Hatutan.com, (14 Abríl 2023), Díli- Jogadór avansadu Porto Taibessi FC, Danilson Araújo sofre kartaun mean. Nune’e, Emanuel FC  aproveita “leet” ne’e hodi “hurulele” Porto Taibessi FC ho skor 5-1.

Lee Mós : Expedito da Conceição Lori As Ponta Leste Manan Porto Taibessi FC 3-0

Jogadór Emanuel FC sira halo selebrasun vitória hafoin “hurlele” Porto Taibessi FC ho skor 5-1. Foto/Elio dos Santos da Costa

Jogadór avansadu Danilson Araújo (16) sofre kartaun mean iha minutu 49. Nune’e,  Porto Taibessi FC ne’ebé joga ho Jogadór na’in-10  tenke sofre tan golu hafoin baliza Juvencio Henrique (1) halo blunder iha nia área grandeal no ikus liu Jogadór Porto Taibessi FC ne’ebé joga iha defeza direita Frederico Sila (19) halo tan auto golu iha minutu 90.

Iha jogu ekipa Porto Taibessi FC no Emanuel FC kuaze hatudu jogu ida atrativu no iha minutu sira dahuluk jogu hahú, ekipa Emanuel FC domina liu jogu kompara ho Porto Taibessi FC.

Emanuel FC ne’ebé maioria joga ho Jogadór lokal no kuaze joga bá selesaun nasionál iha sub -19 hatudu sira-nia ritmu rasik iha jogu ne’e liuhosi joga bola rai no halo pasajen hosi ain bá ain ne’ebé lais no sempre halo kedas presaun bá adversáriu bainhira lakon bola.

Ho tátika ne’ebé iha tama bá minutu tolu dahuluk, Emanuel FC lidera uluk ho skor 1-0 hafoin kapitaun ekipa Juvito Moniz (3) marka golu liuhosi bola kabesada ne’ebé mai husi kantu.

Ekipa Emanuel FC kontinua domina jogu no kuaze halo atake ba adversáriu liuhosi kombinasaun Jogadór sira iha liña klaran no avansadu. Porto Taibessi FC ne’ebé kuaze lakon jogu iha liña klaran koko hadi’a no halo esforsu atu bele iha balansu hodi asegura adversáriu nia atake.

Tama bá minutu 23, Emanuel FC halo substituisaun hodi hasai Jogadór Afonso de Carvalho (2) ne’ebé sofre aleija iha parte ain no hatama Elroy Braz (15).

Porto Taibessi FC kontinua halo esforsu no jogadór sira iha meiu kampu komesa hadi’a komunikasaun no hahú hetan ritmu jogu no iha kampu laran ekipa rua komesa iha balansu bá jogu no Porto Taibessi FC hahú lansa atake bá adversáriu maibé sei falla.

Emanuel FC vs Porto Taibessi FC. Foto/Elio dos Santos da Costa

Tama ba minutu 36, jogadór meiu kampu Emanuel FC Jonatas Pereira (7) sofre tan aleija iha parte ulun hafoin hadau malu bola ho jogadór Porto Taibessi FC, Edencio da Costa (13). Situasaun ne’ebé iha Emanuel hatama Jogadór Fretelino dos Santos (20) hodi hasai Jogadór Jonatas Pereira (7).

Ekipa rua mantein halo jogu ida atrativu hodi anima tebes adeptu sira ne’ebé asiste direta jogu ne’e iha estádiu Munisipál, Díli, Sesta (14/4/2023).

Tama ba minutu 41, jogadór Porto Taibessi FC Danilson Araújo (16) ne’ebé ultrapasa defeza adversáriu iha área grandeal liur konsege uza oportunidade ne’e ho di’ak hodi marka golu ida no muda skor bá 1-1. Tama ba minutu 45, Jogadór Porto Taibessi FC Danilson Araújo (16) simu kartaun kinur hafoin halo falta hasoru Jogadór adversáriu. Ekipa rua mantein empata to’o primeira parte termina.

Tama ba segunda parte, Emanuel FC halo kedas substituisaun bá Jogadór iha liña avansadu hodi hasai Luis Gusmão (17) no hatama Angelito Tilman (8).

Ekipa Porto Taibessi FC hahú halo tranzisaun bá táktika no hahú domina jogu, maibé tama bá minutu 49 jogadór Danilson Araújo (16) obrigadu tenke simu kartaun mean hafoin tebe jogadór adversáriu iha kampu laran.

Ho situasaun ne’ebé iha Porto Taibessi FC obrigadu tenke joga ho Jogadór na’in-10  iha kampu laran.

Maske Emanuel FC domina iha jogadór, maibé ekipa rua nia jogu sei iha balansu no Porto Taibessi FC sei mantein ho ritmu jogu ne’ebé iha hodi buka atu domina jogu no lansa atake ba adversáriu.

Tama ba minutu 57 Jogadór Juvito Moniz (3) marka tan golu ida hodi muda skor ba 2-1 liu husi bola kabesada.

Jogadór meiu kampu Emanuel FC, Zinedine Lopes (6) simu kartaun kinur hafoin kontra regra jogu nian iha kampu laran iha minutu 58.

Tama bá minutu 61 jogadór Emanuel FC, Fretelino dos Santos (20) mós simu kartaun kinur hafoin halo falta hasoru Jogadór adversáriu iha kampu laran.

Porto Taibessi FC hahú halo substituisaun hodi hasai Jardel Piedade (9) no hatama Yohanes Jehaman (10) iha minutu 63.

Porto Taibessi FC joga agresivu liután maibé nafatin falla atu halo golu tamba ho de’it Jogadór na’in-10 iha kampu laran.

Tama bá minutu 66, jogadór avansadu Emanuel FC Edit Savio (10) marka golu ida hodi muda skor bá 3-1 hafoin baliza Porto Taibessi FC Juvencio Henrique (1) halo blunder iha área grandeal laran.

Jogadór ekipa Porto Taibessi FC mantein halo jogu, maibé haree katak Emanuel FC domina liu jogu no iha kada pasajen ne’ebé Jogadór Emanuel FC halo sempre lori ameasa bá Porto Taibessi FC.

Tama bá minutu 69 Porto Taibessi FC halo substituisaun ba baliza Juvencio Henrique (1) no Jogadór meiu kampu Feliz Gama (15) hodi hatama Márcio das Dores (24) no Cláudio Araújo (4).

Ekipa Porto Taibessi FC kontinua halo esforsu no buka oportunidade atu halo golu hodi muda skor iha tabela, maibé falla tamba adversáriu sempre halo presaun no hadau bola bainhira Jogadór Porto Taibessi FC halo atake.

 Tama ba minutu 75 Emanuel FC halo tan substituisaun bá jogadór hodi hasai João de Sousa (22) no hatama Orlando Belo (21) no liu de’it minutu ida Porto Taibessi FC mós kontinua halo substituisaun hodi hasai Herman Bere Asan (11) no hatama Nelvio Almeida (7).

Ekipa Emanuel FC mantein ho ritmu jogu ne’ebé iha no hasae intensidade jogu iha liña ba liña hodi buka atu aumenta tan golu hodi save metin vitória ne’ebé iha.

Tama bá minutu 81 ekipa Porto Taibessi FC halo substituisaun ikus hodi hasai Edencio da Costa (13) no hatama Domingos da Silva (20) no parte ekipa Emanuel FC mos halo substituisaun hodi hasai Zinedine Lopes (6) no hatama Carlos Soares (23).

Emanuel FC liuhosi Jogadór Fretelino dos Santos (20) marka tan golu ida iha minutu 89 hodi muda skor ba 4-1 no liu de’it minutu ida Jogadór Porto Taibessi FC Frederico Sila (19) halo auto golu ida no muda skor ba 5-1. 

Ho auto golu ne’ebé iha lori vitória ba ekipa Emanuel FC no Porto Taibessi FC tenke ho fuan boot simu derrota.

Asisténsia treinadór Emanuel FC, Van Basten hateten ho rezultadu ne’ebé iha hatudu katak lala’ok jogu mak hanesan ne’e, iha ekipa ida manan no ida derrota.

Nia haktuir, iha jogu primeira parte Emanuel FC domina dunik jogu, maibé Porto Taibessi FC mós halo esforsu no konsege halo balansu bá jogu.

“Ho jogadór Porto Taibessi FC ida ne’ebé mak hetan kartaun mean nune’e ha’u ho treinadór prinsipál koko hatama ami nia jogadór sira ne’ebé ho intensidade jogu makas tamba ami hatene katak jogadór Porto Taibessi FC kolen entaun ami ho esforsu bele manan jogu ne’e,” Van Basten hateten.

Asistente treinadór ne’e subliña ho vitória ne’ebé iha hasoru Porto Taibessi FC fó kontente bá ekipa Emanuel FC tamba bele mantein iha primeira divizaun bá époka tuir mai.

Jornalista: Vito Salvadór