Hatutan.com (14 Abríl 2023), Díli- Maubere Racing Team Timor-Leste organiza tasa Prezidente Drag Bike bá Dame 2023 no partisipa hosi joki (atleta) hamutuk 170 hosi team 46 ne’ebé rejista ih komisaun organizadora.

Hosi totál Racing Team ne’ebé partisipa iha eventu Tasa Prezidente Drag Bike bá dame tinan 2023 ne’e, iha team neen (6) mai husi Indonézia no  40 hanesan team nasional husi Timor-Leste.

Tasa Prezidente Drag Bike bá Dame 2023. Foto/Elio dos Santos da Costa

Tuir lista kompetisaun ne’ebé komisaun organizadora Maubere Racing Team iha, ekipa sira ne’ebé sei kompete iha kompetisaun tasa Prezidente Drag Bike bá Dame ne’e mai hahú hosi klase 110 Cubic Centimeter (CC) metik to’o klase prestíjiu Free for All (FFA) 350 CC.

Xefe Kaza Sivíl Prezidénsia Repúblika, Bendito dos Santos Freitas iha nia intervensaun bá abertura eventu Tasa Prezidente Drag Bike bá Dame iha Kristu Rei, Díli, Sesta (14/04/2023), hateten Prezidente Repúblika José Ramos-Horta hato’o felisitasaun bá inisiativa ne’ebé di’ak tebe-tebes ho joven ne’ebé envolvidu iha atividade motor siklismu iha rain ida ne’e nu’udar fini bá futuru.

Nia dehan, nu’udár estadu, elementu esensiál ida iha kooperasaun entre estadu mak desportu. Desportu hanesan instrumentu importante bá relasaun umana no relasaun fraternidade entre país, entre estadu no entre povu.

Xave  fundamental bá ida-ne’e mak joven sira ne’ebé hamriik iha ne’e balun fundadór sira antigu, sira ne’ebé fó asisténsia liu-liu ba jerasaun foun sira, juventude sira atu bele aprende didi’ak husi parte insiativa espesiál kona-ba motor siklismu ne’e importante tebe-tebes hanesan eventu ida

Timor-Leste nia polítika iha tempu badak, sei hola parte iha nasaun organizasaun rejionál ASEAN nian, no hanoin mós katak eventu barak iha sei organiza portantu ida-ne’e hanesan preparasaun ida bá hotu-hotu atu juventude preparadu to’o tempu ne’ebé kompete iha kompetisaun internasionál sira, hotu-hotu preparadu.

Xefe Kaza Sivíl ne’e hatutan, joven sira mak pilar importante bá dezenvolvimentu nasaun nian, bá dezenvolvimentu Estadu nian no desportu kontribui bá pás ho estabilidade no bá dezenvolvimentu tanba ida ne’e mak apresia tebe-tebes nu’udár Xefe Estadu RDTL.

Prezidente Federasaun Motor Siklismu Timor Leste, Jeca Bento, fó obrigadu ba team Maubere ida ne’ebé agora daudauk loke eventu motor siklismu, fó parabéns ba ekipa team hotu-hotu ne’ebé partisipa iha eventu ida ne’e.

“Ha’u husu ba team hotu-hotu hatudu sportividade atu iha bele hala’o eventu ne’e ho di’ak bele hotu ho susesu,” Jeca Bento hateten.

Bá maluk partisipante sira ne’ebé mai husi Indonézia nia prezensa sai hanesan orgullu ida bá Timor-Leste. Nune’e, Prezidente Federasaun Motor Siklismu ne’e mós agradese ba Prezidénsia Repúblika ne’ebé sai hanesan patrosinadór prinsipál hamutuk empreza nasionál no Timoroan sira seluk ne’ebé tau forsa hamutuk hodi organiza eventu ida ne’e.

Jornalista: Vito Salvadór