Hatutan.com, (20 Abríl 2023), Maubisse-Partidu Asosiasaun Populár Monarkia Timorense (APMT, sigla portugés),  Kinta (20/4/2023), hala’o  kampaña husi uma bá uma (door to door).

Lee Mós : Abertura Kampaña KHUNTO iha Ainaro, Aprezenta Programa Prioridade Tolu

Iha Postu Administrativu Maubisse, Munisípiu Ainaro, hodi fahe sira-nia programa polítika bainhira hetan konfiansa hosi povu atu governa rai ida-ne’e iha períodu 2023-2028.

Molok halo kampaña APMT halo uluk ritu tuir tradisaun Timor nian iha Postu Administrativu Maubisse, Munisípiu Ainaro, 20 Abríl 2023. Foto/Joaquim de Fátima Coutinho

Programa prioridade ne’ebé prezidente APMT, Pedro da Costa Ramalho, ho nia kuadru sira haklaken bá uma-kain sira iha Maubisse mak dezenvolve uma-lisan sira iha territóriu nasionál no halo rasik osan ka moeda Timor nian.

“Se manan iha Eleisaun Parlamentár maka ha’u nia povu tenke hadi’a uma, hadi’a fatin atu tau bá osan ne’e, tamba osan ne’e nia hun maka iha Timor. Tan ne’e, husik Povu maka deside se karik APMT manan ha’u sei la bá tuur iha Governu ka sei laba tuur iha Parlamentu Nasionál, maibé ha’u sei bá Portugál hodi lori mákina prodús ita-nia moeda (osan) rasik, halo ita-nia osan rasik,” Prezidente APMT, Pedro da Costa Ramalho hateten.

Segundu Vise Prezidente APMT, Cécar Agostu, haktuir mós katak Maubisse iha poténsia boot bá setor turizmu, agrikultura, no kultura, tanba ne’e timoroan tenke iha osan rasik atu dezenvolve nia poténsia sira ne’e no lori moris di’ak bá nia povu rasik.

“Kuandu povu Timor fó konfiansa bá APMT liu bareira, programa prioridade ne’ebé ami sei halo primeiru  maka dezenvolve uluk hosi uma-lisan sira, katak ita hadi’a uluk ita-nia knua. Segundu, programa maka hanesan ohin Prezidente temi ona katak, programa prioridade ida maka Osan, terseiru kona-bá turizmu no agrikultura,” Cécar Agostu hateten.

Atividade kampaña APMT bá loron da-ruak nian ne’e iha Maubisse la’o di’ak to’o remata tamba hetan seguransa másimu hosi PNTL Eskuadra Maubisse no hetan supervizaun hosi Ofisial CNE Postu Administrativu Maubisse, Munisípiu Ainaro.

Kontribuidór :  Moises da Silva Magno