Hatutan.com, (11 Fevereiru 2022), Díli- Órgaun Liga Futeból Timor-Leste (LFTL) too ona ba konkluzaun ida bá realizasaun liga Timorense époka 2022-2023.

Lee Mós : FFTL Transfere $50,000.00 bá LFTL Organiza Liga Timorense Époka 2022-2023

Diretór Tékniku Aitana Fc, Ricardo Correia Mendonça. Foto/Elio dos Santos da Costa

Liuhosi tecnical meeting klube estimadu hosi Munisípiu Viqueque Aitana Fc sei hasoru nia adversáriu Porto Taibessi Fc iha jogu abertura  Liga Timorense  époka 2022-2023 ne’ebé tuir planu sei realiza iha Estádiu Munisipál Díli.

Ekipa Aitana Fc no Porto Taibessi Fc ida-idak iha ambisaun atu sai kampiaun bá iha jogu abertura, atu nune’e, mantein prestíjiu hanesan klube favoritu bá iha Liga Timorense.

Haree hosi preparasaun no kompozisaun jogadór ne’ebé klube Aitana Fc no Porto Taibessi Fc submete iha Órgaun liga, sira la hatudu ambisaun atu sai favoritu ba kampiaun Liga Époka ne’e maibé iha esforsu oinsá atu dezenvolve klube ne’e di’ak liután hodi mantein iha Primeiru divizaun ba époka sira tuir mai.

Diretór Tékniku Aitana Fc, Ricardo Correia Mendonça hateten Aitana Fc preparadu baájogu Liga Timorense époka 2022-2023, dezde semana rua ikus Aitana Fc halo preparasaun iha táktika no mos fíziku tamba ne’e iha jogu primeiru sei halo esforsu atu konkista vitória hasoru adversáriu Porto Taibessi Fc.

Nia afirma époka 2022-2023, Aitana Fc mai ho treinadór foin-sa’e, José Carlos da Fonseca no iha kompozisaun jogadór ne’ebé kuaze ho idade foin-sa’e kahur ho senior balun ne’ebé antes ne’e reforsa klube no Aitana Fc mos lori jogadór lokal ida husi Munisípiu Manufahi.

“Importante liu Aitana Fc mantein iha Primeiru divizaun, ami nia alvu lakohi tun husi Primeiru divizaun,” Diretór Tékniku Aitana Fc, Ricardo Correia Mendonça ba jornalista sira iha salaun Xanana Sport Center FFTL, Sábadu (11/02/2023).

Eis jogadór selesaun nasionál ne’e hatutan, Aitana Fc otimista sei mana nia adversáriu Porto Taibessi Fc, tamba ida ne’e primeiru jogu no hakarak ka lakohi Aitana Fc garante tenke manan.

Manajer Klube Porto Taibessi Fc, Carles Guterres. Foto/Elio dos Santos da Costa

Aitana Fc kontratu mós Jogadór internasionál ida husi Guiné no tuir oráriu sei too iha Timor-Leste iha  Domingo (12/02/2023), hodi halo preparasaun hamutuk ho ekipa molok joga kontra Porto Taibessi Fc.

Manajer Klube Primeira divizaun Porto Taibessi Fc, Carles Guterres hateten Porto Taibessi Fc iha preparasaun ne’ebé di’ak, kada loron sempre halo preparasaun iha parte tékniku no mós fíziku tamba ne’e atu dehan katak preparasaun durante ne’e la’o kapas hela.

Primeiru jogu kontra Aitana Fc Porto, Carles Guterres hateten, Taibessi Fc garante sei manan maibé iha jogu 90 minutu mak sei determina, se mak manan no se mak lakon.

“Porto Taibessi Fc nafatin otimista dehan sei manan iha primeiru jogu, Porto Taibessi Fc mós preparadu, mai ho jogadór ne’ebé maka kuaze iha esperiénsia tamba ne’e se ami joga di’ak ami mós sei manán adversáriu Aitana Fc,” Carles Guterres afirma.

Porto Taibessi Fc iha kompozisaun jogadór lokal no mós estranjeiru, no Porto Taibessi Fc la halo kontratu ho jogadór estranjeiru husi dok maibé kontratu de’it jogadór sira husi provínsia Kupaun, Indonézia .

Kompozisaun jogadór internasionál ne’ebé Porto Taibessi Fc kontratu husi Indonézia sei joga iha pozisaun avansadu no meiu kampu.

Jornalista: Vito Salvadór