Hatutan.com, (22 Fevereiru 2023), Díli- Klubu AD SLB Laulara FC obrigadu tenke fahe pontus ho klubu Coração FC hafoin ekipa rua termina jogu ho skor 1-1.

Lee Mós : AD SLB Laulara Garante Rekolla Pontu Tolu Dahuluk iha Jogu Kontra Coração FC

Treinadór AD SLB Laulara FC, Julião Monteiro hateten, AD SLB Laulara FC hahú hetan nia ritmu jogu iha segunda parte, no problema ne’ebé AD SLB Laulara FC hasoru mak falta de’it finalizasaun no crossing mos ladún di’ak tamba ne’e bá oin presiza hadi’a.

AD SLB Laulara FC fahe pontus ho Coração FC 1-1 iha jogu LIga Timorense Époka 2022-2023 iha Estádiu Munisipál Díli, Kuarta (22/2/2023). Foto/LFTL

“Ami nia jogu di’ak, kuaze domina bola iha segunda parte, maibé falla iha finalizasaun no bola crossing no bainhira Jogadór adversáriu halo tranzisaun ami nia Jogadór falla atu antesia, ida ne’e mak ami sei hadi’a,” Julião Monteiro bá jornalista sira hafoin ekipa AD SLB Laulara FC no Coração FC remata jogu iha estádiu Munisipál Díli, Kuarta (22/02/2023).

Treinadór ne’e subliña kuaze nia Jogadór falla antesipa bola bainhira jogadór adversáriu sira halo tranzisaun no kontra atake tamba ne’e baáoin sei hadi’a hodi bele hasoru ekipa seluk iha jogu tuir mai.

Iha parte seluk treinadór klube Coração FC, Siquito do Carmo hateten, ho sorte boot tebes Coração FC bele hetan pontus ida tamba hanesan ema hotu hatene AD SLB Laulara FC hanesan ekipa ida forte tamba maioria Jogadór mesak selesaun nasionál.

“Ba ami normalmente kuadu empata ami sente orgullu boot bá ami, tanba ida ne’e bele fó vantajen ba ami no fó motivasaun liután bá ami iha jogu sira tuir mai,” Siquito do Carmo hateten.

Eis Jogadór selesaun nasionál ne’e hatutan Coração FC sempre iha esperansa bá kada jogu ne’ebé ekipa enfrenta tamba ne’e sei hadi’a di’ak liután atu bele rekolla tan pontus iha jogu sira tuir mai.

Ekipa AD SLB Laulara FC no Coração FC hatudu jogu ida atrativu hodi anima adeptu sira ne’ebé ho entuziasma  asiste direita jogu entre ekipa rua iha estádiu munisipál Díli.

Ekipa AD SLB Laulara FC hatudu kedas nia superioridade iha jogu ne’e dezde minutu dahuluk, liu husi kombinasaun Jogadór iha kada liña ne’ebé di’ak no maioria prienxe husi Jogadór selesaun nasionál.

Coração FC lalakon ánimu hodi adapta ho jogu ne’ebé AD SLB Laulara FC iha no sempre halo kontra atake no tranzisaun ne’ebé iha hodi aproveita fallansu ne’ebé Jogadór adversáriu iha.

Ekipa rua kontinua halo kontra atake bá malu, Jogadór estrela AD SLB Laulara FC, Mouzinho de Lima (10) halo ameasa dahuluk liu husi suta bola falta, maibé baliza adversáriu sei antesipa ho di’ak.

Ho oportunidade ne’e AD SLB Laulara FC kontinua halo atake no iha minutu 35 jogadór estranjeiru Bakayoko Ozi (2) konsege halo golu hodi lori AD SLB Laulara FC lidera provizóriu ho skor 1-0, hafoin simu asisténsia husi Jogadór Cornelis Portela (11) noo rezultadu ne’e lori ekipa rua ba termina jogu primeira parte.

Hakat bá segunda parte, ekipa AD SLB Laulara FC nafatin domina bola. Kuaze halo atake barak bá adversáriu, maibé laiha golu ruma. Coração FC mantein ho nia ritmu, joga neineik no sempre antesipa AD SLB Laulara FC sira nia movimentu liu-liu iha pasajen sira.

Ekipa Coração FC tenta halo atake liu husi defeza Yohanes Gusmão (12) ne’ebé sempre lansa bola dok, maibé baliza adversáriu sei antesipa ho di’ak no liña defeza AD SLB Laulara FC mantein disiplina hodi asegura atake ne’ebé Coração FC halo.

Tama ba minutu 61, AD SLB Laulara FC hetan bola kantu, nune’e maioria Jogadór bá hotu iha liña oin adversáriu nian ho intensaun hakarak atu kabesada bola maibé Coração FC halo tranzisaun liu husi bola ne’ebé iha no Avansa Coração FC Miguel Barbos (19) hetan oportunidade hodi lansa atake ba AD SLB Laulara FC no la konsege marka golu tamba Jogadór AD SLB Laulara FC Cristóvão Fernandes (23) halo falta iha área grandeal laran nune’e árbitru Romario Teti foti desizaun hodi fó penalidade bá Coração FC no jogadór AD SLB Laulara FC Cristóvão Fernandes (23) obrigadu tenke simu kartaun kinur.

Jogadór Coração FC Carlos Ximenes (16) ne’ebé hetan konfiansa hodi ezekuta penalidade ne’e susesu hatama golu hodi muda skor ba empata 1-1.

Hafoin golu ne’e, AD SLB Laulara FC kontinua domina bola, no Jogadór Mouzinho de Lima (10) hetan tan oportunidade ida liu husi bola falta maibé baliza Coração FC Francisco Gusmão (1) konsege antesipa ho di’ak hodi baku sai bola.

Jogadór Coração FC Denilson dos Santos (17) hetan kartaun kinur iha minutu 72 hafoin halo falta hasoru jogadór AD SLB Laulara FC Zenivio Mota (7).

Iha minutu 74, ekipa AD SLB Laulara FC halo substituisaun bá Jogadór hodi hasai Jeremias Baptista (69) no Cornelis Portela (11) hodi hatama Jogadór Aldo Amaral (19) no Alexandro Ima Kefi (21), iha tempu hanesan Coração FC mós halo substituisaun bá nia jogadór hodi hasai Jeka Monteiro (6) no hatama Denilson de Almeida (10).

Ho substituisaun sira ne’ebé iha ekipa rua mantein halo kontra atake ba malu no AD SLB Laulara FC kontinua domina bola, maibé falla atu prodús tan golu.

Iha minutu 82 Coração FC hasai nia jogadór Albertino Ribeiro (21) no hatama João Xavier (11), hodi halo mudansa ba táktika atu bele asegura rezultadu no buka posibilidade hatama golu atu bele hetan vitória.

Iha minutu 88 AD SLB Laulara FC halo substituisaun bá Jogadór hodi hasai defeza senior Felipe Oliveira (24) no hatama avansadu Alexandro Lemos (9) atu bele aumenta mobilizasaun iha liña avansadu no halo atake hodi buka vitória maibé rezultadu empata 1-1 mantein too artibito Romario Teti huu arbitu ikus sinál jogu remata.

Ho rezultadu ne’e, Coração FC provizoriamente lidera tabela klasifikasaun Liga Timorense époka 2022-2023 ho pontu haat husi Jogu 2.

Jornalista: Vito Salvadór