Hatutan.com, (01 Marsu 2023), Díli—Aviaun pasajeiru komersiál Aero Díli nian, Airbus A320, sei to’o iha Timor-Leste iha loron 15 fulan-Marsu 2023, hodi halo inaugurasaun iha Aeroportu Internasionál Prezidente Nicolau Lobato, Díli.

Lee Mós : Prezidente Repúblika Apresia Aviaun Aero Díli Ne’ebé Ho Bandeira TL Semo bá Mundu

Aviaun Aero Díli Airbus A320 iha Aeroportu Internasionál Suvernabhumi, Bangkok-Tailándia. Foto/Espesiál

Iha Kuarta (01/03/2023), aviaun Airbus A320 Aero Díli nian halo test flight iha  Aeroportu Internasionál Suvernabhumi, Bangkok-Tailándia

Test flight ne’e ho objetivu atu teste preparasaun avian Aero Díli ne’ebé tuir schedule sei semo mai Jakarta-Indonézia atu bele pinta no taka stiker sira Aero Díli nian ba aviaun nia isin-lolon.  Nune’e, entre loron 03 ka loron 04 fulan-Marsu ne’e, halo rejistu bandeira RDTL (the registration).

Informasaun ne’ebé Hatutan.com asesu hosi na’in bá empreza Aero Díli, Lourenço de Oliveira, via WhatsApp katak aviaun Airbus A320 aero Díli nian ne’e, daudaun, preparadu ona no tuir ajenda katak iha Segunda, 06 fulan-Marsu 2023, to’o iha Aeroportu Internasionál Soekarno-Hatta, Jakarta, hodi taka stiker sira Aero Díli nian bá aviaun nia lolon no haree servisu ki’ik-oan sira seluk tán.

“Sai hosi Bangkok bá Jakarta, aviaun Aero Díli nian ne’e uza ona bandeira Timor-Leste  no to’o iha Jakarta sei presiza loron balun tán hodi taka stiker Aero Díli nian no pinta uitoan iha aviaun nia lolon no iha loron 15 fulan-Marsu ne’e semo bá Timor hodi halo inaugurasaun,” Lourenço de Oliveira hateten.

Aviaun Aero Dili, Airbus A320. Foto/Espesiál

Kapasidade Airbus A320 ne’ebé Aero Díli iha sei bele tula pasajeiru hamutuk 180, maibé Aero Díli sei halo de’it bá 165 atu bele iha espasu natón bá pasajeiru sira hodi bele halo viajen ho di’ak liu.

Primeiru vou aero Díli sei halo rotasaun bá iha nasaun tolu hanesan Indonézia, Singapura no Austrália iha mós posibilidade atu semo bá nasaun sira ne’ebé selebra ona agreement ho Timor Leste.

Jornalista : Vito Salvadór