Hatutan.com, (25 Fevereiru 2023), Díli—Klubu segunda divizaun Kablaki FC susesu rekola pontu tolu hafóin halakon adversáriu Nagarjo FC ho skore 1-0.

Klubu segunda divizaun Kablaki FC susesu rekola pontu tolu hafóin halakon adversáriu Nagarjo FC ho skore 1-0. Foto/LFTL.

Ekipa Kablaki FC no Nagarjo FC obrigadu tenke joga iha udan laran tanba jogu seidauk hahú udan komesa tun habokon estádiu munisipal Díli.

Lee Mós:As Marca Konkista Vitória Dahuluk ho Santa Cruz FC 1-0

Iha primeira parte jogu hahú ekipa rua hahú halo jogu no Nagarjo FC hatudu nia jogu hodi hola inisiativa lansa kontra atake ba ekipa adversáriu liu hosi pasajen bola badak hosi liña klaran ba avansadu maibé Kablaki FC sei antesipa ho diak hodi asegura atake ne’ebé Nagarjo FC halo.

Jogadór Kablaki FC Nelson António (16) simu kartaun kinur iha minutu 15 hafóin halo falta hasoru avansadu Nagarjo FC ne’ebé tenta halo ameasa liu hosi liña esquerda.

Nagarjo FC kontinua domina jogu no halo presaun ba ekipa Kablaki FC. Tama ba minutu 28 kapitaun ekipa Kablaki FC Jorge Alves (6) simu tan kartaun kinur hafóin halo falta hasoru jogadór Nagarjo FC.

Haree ba ameasa ne’ebé ekipa Nagarjo FC iha, Treinadó Kablaki FC hahú estuda ekipa Adversáriu nia taktika nune’e fó orientasaun ba kapitaun ekipa Jorge Alves (6) ne’ebé joga iha liña médiu atu lansa kontra atake liu hosi bola as ba iha avansadu hodi fó presaun ba defeza adversáriu, no estratéjia ne’ebé Kablaki FC iha konsege halo liña defeza Nagarjo FC atrapalla no hamosu amiasa barak maibé laiha golu ruma mak akontese.

Tama ba minutu 42, Jogadór Nagarjo FC José da Costa (18) simu kartaun kinur hafóin halo falta hasoru avansadu Kablaki FC Julvito Nascimento (9) no ekipa Kablaki FC hetan oportunidadeiu hosi bola falta maibé falla atu aproveita oportunidade ne’e no bola dok hosi tarjetu ne’ebé iha.

Nagarjo FC mos hahú halo tranjisaun ba taktika no konsege domina hikas bola maibé falla atu produz golu no ekipa rua mantein ho skor 0-0 to’o termina primeira parte.

Tama ba segunda parte ekipa rua mantein jogu no kada ekipa hahú halo mudansa ba taktika no buka oportunidade atu hatama golu maibé nafatin falla.

Kablaki FC halo substituisaun dahuluk hodi hasai Elidio Manuel (10) no hatama João Vítor (8) iha minutu 58. Ekipa Nagarjo FC mos halo substituisaun hodi hasai  Nelson Freitas (10) no hatama Bonifácio Cabral iha minutu 67.

Ekipa Kablaki FC kontinua halo presaun no iha minutu 68, jogadór Julvito Nascimento (9) konsege hatama golu hodi muda skor ba 1-0 hafóin simu asistensia bola hosi nia maluk Jogadór Julião Soares (12), hafóin golu ne’e  ekipa Kablaki FC halo tan substituisaun ba Jogadór hodi hasai Dionisio da Costa (17) no hatama Alito da Cruz (22).

Ekipa rua mantein jogu maibé Nagarjo FC halo esfórsu makas liu hosi taktika ne’ebé iha atu halo impata ba jogu no tenta buka vitóri maibé nafatin ekipa adversáriu hatudu sira nia disipliña no asegura sira nia baliza ho diak.

Atu duni atrazu ne’ebé iha ekipa Nagarjo FC halo tan substituisaun ba jogadór, liu-liu iha liña mediu no avansadu hodi hasai Abrão Mendonça (23) no Rique Alves (11) no hatama Manuel Cristo (13) no Luis Soares (22) atu nune’e bele halo mudansa ba taktik.

Ho substituisaun ne’e Nagarjo FC konsege hatudu jogu no kuaze domina bola maibé nafatin falla iha marka golu.

Tama ba minutu 87 Nagarjo FC kontinua halo substituisaun hodi hasai José da Costa (18) no hatama Januário Fernandes (19).

Hafóin substituisaun ne’ebé Nagarjo FC halo laiha mudansa ruma iha skor no tama ba minutu 90+1 ekipa Kablaki FC halo substituisaun ikus hodi hasai avansadu Julvito Nascimento (9) no hatama mediu Marcelo Gama (11) atu bele asegura vitóri ne’ebé iha no too tempu primeira parte remata Kablaki FC mantein nia vitóri ho skore 1-0.

Asistente treinadór Nagarjo FC, Nidio Fraga hateten iha jogu kontra Kablaki FC Jogadór sira kuaze joga diak no hetan oportunidade lubuk ida iha primeira parte maibé nia ekipa lauza oportunidade ne’e hodi halo ba golu tba ne’e ami nia ekipa derota.

Iha segunda parte falla iha komunikasaun no defeza sira falla antesipa bola tanba ne’e ekipa adversáriu uza oportunidade hodi marka golu.

“Ho fallansu ne’ebé ami iha sei sai hanesan materia ida no lisaun ida ba ami iha jogu sira tuir mai,” Nidio Fraga hateten.

Treinadór Kablaki FC Carlos Vilar hateten, desde primeiru hamutuk ho ekipa Kablaki FC haree katak Jogadór sira iha uniau hanesan familia no hatene katak ho preparasaun ne’ebé mínimu sei hasoru difikuldade, tanba ne’e sempre aviza ba Jogadór sira atu mantein disipliña iha kada minutu jogu hahú to’o remata.

Treinadór ne’e sempre fó hanoin ba jogadór sira, moris hanesan jogadór tenke iha dedikasaun, esfórsu no korajen ida ne’e mak iha segredu iha futeból tanba maske taktika barak maibé buat tolu dedikasaun, esfórsu no korajen laiha sei la fólin.

Jornalista: Vito Salvadór