Hatutan.com, (09 Maiu 2023), Díli—Partidu Congresso Nasionál Reconstrução Timorense (CNRT) komprometidu, bainhira manán iha eleisaun Parlamentár tinan ida-ne’e no ba kaer ukun iha governu, sei tau prioridade ba produtu lokál ne’ebé povu Ermera iha no hadi’a infraestrutura bázika ba fatin sira ne’ebé iha poténsia ba turizmu komunitáriu hodi lori turista barak liután mai vizita munisípiu ne’e.

Partidu Congresso Nasionál Reconstrução Timorense (CNRT), Kay Rala Xanana Gusmão,hala’o kampaña polítika iha Kampu Futeból Nino Konis Santana, Gleno, Tersa (09/05/2023). Foto/Vito Salvadór.

Prezidente Partidu CNRT, Kay Rala Xanana Gusmão hateten, CNRT iha programa ba Industrializasaun no komersializasaun ba seitór produtivu sira hanesan agrikultura, turizmu, manufatura no finanseira.

Lee Mós: FRETILIN Promete Estrada bá Populasaun Rotuto

“Bainhira CNRT manan sei tau prióridade ba dezenvolve produtu lokál ne’ebé munisípiu Ermera iha. Hasa’e produtividade no estabelese zona industriais atu povu Ermera iha rasik indústria ba kafé. Halo sabraka ba jus no produtu seluk ne’ebé munisípiu Ermera iha poténsia atu dezenvolve hodi hadi’a povu nia moris,” Kay Rala Xanana Gusmão hateten durante kampaña aberta ne’ebé hala’o iha Kampu Futeból Nino Konis Santana, Gleno, Tersa (09/05/2023).

Advertisement

Líder másimu Partidu CNRT ne’e, haree katak Ermera mós iha potensialidade bo’ot ba seitór turizmu ho beleza natureza ne’ebé furak no iha bee-mutin ne’ebé bele sai hanesan destinasaun turizmu komunitáriu hodi atrai turista sira vizita munisípiu ne’e.

“Ita tenke aproveita potensialidade hotu-hotu ne’ebé munisípiu Ermera iha no tau importánsia ba turizmu komunitáriu. Ermera iha Bee mutin iha Atsabe, iha Mota Bandeira no potensialidade turístiku sira ne’ebé Ermera iha, ita sei dezenvolve atu hadi’a rendimentu ekonomia ba nasaun no povu,” Xanana Gusmão esplika.

CNRT mak kaer governu tuir mai, sei tau atensaun didi’ak ba seitór potensiál sira ne’ebé munisípiu Ermera iha, hodi haburas empreza mikro, kiik, médiu no kooperativa iha áreas rurais atu fasilita povu bele iha rendimentu rasik ba hadi’a sira nia moris.

Númeru eleitór iha Munisípiu Ermera ne’ebé Sekretariadu Tékniku Administrasaun Eleitorál (STAE) rejista atu partisipa iha eleisaun Parlamentár hamutuk 85.358, mane 43.973 ho 52% no feto  41.385 ho 48%.

Kampaña partidu CNRT ne’ebé halo iha munisípiu Ermera ne’e hetan seguransa másimu hosi Polísia Nasionál Timor-Leste (PNTL) no hetan mós observasaun direta hosi órgaun eleitorál Comissão Nasionál das Eleições (CNE) no Provedoria dos Direitos Humanos e Justisa (PDHJ).

Advertisement

Jornalista: Vito Salvadór