Hatutan.com, (04 Abril 2023), Dili—Ekipa Diresaun Identidade Úniku (IDÚ) finaliza ona sosializasaun programa Identidade Úniku bá autoridade lokál sira iha Postu Administrativu neen (6) iha munisípiu Lautém, no sira hatene on akona-bá sistema dijitál ne’e hein katak sei implementa no lori benefísiu liuliu asegura dokumentu sira.

Sosializasaun ne’ebé hala’o iha Postu Adminustrivu Lospalos, Loré, Iliomar Tutuala, Lautém no Luro ho objetivu atu fahe informasaun ba autoridade lokál sira kona-bá benefísiu sira bainhira implementa programa ne’e.

Sosializasaun loron dahuluk hala’o iha Postu Administrativu Lospalos iha 22 marsu 2023, loron daruak  hala’o iha Postu Administrativu Loré iha 21 marsu 2023, loron datoluk hala’o iha Postu Administrativu Iliomar 23 marsu 2023, loron dahaat hala’o iha Postu Administrativu Tutuala 24 marsu 2023, iha sosializasaun loron dalimak iha Postu Administrativu Lautém 27 marsu 2023, no ikus liu iha Postu Administrativu Luro iha 28 marsu 2023.

Vise-Minustru Justisa, José Edmundo Caetano konsidera Identidade Úniku hanesan sistema ida ne’ebé importante ba sidadaun hotu, tanba iha nasaun barak daudaun ne’e utiliza ona sistema dijitalizasaun hodi jere dadus sira.

“Ho esforsu hosi TIC TIMOR nian bele mai iha ne’e hodi halo esplikasaun kona-bá programa ne’e ninia benefísiu bá futuru. Tanba ne’e, husu ba autoridade sira atu bele akompaña didi’ak hodi bele hatene kona-á programa ne’e ho ninia implementasaun to’o rejistrasaun iha futuru. Sistema ida-ne’e importante atu asegura ita, maske nasaun sira seluk la’o ona, ita sei la’o neneik, maibé ita la’o nafatin tuir prosesu iha era dijitál,” Hatutan.com sita deklarasaun Vise-Ministru Justisa iha komunikadu.

Diretór Ezekutivu TIC TIMOR, I.P., Roberto Caetano de Sousa Vicente iha abertura sosializasaun ne’e hateten, TIC TIMOR hari’i hosi Governu hodi haree ba sistema no teknolojia iha rai laran, durante ne’e hala’o ona servisu lubuk ida hanesan mós programa IDÚ ne’ebé sei implelementa iha futuru no agora daudaun iha hela faze sosializasaun inklui prosesu konkursu públiku ba sistema dijitál ID Úniku.

“Sosializasaun ne’e atu hatutan informasaun IDÚ ba no esplika benefisiu bá autoridade ho komunidade inklui seitór privadu sira. Tanba ne’e importante ba sidadaun hotu-hotu atu akompaña,” Diretór Ezekutivu TIC Timor hateten.

Nune’e mós, Diretór Diresaun Identidade Úniku-TIC TIMOR, I.P., Florindo Guterres da Costa husu ba autoridade lokál sira atu akompaña didi’ak hodi bele hatene kona-bá lala’ok implementasaun programa IDÚ no ninia benefisiu ba sidadaun sira.

Ho implementasaun programa IDÚ ne’e importante ba sidadaun sira tanba ne’e hala’o atividade sosializasaun hodi fahe informasaun ba autoridade lokál sira hodi kontinua hatutan ba komunidade iha baze.

Ba sosializasaun loron dahuluk, Sekretáriu Munisípiu Lautém, Jacinto da Costa hatete, ema tékniku prontu kontinua servisu, maske polítika bele troka malu. Tanba ne’e husu atu kontinua kuidadu fasilidade sira ne’ebé iha hodi bele halo nafatin komunikasaun ba malu.

Reprezentante Administaradór Postu Loré, Abilio Amaral agradese TIC TIMOR,I.P. ne’ebé disponivel to’o iha Postu Administrativu Loré hodi halo sosializasaun ba programa Identidade Úniku ne’ebé importante no ninia benefísiu ba sidadaun sira, liuliu komunidade iha área rurál.

Durante hala’o sosializasaun iha Postu Administrativu Iliomar, Administradór Jacob dos Reis promete sei hakas-an  hodi fahe informsaun ba malu kona-bá mudansa téknolojia iha rai laran.

Iha sosializasaun loron dahaat, Administradór Postu Tutuala, Albino de Araújo konsidera programa ne’e  importante atu asesgura dadus sira ne’ebé mak sei rekolla hosi sidadaun sira no liu hosi sosializasaun ne’e halo nia hamutuk ho autoridade lokál sira bele hatene ona kona-bá sistema ne’e. Hein katak, iha implementasaun sei lori duni benefísiu atu asegura dokumentu importante sira ho dijitál.

Iha fatin seluk, Administradór Postu Lautém, Zaret Alda da Silva agradese ba ekipa ID Úniku ne’ebé sosializa Programa Identidade Úniku ba autoridade lokál sira iha Postu Administrativu Lautém no hein katak, programa ne’e sei ajuda duni atu asegura dadus importante sira.

Sosializasaun ikus iha Postu Administrativu Luro, Administradór, Augusto Feliciano Ramos Branco  hateten, programa Identidade Úniku importante ba autoridade sira, tanba iha ninia implementasaun ne’ebé sei bele fasilita sidadaun hotu.

TIC TIMOR I.P. establese tuir Decreto Lei nu. 29/2017, ho ninia kompeténsia sira atu implementa estratejia politika Teknolojia Informasaun no Komunikasaun, jere rede Informátika Governu no órgaun Estadu nian, inklui jestaun Infraestrutura TIC nian no fornese suporta TIC.

TIC TIMOR liuhusi Diresaun ID Úniku hahú implementa Programa Identidade Úniku (IDU) ne’ebé sei hala’o rejistrasaun ba sidadaun Timor-Leste, nomos rezidente sira hotu ne’ebé hela iha Timor-Leste.

Ho sistema ID Úniku Governu sei hadi’a atendimentu servisu públiku, hadi’a jestaun no koordenasaun politika sosiál.

ID Úniku hanesan identidade dijitál ida ne’ebé sei uza hodi identifika no auténtika ema, nune’e sei konsiste husi: Númeru ID Úniku (NIU) hó díjitu 10 ka kria aleatoriamente, Informasaun biográfiku hanesan ema nia naran, data moris, no fatin moris,  Informasaun biométriku hanesan finger-print ka liman fuan, imajen Oin ka Facial image no iris ka matan.

Jornalista Estajiáriu : Lazaro Pereira Quefi