Hatutan.com, (22 Marsu 2023), Díli—Hahú hosi fulan Janeiru  to’o Fevereiru 2023, Autoridade Aduaneira kolleta ona reseita aduaneira millaun $16 ba kofre Estadu.

Progressu Konstrusaun iha Portu Tibar.Foto/MF.

Fontes reseitas maioria mai hosi pontu entrada sira hanesan portu, aeroportu, fronteira terrestres Batugade no Salele ho nia kategoria impostu sira hanesan Impóstu Importasaun millaun $5,1; Impóstu Seletivu Konsumu millaun $7,8; Impostu sobre Venda millaun $2,9; Penalidade sira rihun $114,6; Kustu Importasaun ka Esportasaun rihun $13,8; Impóstu Alfândega sira seluk rihun $20,6.

Lee Mós: Janeiru-Outubru, Autoridade Aduaneira Kolleta Reseita Millaun $75,3

“Ho mudansa operasaun hosi Portu Díli ba iha Portu Baía Tibar fasilita lais liután movimentu importasaun no esportasaun sasán,” Hatutan.com sita komunikadu.

Advertisement

Portu foun ne’e inklui ka’is ida ho bersus rua ne’ebé uza hodi redús atrazus iha tempu libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu.

Efisiénsia ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas, ajenda Reforma importante ida ne’ebé mak inísia ona desde tinan 2015 no Oitavu Governu Konstitusionál lideradu hosi Primeiru-Ministru Taur Matan Ruak komprometidu atu kontinua implementa.

Efisiénsia ne’e mós sei ajuda Governu atu kolleta reseitas ho maneira ida ne’ebé justu, lais no transparente hodi ajuda redús país ninia dependénsia ba Fundu Minarai.

Ró kontentór 60 Atraka Iha Portu Tibar Reseita $470.000

Relatóriu mensál hosi Unidade Jestaun Projetu (PMU, sigla Inglés) Portu Baía Tibar, ne’ebé lidera hosi Diretór PMU, Rui Soares relata katak hahú hosi fulan-outubru 2022 to’o iha fulan-fevereiru 2023, Roo kontentór hamutuk 60 mak atraka ona iha Portu Baía Tibar.

Advertisement

Hosi atrakasaun roo kontentór 60 ne’e, rendimentu ba Governu liuhosi tarifas konsedente (taxa navegasaun no taxa atrakasaun) no pagamentu pur tráfegu (royalty tax) durante fulan-lima hamutuk rihun $470.

Komparasaun Kollesaun Reseita Portu Díli-Tibar

Durante fim trimestre hosi Outubru to’o Dezembru 2021, Autoridade Aduaneira kolleta ona reseitas hamutuk millaun $20,4 husi Portu Díli.

Kompara ho operasionalizasaun Portu Baía Tibar ne’ebé hahú iha 30 setembru 2022, durante fim trimestre 2022 hosi Outubru to’o Dezembru, Autoridade Aduaneira arrekada ona reseitas hamutuk millaun $33,4.

Signifika, durante periódu fim trimestre 2021 no 2022 iha aumentu iha kollesaun reseitas mai kofre Estadu kuaze millaun $13.

Advertisement

Progressu Konstrusaun Faze I Atinji 99,8%

Progresu konstrusaun Portu Baía Tibar Faze I to’o iha fim Fevereiru 2023 atinji ona 99,8%. Primeiru investimentu hosi kompaña Bolloré Africa Logistics iha rejiaun Ázia Pasífiku ne’e nia operasionalizasaun bazeia ba Akordu Konsesaun ne’ebé asina ona entre Governu Timor-Leste no konsesionáriu Timor Port, subsidiáriu husi Bolloré Africa Logistics iha loron 3 fulan-juñu 2016 no sasin hosi eis Ministru Planeamentu no Investimentu Estratéjiku, Kay Rala Xanana Gusmão.

“Portu foun no modernu ne’e nu’udár projetu interese públiku ne’ebé lidera hosi Komisaun Interministeriál ho nia membrus atuál mak Ministru Finansas Rui Gomes, Ministru Planu no Ordenamentu, José Maria dos Reis, Ministru Obras Públikas, Abel Pires da Silva no Ministru Transportes no Komunikasoins, José Agustinho da Silva,” Hatutan.com sita komunikadu.

Portu Baía Tibar mai ho modalidade Parseria Públiku-Privada (PPP, sigla Inglés) entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu hosi Bolloré ho millaun $150, hamutuk millaun $280 ba faze inísiu hosi totál investimentu estimativu millaun $500 ba tinan 30.

Jornalista: Rogério Pereira Cárceres

Advertisement