Hatutan.com, (14 Fevereiru 2023), Díli– Ekipa konjunta kompostu hosi Autoridade Protesaun Sívil (APC-sigla Portugés), Polísia Nasionál Timor Leste  (PNTL) Munisípiu Ainaro,  autoridade lokák Munisípiu Ainaro ho grupu juventude sira, halo esforsu hodi buka tuir joven mane-na’in-rua ne’ebé lakon iha  foho Ramelu.

Joven na’in-rua ne’ebé lakon iha foho Ramelau. Foto/Foti hosi Facebook

Informasaun ne’ebé família sira hosi alin mane na’in-rua ne’e espalla iha média sosial Facebook katak, iha Kinta, 08 Fevereiru 2023, joven mane na’in-rua naran bolu “Landro no Ino”, ho motór privádu marka Scoopy, Xapa Matrikula S. 6898, kór metan, viájen hosi kapitál Díli, ho objetivu bá vizíta Nain Feto Ramelau, iha Postu Administrativu Hatubuilico, Munisípiu Ainaro.

“Protesaun Sívil serbisu hamutuk ho seguransa sira ho autoridade lokál sira, ita buka tuir nafatin, to’o oras ne’e, ita seidauk hetan informasaun bá ida ne’e,” diretór Relasaun Externa no Komunikasaun APC, Anacleto Caetano, informa bá jornalista sira liuhosi konferénsia imprénsa iha kna’ar fatin, Segunda (13/02/2023).

APC bá buka tuir joven mane na’in-rua ne’e, mezmu la’ós kompeténsia APC nian, maibé, autoridade seguransa sira liu-liu hanesan PNTL mak bele hato’o informasaun kona-bá paradeiru hosi sidadaun mane na’in-rua ne’ebé buka la hetan.

“Ida ne’e, sira bá iha fatin sira ne’ebá maka depois ikus mai ita lahatene, paradeiru iha ne’ebé, ida ne’e kompeténsia polísia nian, oinsá bele haree. Maibé, APC nafatin koopera hamutuk ho autoridade sira ne’e, atu bele hetan ita-nia maluk sira ne’e. APC ninia obrigasaun ne’e, atu haree liubá komunidade sira ne’ebé mak afetadu,” diretór Anacleto Caetano hateten.

To’o oras ne’e, ekipa konjunta sira, kompostu hosi Komandu PNTL Munisipiu Ainaro, Eskuadra Hatu-Builico, lideransa lokál no komunitária sira, katuas lia-na’in, inklui ekipa autoridade protesaun sívil, halo hela esforsu másimu hodi buka tuir hela paradeiru hosi javen mane na’in-rua ne’e. 

Jornalista: Rogério Pereira Cárceres