Hatutan.com, (25 Abríl 2023), Lautém- Prezidente Partidu Congresso Nacional Reconstrução Timorense (CNRT), Kay Rala Xanana Gusmão, hateten bainhira partidu  CNRT fila bá ukun iha períodu 2023-2028 sei implementa fali polítika Planu Estratéjiku Dezenvolvimentu Nasionál (PEDN).

Lee Mós : CNRT Sei Rezolve Fronteira Terestre Ho Indonézia

Partidu CNRT halo kampaña iha Lautem, Tersa (25/4/2023). Foto/Vito Salvadór

Programa estratéjiku bá tinan 2023-2028 ne’ebé reflete ho Planu Estratéjiku Dezenvolvimentu Nasionál (PEDN) 2011-2030 ne’ebé antes ne’e iha  ona, maibé governasaun atuál deside paraliza dezde  2017.  

Iha PEDN, Xanana hateten, CNRT haree katak reflete ho povu nia situasaun no kobre setór hotu no área tomak ne’ebé presiza atu dezenvolve hodi lori moris ida sustentavel no dignu bá povu.

Durante kampaña aberta partidu CNRT nian iha antigu kampu futebol 745 Lospalos, Tersa (25/4/2023), Kay Rala Xanana Gusmão, hateten Lautém sai hanesan fatin konsentrasaun bá timoroan sira hahú reorganiza funu, povu Lautém halo sakrifísiu barak iha luta bá libertasaun, barak hetan tortura, barak mate, maibé povu Lautém kontinua kaer metin hakarak no vontade bá ukun rasik an to’o 1999.

Lautém oan kontinua mate too madre no padre sira balun mate bá auto determinasaun ne’ebé ikus mai povu hotu hakotu ho pregu iha konsulta popular, 30 Agostu 1999.

Xanana hateten, Lautém oan nia sakrifísiu mak tulun salva no liberta pátria no povu, ohin loron hetan ona libertasaun Estadu tenke kumpri obrigasaun atu rekoñese povu nia sakrifisiu bá luta ida-ne’e, liu hosi dezenvolvimentu nasionál no lori povu ba hetan moris diak.

“Ha’u deve bá rai ida ne’e, ha’u la presija atu sai Primeiru-Ministru, maibé Estadu de Direitu Demokratiku husu responsabilidade ida-ne’e nu’udár Timoroan ha’u sei simu responsabilidade ida-ne’e atu servi povu no kontinua tau interese nasionál bá dezenvolvimentu iha rai-ne’e,” Xanana Gusmão hateten.

CNRT kampaña iha Lospalos, Tersa (25/04/2023). Foto/Vito Salvadór

Xanana Gusmão sublina bainhira povu fó fiar ba CNRT iha eleisaun parlamentár, tinan ida ne’e, hodi bá kaer ukun mak sei kontinua implementa politika Planu Estratéjiku Dezenvolvimentu Nasionál (PEDN) tau prioridade bá edukasaun no saúde, dignifika veteranu, kria kampu servisu ba joven sira, promove diversikasaun ekonómiku, promove investimentu iha seitor privadu, harii industria Petróleu no mos sira seluk.

CNRT sei kontinua ho programa governasaun lokál no aselera implementasaun programa desentralizasaun no poder lokal, no fornesimentu prestasaun servisu públiku ne’ebe lalais no iha kualidade husi autoridade lokal ba povu hodi promove partisipasaun komunidade iha prosesu dezenvolvimentu lokal.

“Ita tenke hahú desentralizasaun para governu mai hela iha ne’e (Lautém) hodi haree bá ita-nia rain no dezenvolvimentu nasionál,” Xanana Gusmão afirma.

CNRT sei tau mos atensaun ba governasaun diak hodi hakbesik prestasaun servisu bá povu, liuhosi dezenvolve kapitál umanu,  hadi’a kualidade no asesu bá ensinu no asegura kualidade servisu saúde primária bá povu tomak iha área rurais no hadi’a prestasaun servisu saúde ospitalar ne’ebe iha kualidade iha areas urbanas munisipais no nasional.

Sekretáriu Jerál Partidu CNRT, Francisco Kalbuadi Lay hateten, ohin lokraik iha Lautém ba imi hotu militante no simpatizante hotu nia prezensa iha komisiu aberta ida ne’e, obrigado no agradese tebe-tebes, iha tinan kotuk CNRT hamutuk ho partidu aliadu lubuk ida, movimentu sira lori Ramos-Horta ba Prezidente Repúblika ba Timoroan tomak no iha momentu ne’eba munisípiu Lautém manan absoluta.

“Ohin ita halo fali servisu bo’ot ida, hotu-hotu tenke Servisu hamutuk atu CNRT tenke manan maiória absoluta nune’e bele hetan Parlamentu ida forte no mos ita tenke hili lideransa ida ne’ebé maka forte hanesan Avô Nana para forma governu nune’e bele servisu ba povu no servi diak liu tan rai ida ne’e.” Hateten Francisco Kalbuadi Lay.

Koordenadór Partidu CNRT Munisípiu Lautém, Albino da Silva promete sei servisu maka’as ho kuadru militante no simpatizante tomak hamutuk ho movimentu no partidu aliadu tomak atu bele lori vitória bá partidu CNRT no lori Kay Rala Xanana Gusmão ba Primeiru-Ministru.

Eleitor iha Munisípiu Lautém ne’ebé Sekretariadu Tékniku Administrasaun Eleitoral (STAE) rejista hamutuk 49.435.

Kampaña partidu CNRT ne’ebé halo iha Munisípiu Lautém ne’e hahú iha tuku 15:00  Otl no hetan seguransa másimu hosi Polísia Nasionál Timor-Leste (PNTL) no hetan mos observasaun direita husi orgaun eleitorál Comissão Nasionál das Eleições (CNE) no observadór nasionál no internasionál ne’ebé iha.

Jornalista: Vito Salvadór