Hatutan.com, (28 Janeiru 2022), Díli– Tribunál Rekursu (TR) haruka fila dokumentu kandidatu Prezidente Repúblika husi Partidu Kmanek Haburas Unidade Nasionál Timor-oan (KHUNTO), Armanda Berta dos Santos, atu ba kompleta tan dokumentu eletróniku husi proponente no kandidatura nian.
Notísia iha Relasaun: Horta-Angela-Felisberto ho Milena Submete Ona Dokumentu iha Tribunál Rekursu
Prezidente Partidu Kmanek Haburas Unidade Nasional Timor Oan (KHUNTO) nu’udar mós Kandidatu Prezidente Repúblika, Armanda Berta dos Santos. Foto/Hatutan.com.
Iha Sesta (28/01/2022), tuku 10:30 Otl, ekipa susesu ne’ebé lidera husi Marito Magno, lori dokumentu kandidatu PR Armanda Berta dos Santos nian ba TR, maibé tuir verifikasaun TR nian sei falta dokumentu balun ne’ebé presiza atu kompleta tan. Tanba ne’e, TR seidauk bele simu dokumentu hodi rejistu kandidatura Armanda Berta nian.
“TR halo verifikasaun hodi husu kompleta dokumentu elektroniku hanesan lista proponente tenke aprezenta ho eletróniku tanba ne’e orasida lokraik ami sei mai kompleta fila fali Marito Magno informa ba jornalista iha Tribunál Rekursu, Caicoli, Dili.
Kandidatura Armanda Berta rejistu ho lista proponente hamutuk 8.641 husi Munisípiu 12 inklui Rejiaun Administrativu Espesiál Oé-Cusse Ambeno (RAEOA).
Lista sira-ne’e mak hanesan husi Munisípiu Dili 1.470, Manatutu (804), Ermera (801), Baucau (742), Liquiça (612), RAEOA (599), Aileu (578), Manufahi (507), Viqueque (476), Bobonaro (447), Covalima (493), Lautem (404), Ainaro (588) no Atauro (140).
Dezde loron 26 to’o loron 28 fulan-Janeiru ne’e, TDD foin simu dokumentu no rejistu kandidatura PR na’in-haat maka hanesan José Manuel Ramos-Horta husi partidu CNRT, Felisberto Araújo Duarte, Milena Pires ho Angela Freitas.
Jornalista: Carmelita Isaac