Hatutan.com, (24 Marsu 2023), Díli—Insidende ahi-han mutuk edifísiu Ministériu Administrasaun Estatál (MAE) ne’ebé akumula diresaun ka unidade hamutuk lima iha loron 23 fulan Marsu 2023 oras 23:40, no Polísia Nasionál Timor-Leste (PNTL) foti obrigatóriu traballadór (bada’en) Oecusse Oan na’in-11 bá komandu Munisípiu Díli hodi foti informasaun.

Ahi han-mutuk cobby house iha Ministériu Administrasaun Estatal (MAE) iha Caicoli, iha Kinta (23/03/2023) tuku 23:40 kalan-boot otl. Foto/Elio dos Santos da Costa.

Diresaun lima ne’ebé akumuladu iha edifísiu ne’e mak hanesan, Unidade Assesoria Ténika (UAT), Diresaun Nasionál Organizasaun Urbana (DNOU), Inspesaun Jerál Ministériu Administrasaun Estatál (IJMAE), Diresaun Rekursu Umanu (DRU), Unidade Protokolu KomunikasaunInformasaun Externa (UPKIX).

Lee Mós: Prezidénsia Repúblika Kontinua Assegura Vítima Inséndiu Tasi-Tolu Hodi Hein Apoiu Hosi Governu

Portavós Komandu Jerál PNTL, Superintendente Xefe Polísia, Arnaldo de Araújo informa, kazu insidente inséndiu bá cobby house MAE nian iha Caicoli ne’e akontese iha Kinta (23/03/2023), maizumenus tuku 23:40 kalan-boot otl.

Advertisement

Inséndiu ne’e rezulta sasán ka dokumentu sira MAE nian, barak mak la salva no tenke lakon tanba insidente ne’e mosu ema hotu laiha fatin, inklui seguransa sivíl sira ne’ebé hala’o seguransa iha fatin ne’ebá toba dukur hotu.

“Insidente inséndiu iha MAE nia edifísiu ne’ebé rezulta sasan barak ahi han. Investigasaun foti ona ema na’in sanulu-resin-ida hodi mai halo identifikasaun hodi hatene sira ne’e involve ka la involve. Sidadaun hirak ne’e maioria Oecusse Oan nu’udár bada’en ne’ebé servisu hela iha konstrusaun bá edifisíu foun ida MAE nian, iha duni resintu ministériu ne’e nian iha Caicoli,” Arnaldo de Araújo hateten iha kna’ar fatin Kuartél Jerál, Caicoli, Sesta (24/03/2023).

Agora daudaun Komandu bolu ona sira hodi foti de’it sira-nia deklarasaun, depois mak halo tiha investigasaun foin bele hatene.

Ahi han-mutuk cobby house iha Ministériu Administrasaun Estatal (MAE) iha Caicoli, iha Kinta (23/03/2023) tuku 23:40 kalan-boot otl. Foto/Elio dos Santos da Costa.

Iha identifikasaun ne’e sei buka hatene de’it kona-bá bainhira inséndiu ne’e akontese sira iha ne’ebé, iha momentu ne’ebá sira iha ne’ebé no ida-ne’e servisu investigasaun nian mak bele hatene liu.

La’ós ne’e de’it, PNTL bolu ona mós pessoál seguransa sivíl balun mak bá hato’o ona mós sira-nia deklarasaun bá investigadór sira iha Diresaun Investigasaun Komandu Díli nian.

“Ema sira ne’ebé servisu iha ne’ebá, automatikamente iha momentu ne’ebá tenke foti hodi bele rona sira-nia informasaun, nune’e bele hatene kronolojia loloos kona-bá ahi-han ne’e hosi parte ne’ebé mak uluk,” Arnaldo hateten.

Advertisement

Komandu PNTL fiar katak, iha tempu badak bele iha ona informasaun serteza ruma kona-bá kronolojia loloos hosi kazu insidente inséndiu ne’e.

Orservasaun Hatutan.com iha lokál insidente nota katak, PNTL liuhosi ekipa Forenshika tun direta iha terrenu hodi rekolla evidénsia ruma ne’ebé karik deskonfia nu’udár provas, hodi bele estuda no halo ezaminasaun bá fatin inséndiu, nune’e bele hatene kauza hosi ahi-han ne’e.

Informasaun seluk ne’ebé Hatutan.com rekolla iha terrenu, funsionáriu MAE nian ne’ebé lakohi temi naran informa katak ho inséndiu ne’e halo Ministériu tenke lakon dokumentu importante lubuk ida, inklui funsionáriu balun ne’ebé rai hela sira-ninia diploma iha cobby house ne’e mós labele salva, tanba ahi-han mutuk hotu.

Jornalista: Rogério Pereira Cárceres

Advertisement