Hatutan.com, (26 Abríl 2023), Díli– Primeiru Adjuntu Sekretáriadu Nasionál Partidu Os Verdes de Timor, Aristides da Costa Carvalho Soares, informa katak sira halo ona komunikasaun ho nasaun-10 atu emprega juventude timoroan iha nasaun sira ne’e.

Lee Mós : Partidu Os Verdes Timor Kompromete Kampu Servisu iha Rai-Li’ur bá Joven Sira

Ho komunikasaun efetivu ho nasaun-10 ne’e mak sai hanesan baze forte bá Partidu Os Verdes de Timor hodi submete nia programa prinsipál iha kompromisu eleitorál Os Verdes nian iha kampaña eleisaun parlamentár 2023.

Primeiru Adjuntu Sekretáriadu Nasionál Partidu Os Verdes de Timor, Aristides da Costa Carvalho Soares. Foto/Elio dos Santos da Costa

“Emprégu Verdes juventude dezempregu sira ne’e mak iha kompromísiu eleitorál, ita hatete katak, Verdes kompromísiu atu haruka juventude dezempregu  rihun 50 sai bá nasaun-10 ne’ebé maka Verdes nia aliadu iha ona,” Primeiru Adjuntu Sekretáriadu Nasionál Partidu Os Verdes de Timor, Aristides da Costa Carvalho Soares hateten hodi responde Hatutan.com iha Salaun CNE, Díli, Tersa (25/04/2023).

Nia  dehan, Os Verdes de Timor haruka ona nia embiaxadór bá iha nasaun-10 ne’e atu prepara viza traballu nian, depois kuandu harii ona sentru formasaun Emprégu Os Verdes de Timor iha rai-laran hodi prepara uluk tiha abilidade foin-sa’e sira nian, hafoin bele implementa kooperasaun atu haruka juventude dezempregu rihun 50 bá servisu iha nasaun-10 refere.

Aristides da Costa dehan, kompromísiu eleitorál ida ne’e bá períodu tinan-lima nian. Maibé, juventude dezempregu hamutuk rihun 50 ne’e, Os Verdes de Timor sei haruka bá nasaun 10 mak, hanesan Austrália, Nova Zelandia, Irlándia Repúblika, Irlánda do Norte, Inglaterra, Switzerland, Canada no seluk tán.

“Nasaun-10 ne’e ami kalkula ona atu kada nasaun simu timoroan dezempregu rihun lima iha tinan-lima nia laran fazeadamente. Maibé, ida-ne’e, ita tenke klaru katak, ne’e bá de’it membru Verdes, la’os bá ema hothotu,” Aristides da Costa hateten.

Vizaun bá Estadu

Primeiru Adjuntu Sekretáriadu Nasionál Partidu Os Verdes de Timor, Aristides da Costa,  esplika, kona-bá Os Verdes de Timor nia vizaun bá estadu, ne’e buat ketak ida. Bá ida ne’e Os Verdes de Timor tenke prepara nia kuadru potensial sira no profisionál sira, atu nune’e, bainhira heran fiar hosi povu, sei haruka bá tuur iha Parlamentu no Govern  para atu administra  governasaun ida bele la’o bá oin.

Os Verdes de Timor nia kompromísiu eleitorál ida tán maka, fó bolsa tanba dadaun ne’e, Os Verdes iha ona ninia aliadu Verde Mundial, Global Green, ne’ebé atu fornese tán bolsu estudu rihun-ida bá Timoroan, maibé, liu-liu bá membru sira Os Verdes de Timor nian, atu nune’e bele prepara aan, liuhosi rekursu umanu  hodi lidera  partidu Verdes iha tina-lima  no tinan-10 mai.

Juventude Verdes Timor. Foto/Elio dos Santos da Costa

Verdes mós sei halo Indústria Verdes. Hanesan saida, hakiak ikan, hakiak fahi, hakiak manu, no nia fini sira, oinsá  atu estabelese, maka Verdes família iha territóriu sei hetan subsídiu atu bele estabelese indústria pekuária.

Hatán kona-bá saida mak Os Verdes de Timor garante ona, atu emprega juventude Timoroan rihun 50 iha estranjeiru, Aristides dehan, sira la hamriik mesak. Os Verdes inspira hosi nasaun 142 ne’ebé mak hanaran aan iha Global Green, Os Verdes Mundial.

Aristides hatutan, sira iha irmaun, tanba partidu Os Verdes, la’os iha Timor de’it, iha Austrália, Nova Zelandia, Swisia, Irlándia, no inklui tán nasaun lubun ida tan.

“Tinan kotuk, ami nia prezidente bá koalia ona ho reprezentante sira ne’e. Agora, ami presiza de’it atu hetan lejitimidade ida-ne’e hodi ami implementa ami nia kompromísiu ida-ne’e,” Aristides dehan tán.

Partidu Os Verdes de Timor ne’e dehan, sira iha vizaun rua, luta bá Planeta no luta bá Ema. Luta bá planeta mak oinsá atu proteze natureza sira, foho sira, rai, tasi no proteze Timor-Leste nia ambiente sira, atu nune’e bele iha ambiente ida ne’ebé saudável, fó moris, buras, fó matak bá  no malirin bá Timoroan sira.

Luta bá Ema, katak, ema hothotu iha direitu hanesan, iha oportunidade hanesan,  labele husik ema ida iha kotuk, atu asesu bá edukasaun, saúde, kualker saida de’it. Nune’e, iha Timor-Leste la bele admite klase sosial iha nasaun ida, katak Timor bá Timoroan hotu.

Partidu Os Verdes de Timor iha vizaun rua. Ida, bá partidu ho ninia membru sira rasik, no ida bá estadu. Buat rua ne’e, diferente. Kompromísiu eleitorál ne’ebé maka Verdes hakarak atu halo bá nia membru sira, ne’e ketak, tanba ida ne’e Os Verdes nia responsábilidade.

Aristides esplika, partidu hanesan instrumentu polítika atu kontribui bá dezenvolvimentu. Maibé, hanesan partidu, Os Verdes mós iha devér, oinsá, atu haree nia membru sira. La’ós kada tinan lima bá koalia tiha, depois haluha ona nia militante.

“Maibé, partidu Verdes, lae. Verdes nia kompromísiu eleitorál mak ne’e, programa Emprégu Verdes bá Juventude dezempregu sira. Ne’e, responsábilidade partidu nian. Bá Governu nian,  ita koalia ketak,” Aristides de Carvalho hateten.

Jornalista: Rogério Pereira Cárceres