Hatutan.com, (17 Marsu 2023), Díli- Klube segunda divizaun Santa Cruz FC manan Kablaki FC ho skor 1-0 hafoin avansadu Luís Figo marka golu úniku iha minutu 79.

Lee Mós : Dezintendimentu, Adi’a Jogu Entre Nagarjo FC Ho Fitun Estudante Lorosa’e FC

Jogu entre ekipa Kablaki FC ho Santa Cruz FC ne’ebé hala’o iha estádiu Munisipál Díli, Sesta (17/3/2023), lao ho kalma. Ekipa ida-idak hatudu sira- nia ritmu  jogu tuir orientasaun táktika ne’ebé treinador sira fó.

Advertisement

Cruz FC manan Kablaki FC ho skor 1-0. Foto/Elio dos Santos da Costa

Santa Cruz FC ne’ebé iha jogu rua antes hetan derrota kontinua jogu ho kalma atu buka vitória no Kablaki FC ne’ebé antes ne’e rekolla ona pontu tolu hosi jogu rua iha esperansa atu rekolla tan pontus balun iha jogu loraik ne’e.

Jogadór ekipa Kablaki FC ho Santa Cruz FC mantein joga kalma no sempre halo kontra atake bá malu, maibé nafatin iha disiplina hodi halo balansu bá jogu tuir ritmu ne’ebé klube ida-idak iha atu bele buka oportunidade halo golu.

Kablaki FC nia jogu iha liña klaran falla, ho nune’e, avansadu sira falla hetan oportunidade bola no obrigadu tenke mai joga hosi klaran mak sa’e. Ho táktika ne’ebé iha halo Santa Cruz FC kontínua halo presaun hodi la fó biban bá Kablaki FC halo golu.

Ekipa rua mantein disiplina no laiha falta grave ruma ne’ebé jogador sira komete bá malu  too jogu primeira parte termina ho skor 0-0 no árbitru João Paulo da Costa ne’ebé diriji jogu ne’e lahasai kartaun kartaun ruma ba jogadór sira.

Tama bá segunda parte, Santa Cruz FC halo kedas substituisaun iha liña klaran no baliza hodi hasai Jogadór Julinho da Costa (17) no baliza Hernanio Tilman (30) hodi hatama avansadu Paul Godinho (19) no baliza Cesar de Jesus (1).

Ho substituisaun ne’e Santa Cruz FC hahú halo mudansa bá táktika hodi halo atake bá Santa Cruz FC maibé bola oportunidade ne’ebé iha sempre falla iha ezekusaun.

Advertisement

Kablaki FC kontinua halo esforsu hodi halo balansu bá ekipa adversáriu hodi halo mós substituisaun bá jogadór iha minutu 55 hodi hasai avansadu Dionísio da Costa (17) ho Jorge Alves (6) no hatama Julvito Nascimento (9) no Silvestre Castro ne’ebéjoga iha pozisaun mediu.

Santa Cruz FC kontinua halo substituisaun hodi hasai avansadu Adriano Pinto (93) no hatama Luis Figo (10) iha minutu 65.

Cruz FC manan Kablaki FC ho skor 1-0. Foto/Elio dos Santos da Costa

Ho prezensa Jogadór Luís Figo (10) nian halo Santa Cruz FC hahú halo atake liuhosi bola as no domina jogu, maibé Kablaki FC nafatin mantein disiplina hodi bele asegura no halo balansu bá jogu ne’ebé iha.

Santa Cruz FC kontinua halo substituisaun iha minutu 73 hodi hasai Diamantino Lopes (8) no hatama Rui Soares (14), entretantu Kablaki FC mós halo substituisaun hodi hasai Jogadór avansadu Alito Soares (22) no hatama Leonito dos Santos (24). Ekipa rua nafatin halo kontra atake ba malu.

Tama bá minutu 79, Santa Cruz FC lidera uluk hafoin Jogadór Luís Figo (10) marka golu. Ho golu ne’e obriga Jogadór Kablaki FC hasae intensidade jogu hodi buka atu halo impata.

Santa Cruz FC kontinua hatudu jogu hodi asegura vitória ne’ebé iha. Kablaki FC nafatin tenta atu halo atake maibé nafatin falla.

Advertisement

Ekipa rua mantein disiplina nune’e laiha Jogadór husi klubu rua mak hetan kartaun to’o tempu segunda parte termina Santa Cruz FC nafatin lidera ho skor 1-0.  

Treinadór Kablaki FC, Carlos Vilar hateten kualidade jogu Kablaki FC nian tun kompara ho jogu rua antes. Ho faillansu ituan ne’ebé iha halo nia ekipa labele halo jogu barak iha liña klaran no defeza inklui mós avansadu sira difísil hetan bola.

“Há’u hatene kablaki iha kualidade atu manan jogu ohin hasoru adversáriu, maibé la konsege implementa iha kampu laran no tenke simu derota. Ida-ne’e mak futebol sempre ekipa ida manan no ida lakon,” Carlos Vilar hateten.

Asistente Treinadór Santa Cruz FC, Arsénio Afonso agradese tamba ekipa Santa Cruz FC  bele rekolla vitória.

“Parabéns bá ami nia Jogadór Santa Cruz FC sira hotu ne’ebé ohin rekolla pontu tolu no ami espera iha jogu sira tuir mai ami sei  nafatin di’ak liután,” Arsénio Afonso tenik.

Advertisement

Jornalista: Vito Salvadór