin.

Kona-bá kestaun sira ne’e, Prezidente Repúblika, José Ramos-Horta promete atu buka solusaun hamutuk ho doadór nasaun balun hanesan Embaixada balun iha Timor atu bele suporta Klínika Bairru Pité.

“Xefe Estadu iha komitmentu atu bele suporta nafatin Klínika ne’e tanba Xefe Estadu mós nu’udár padroiru Fundasaun Klinika Bairru-Pité nian sei buka solusaun hamutuk hodi buka solusaun bá difikuldade sira,” nia hateten.

Jornalista: Vito Salvadór