Hatutan.com, (24 Fevereiru 2023), Díli-Estrutura nasionál no lider supremu partidu Kmanek Haburas Unidade Nasionál Timor Oan (KHUNTO),  konfirma katak, to’o oras ne’e partidu KHUNTO  seidauk iha desizaun ruma atu  toka ka “dezarma” José Agostinho da Silva hosi kargu Sekretáriu Jerál (Sekjer) partidu nian.

Lee Mós : KHUNTO Enfrenta Konflitu Internal, José Agustinho Halo Karta Aberta

Liuhosi konferénsia imprénsa iha rezidénsia lider supremu partidu KHUNTO nian, José “Naimori” dos Santos Bucar, Sesta (24/02/2023), estrutura nasionál sira hatán no simu deklarasaun Sekjer José Agostinho nian iha Tersa liubá  ne’ebé espalla iha media sosiál katak lider másimu partidu KHUNTO, José  dos Santos “Naimori” ‘dezarma’ tiha ona José Agustinho da Silva hosi kompeténsia tomak hanesan Sekretariu Jeral partidu KHUNTO.

Konferénsia imprensa partidu KHUNTO iha rezidénsia lider másimu partidu KHUNTO nian, José dos Santos ‘Naimori”, Sesta (24/2/2023). Foto/Elio dos Santos da Costa

“To’o ohin loron, partidu KHUNTO ho estrutura tomak, militantes no simpatizantes tomak to’o iha baze, seidauk hasai deklarasaun nune’e mós seidauk liuhosi reuniaun extraordináriu, atu hasai sekjer hosi ninia kargu ne’ebé mak nia asume,”  reprezentante kuadru no estrutura nasionál partidu KHUNTO, Nicolau Lino Freitas, hateten liuhosi konferénsia imprénsa.

Estrututra nasionál partidu nian, konsidera katak, José Agustinho, hanesan ema ida ne’ebé mak kleur tebtebes iha partidu, tanba ne’e mak lider supremu, nune’e mós estrutura, seidauk hasai orientasaun pur-eskrita ruma, liuhosi kongresu extraodináriu, atu hasai ka demite kargu ne’ebé mak nia assume.

“Saida mak akontese, nia deklarasaun hatete katak, partidu KHUNTO dezarma ona ninia kompeténsia. Ida ne’e, nia mak deklara,” Nicolau Lino Freitas, afirma tán.

Deklarasaun balun ne’ebé mak Sekjer hato’o, kona-bá relatóriu ho administrasaun ne’ebé mak internal partidu hasoru, ida ne’e, partidu iha hierarkia, estatutu, ne’ebé mak atu regula, para estrutura hothotu tenke la’o, bazeia bá kompeténsia ne’ebé mak iha.

Partidu KHUNTO, tuir Nicolau Lino Freitas katak,  diferente ho partidu politiku sira seluk, tanba partidu ne’e ninia filozófi ka doutrina katak, nia na’in laiha. Sé mak hakarak sai famiíia iha partidu ne’e, maka KHUNTO nia odamatan nakloke bá ema hotu. Partidu ida ne’e, ema hothotu ninian, ema hotu kontribui mak ohin loron bele hetan asentu iha Parlamentu Nasionál ho kadeira lima (5).

Estrutura nasionál partidu KHUNTO haree katak, besik ona loron eleisaun, sekretáriu jerál ninia deklarasaun ida ne’e, fó pergunta boot ida bá estrutura nasionál, militante no simpatizante sira. Ninia personalidade hanesan asume kargu boot ida, no agora dadaun, nia mós assume kargu hanesan Ministru Transporte no Komunikasaun.

Konférensia imprensa Partidu KHUNTO. Foto/Elio dos Santos da Costa

“Ne’e la’os vaga, ne’ebé mak nia lori, bá apply, hodi hetan kargu ida ne’e. Ida ne’e, kargu politika, entaun, nia tenke respeita bá ierarkia, no presiza atu haree, kontribui, iha fallansu ruma karik, partidu iha ninia uma-fukun rasik, mak sede nasionál. Iha prosesu administrasaun, buat ruma ne’ebé la’o ladun di’ak karik, peziza bá, hato’o iha ne’ebá,” Nicolau Freitas hateten.

Maske assume hela kargu nu’udár Sekjer bá partidu, maibé durante tinan rua-resin, estrutura nasionál KHUNTO nian, nota katak, José Agostinho la ativu iha ninia serbisu. Maibé, lider supremu partidu nian, sempre ho fuan boot, no hadomi tebes sekjer.

“Mezmu la ativu, mais konsidera nafatin, fó nafatin oportunidade bá nia, para bele assume kargu, responsábilidade hanesan sekretáriu jerál. Ne’e lider supremu, iha kompet’ensia tomak atu hasai, mais infezlimente lider supremu ema ida ne’ebé fuan boot, ema kontra tiha mós, núfin mai fila-fali mós, nia nafatin simu,” Nicolau Lino Freitas tenik.

Iha biban ne’e, reprezentante estrutura nasionál KHUNTO ne’e husu deskulpa bá militante, simpatizante sira, inklui povu tomak, tanba akompaña deklarasaun ne’ebé mak fó sai hosi Sekretáriu Jerál KHUNTO. Husu militante sira atu sólidu nafatin, kontinua halo preparasaun hodi hasoru eleisaun parlamentár tinan ne’e.

Jornalista: Rogério Pereira Cárceres