Hatutan.com, (27 Fevereiru 2023), Díli-Governu liuhosi Ministru Asuntu Kombatente no Libertasaun Nasionál (MAKLN), Júlio Sarmento da Costa “Meta Malik” hateten, Governu hamutuk ho Conselho dos Combatentes da Libertação Nasionál (CCLN) deside pendente validasaun bá dadus veteranu sira ne’ebé rejista iha 2009 ho rajaun, tinan ne’e , tinan polítiku nune’e lakohi polítika na’in sira politiza dadus veteranu iha tempu kampaña Eleisaun Parlamentár, 21 fulan-Maiu 2023.

Lee Mós : Fevereiru, Komisaun Nasionál Verifikasaun Veteranu Halo Validasaun bá Veteranu 90.000

Ministru bá Asuntu Kombatente no Libertasaun Nasionál (MAKLN), Júlio Sarmento ‘Meta-Malik’. Foto/MAKLN.

Dadus veteranu sira ne’ebé rejista iha 2009 verifika hotu ona no tamba Timor-Leste tama daudaun iha tinan polítiku nune’e sei adia validasaun ne’e atu evita ema uza.

MKLN hatún ona despaxu bá CCLN para atu haree no verifika halo didi’ak hodi identifika ho lolos dadus veteranu sira ne’ebé rejista iha 2009 ne’e iha grau 4-7 hira, 8-14 hira nune’e mós 15-19 hira para depois hodi ba taka edital iha suku, maibé CCLN tetu ba tempu no Timor-Leste iha hela tinan polítiku no partidu polítiku sira hahú halo konsolidasaun no balun bele uza fali ida-ne’e bá kampaña polítiku entaun konsellu para tiha no hein Governasaun foun mai maka halo validasaun no prepara edital bá taka iha suku sira.

“Ita evita para atu lori planu no asaun veteranu 2009 nian bá sai kampaña politika iha palku leten,” Ministru Júlio Sarmento “Meta Malik” bá jornalista sira iha Palásiu Governu, Segunda (27/02/2023).

Meta Malik subliña governu nunka promete atu selu veteranu sira ne’ebé rejista iha 2009 iha tinan ida-ne’e. Tamba se kuandu Governu hanoin atu selu iha 2023, orsamentu jerál Estadu ne’ebé aprova iha Parlamentu Nasionál tenke prevee orsamentu iha OJE 2023 tamba orsamentu atu selu veteranu sira 2009 ne’e orsamentu ida boot.

Atu selu veteranu sira ne’ebé rejista iha 2009, dalan uluk liu mak tenke taka lista, liu-liu halo edital para bá taka iha suku sira atu identifika ema rihun hira mak konsideradu bá 4-7, 8-14 no mós 15-19 para depois kalkula orsamentu ne’e hira, tamba ne’e maka hanesan ema hotu hatene ho veteranu 26,000 ne’ebé iha kada tinan gasta orsamentu hamutuk  $88,000,000.00 atu bele selu no se dadus veteranu 2009 mai tan signifika orsamentu bá selu pensaun veteranu bá kada tinan ne’e sei bele sa’e too $200,000,000.00 kada tinan.

“Ha’u atu dehan katak Veteranu ne’ebé rejista iha 2009 tinan ne’e seidauk bele selu tamba seidauk halo validasaun no iha orsamentu 2023 la prevee orsamentu bá pensaun veteranu sira rejistu iha 2009,” Meta Malik hateten.

Tuir dadus ne’ebé CCLN iha, dadus veteranu sira ne’ebé rejista iha 2009 hamutuk iha 120.000 no daudaun ne’e tama iha baze de dadus CCLN nian atu halo validasaun hamutuk 90.000.

Jornalista: Vito Salvadór