Hatutan.com, (27 Marsu 2023), Díli-Koligasaun partidária hosi Aliansa Demokrátika (AD) kompostu hosi Partidu Demokrátiku Repúblika Timorense (PDRT) ho Asosiasaun Popular Monarkia Timorense (APMT) no mós partidu   Frente-Mudança (FM) labele ona partisipa iha Eleisaun Parlamentár, 21 fulan-Maiu 2023, tanba lista kandidatura membru Parlamentu Nasionál  ne’ebé sira aprezenta bá iha Tribunál Rekursu (TR) la priénxe rekizitu sira mak hatuur iha lei partidu polítiku no lei eleisaun parlamentár nian.

 Koligasaun AD (PDRT-APMT) ho FM labele partisipa iha eleisaun lejislativa bazeia bá prosesu verifikasaun sira hosi Plenáriu Tribunál Rekursu nian durante loron-10 no rezultadu ida-ne’e anunsiadu iha Sábadu (25/03/2023).

Prezidente Tribunál Rekursu (PTR), Deolindo dos Santos. Foto/Dok.Hatutan.com

Prezidente Tribunál Rekursu (PTR), Deolindo dos Santos, fó razaun katak, iha koligasaun Aliansa Demokrátika  la prienxe rekizitu tanba mós PDRT ninia estatutu nu’udár partidu polítiku lakon tiha ona.

Ho estatutu nu’udár partidu polítiku ne’ebé lakon tiha ona ne’e, laiha ona mós dalan bá PDRT atu envolve aan iha koligasaun partidária sira, inklui labele submete ninia lista kandidatura ho inidividualmente bá TR.  

Bá partidu Frente-Mudança (FM) la bele partisipa iha eleisaun parlamentár 2023 tanba aprezenta fali sira-ninia lista kandidatura rua, maske lei eleisaun parlamentár la autoriza partidu politiku ida, aprezenta ninia lista rua ka tolu. Ho razaun sira ne’e maka Plenária TR nian deside la admite partisipa iha eleisaun tinan ne’e.

“Iha lista tolu maka, Tribunál la admite maka Lista Koligasaun Aliansa Demokrátika (PDRT-APMT), ne’ebé, hanesan ita-boot sira hatene katak, iha koligasaun AD ne’e, Tribunál Rekursu liuhosi desizaun plenária antes ne’e, hatete ona katak, labele forma koligasaun, tanba iha partidu ida perde estatutu tiha ona. Frente-Mudança   tanba lei hatete katak, sei la admite partidu ida atu aprezenta lista kandidatura rua. Entaun, iha lista tolu ne’e maka, Trubunál Rekusu la admite,” PTR Deolindo dos Santos hateten hafoin partisipa iha seremónia aniversáriu PNTL bá dala-23 iha Kuartel UEP, Bairru-Pité, Segunda (27/03/2023).

Iha loron 15 fulan-Marsu 2023, loron ikus bá Tribunál Rekursu simu lista kandidatura hamutuk 19, hosi partidu polítiku 18 mak hanesan, APMT, CNRT, Centro Ação Social Democrata Timorense (CASDT), Frente-Mudança (FM), FRETILIN, Kmanek Haburas Unidade Nasional Timor Oan (KHUNTO), Movimento Populár de Libertação Maubere (MPLM), Partido Democrático (PD), Partido Democrático Cristão (PDC), Partido Desenvolvimento Nacional (PDN), Partido Libertação Popular (PLP), Partido Liberta Povo Ai-leba (PLPA), Partido Republicano (PR), Partido Socialista Timor (PST), Partido Unidade e Desenvolvimento Democrático (PUDD), Partido Os Verdes de Timor (PVT), União Democrática Timorense (UDT), Unidade Nacional Democrática da Resistência Timorense (UNDERTIM), Associação Popular da Mulher de Timor (APMT).

“Hanesan ita-boot sira hatene katak iha Sábadu (25/03/2023) liubá, Tribunál Rekursu, atravez de Plenária Tribunál Rekursu nian, fó desizaun bá lista kandidatura sira ne’ebé aprezenta bá Tribunál Rekursu. Iha lista 17 maka, TR admite atu bele konkore iha eleisaun dia 21 fulan-Maiu 2023 nian. Lista 17 ne’e, mesak lista kandidatu individual de’it. Ida ne’e mak ida admite,” informa PTR, Deolindo dos Santos.

Hatán kona-bá bainhira mak sei dada númeru sorteiu bá partidu polítiku sira, PTR Deolindo dehan, sei haree lai karik iha reklamasaun hosi parte sira, Tribunál sei pronúnsia kona-bá ida-ne’e hafoin mak Tribunál sei hasai lista definitiva hodi marka loron bá sorteiu nian.

Jornalista: Rogério Pereira Cárceres