Hatutan.com, (22 Fevereiru 2023), Díli—Igreja Katólika Timor-Leste liu hosi Conferênsia Espiscopal Timorense (CET), hakruk ba desizaun Prezidente Repúblika (PR) José Ramos-Horta tuir dekretu Prezidensiál númeru 9/2023 ne’ebé dekreta eleisaun lejislativa iha loron Domingu.

Haree ba dekretu Prezidensiál númeru 9/2023 kona-bá data eleisaun lejislativa ne’ebé sei realiza iha loron 21 fulan Maiu tinan 2023, ne’ebé monu iha loron Domingu no rona preokupasaun sarani Katólika Timor-Leste nian kona-bá data refere, CET tetu ho atensaun hato’o ba sarani sira hotu katak, pozisaun Uma Kreda Katólika Timor-Leste nian maka respeita desizaun Prezidente Repúblika tuir dekretu Prezidensiál ne’e.

Lee Mós: 21 Maiu, Povu Timor Leste Vota

“Apela ba sarani Katólika iha Timor-Leste atu kumpre dever nu’udár sarani di’ak hodi partisipa nafatin missa iha loron Domingu tuir Santa Kreda nia hanorin. Apela mós ba sarani Katólika iha Timor-Leste atu kumpre dever nu’udár sidadaun di’ak hodi partisipa direta iha eleisaun lejislativa iha loron Domingu ne’e,” Hatutan.com sita komunikadu ne’ebé asina hosi Arsebispu de Arkedioseze Díli no Pró Prezidente CET, Dom Virgilio Cardeal do Carmo da Silva, Kuarta (22/02/2023).

Liu hosi komunikadu ne’e, Uma Kreda fó-hanoin mós ba Timoroan sira atu ezerse direitu  partisipasaun polítika ho pás, domin no responsabilidade hodi respeita-malu nafatin iha eleisaun lejislativa desde períodu kampaña politika to’o loron eleisaun.

Maromak haraik nafatin grasa no bensaun ba povu no rai doben Timor-Leste atu moris iha pás no hakmatek.

Jornalista: Vito Salvadór