Hatutan.com, (28 Marsu 2023), Díli- VIII Governu Konstitusionál ne’ebé lidera hosi Primeiru-Ministru (PM), Tau Matan Ruak, komprometidu antes ona atu halo validasaun bá dadus veteranu sira ne’ebé rejistu iha tinan 2019 iha fulan-Fevereiru 2023. Maibé, derrepente de’it Governu liuhosi Ministériu Asuntu Kombatente no Libertasaun Nasionál (MACLN, sigla portugés) deside seidauk bele publika validasaun naran veteranu sira ne’e tanba razaun evita atu ema politiza tanba Timor-Leste tama daudaun tinan polítika bá eleisaun jerál 2023.

Lee Mós : Governu ho CCLN Pendente Validasaun Dadus Veteranu Sira Ne’ebé Rejista iha 2009

Prezidente Konsellu Kombatente Libertasaun Nasionál (CCLN, sigla portugés), Vidal de Jesus “Reak Leman”, konfirma katak Governu la konsege halo validasaun bá lista naran veteranu ne’ebé rejistu iha tinan 2019 tanba Governu rasik la  prevee orsamentu atu selu veteranu sira-ne’e iha Orsamentu Jerál Estadu (OJE) 2023.  

Advertisement

Prezidente CCLN, Vidal de Jesus “Reak Leman ho nia ekipa CCLN. Foto/Elio dos Santos da Costa

Tuir dadus hosi  CCLN katak veteranu sira ne’ebé rejista iha tinan 2009 hamutuk iha 124.000 no komisaun Nasionál Verifikasaun Veteranu halo ona verifikasaun bá 93.000 no sei hela 30.000 liu mak seidauk verifika no sei halo iha tempu sira tuir mai.

Prezidente CCLN, Vidal de Jesus “Riak Leman” hateten, atu halo verifikasaun bá dadus veteranu presiza responsavel sira nia testemuña tamba sira mak organiza sidadaun sira no sira mak tenke fó dadus loloos bá komisaun verifikasaun atu hatene kona-bá partisipasaun sidadaun sira nian liu-liu ema ne’e halo servisu ho se, liga ho se, haruka sasán bá ai-laran ka lae, haruka hosi ne’ebé no kaixa ida ne’ebé no servisu sira ne’e responsavel sira iha vila laran mak hatene ida ne’e sira mak sei fó sasin.

Nia afirma, Governu komunika ho CCLN  para kansela ka suspende lai atividade verifikasaun no validasaun bá dadus veteranu 2009 hodi hein to’o eleisaun parlamentár remata mak kontinua fali.

Atu halo validasaun ne’e sei akumula estrutura sira hosi munisípiu hotu-hotu, tantu hosi Frente Armada no mós Frente Klandestina nian sei iha oin hotu hodi aprova liu-liu ba responsavel sira klandestina.

“Ha’u hanoin validasaun bá veteranu 2009 atu kontinua iha tinan ida ne’e ka tinan oin mós sei hein Orsamentu Jerál Estadu tinan 2024 nian tamba mezmu agora ita aprova mós laiha orsamentu atu selu tamba iha 2023 Governu la tau osan bá veteranu 2009,”  Vidal de Jesus “Riak Leman” ba jornalista sira iha Palásiu Governu, Tersa (28/03/2023).

Prezidente CCLN ne’e subliña kona-bá dadus veteranu 2009 di’ak liu eleisaun parlamentár remata tiha, forma governu foun no buat sira ne’e hotu mak tau iha orsamentu 2024 no governu no komisaun halo aprovasaun hodi hatene katak hira mak merese simu osan no hira mak la merese.

Advertisement

Kona-bá dadus veteranu pendente sira iha 2003, CCLN sei halo verifikasaun hafoin  konklui verifikasaun bá dadus veteranu ne’ebé  rejista iha 2009. Nune’e, númeru veteranu ne’ebé rejista iha CCLN no simu ona pensaun hosi Estadu hamutuk 27.000-resin.

Lee Mós : Fevereiru, Komisaun Nasionál Verifikasaun Veteranu Halo Validasaun bá Veteranu 90.000

Jornalista: Vito Salvadór

Advertisement