Hatutan.com, (06 Maiu 2023), Ainaro–Prezidente Partidu Os Verdes de Timor (PVT), António “Lela Hunu” Crus promete kampu servisu 5.000 bá juventude Ainaro bainhira hetan fiar hosi povu hodi hola parte iha IX Governu Konstitusionál 2023-2028.

Lee Mós : Partidu Os Verdes Timor Kompromete Kampu Servisu iha Rai-Li’ur bá Joven Sira

Liuhosi kampaña PVT nian hala’o iha Kampu Futebol Ainaro, Sábadu (06/05/2023), prezidente PVT, António Lela Huno” Crus, afirma, bainhira hetan fiar hosi povu bá lidera Governu da-IX prontu liberta joven dezempregu hamutuk 50,000  iha territóriu nasionál liuhusi programa Empregu Verdes.

Partidu Os Verdes de Timor (PVT) halo kampaña iha Munisípiu Ainaro, Sábadu (06/05/2023). Foto/Joaquim Coutinho

“Bá Ainaro-oan sira, kampu servisu 5.000, ne’e-duni ha’u husu bá imi hotu fila bá uma konvense imi-nia família, imi nia inan-aman, fó apoiu votu bá Partidu Verdes,” Lela Hunu Crus hateten.

Prezidente Partidu Os Verdes de Timor (PVT) mós promete  harii Sentru formasaun Profisionál Empregu Verdes hamutuk 50.000 bá membru verde sira. Tanba Verdes hakarak joven sira tenke independente hodi la dependenti nafatin bá inan-aman no sai instrumentu bá ema seluk nia interese.

Os Verdes Timor lori programa Empregu Verde sira  hamutuk 50.000 bá joven dezempregu sira ba ita-boot sira hodi bele hetan Empregu fó han imi nia família,  fó han imi nia fen, fó han imi nia inan-aman.

Bainhira povu fó fiar bá Partidu Os Verdes de Timor (PVT)  hodi ultra pasa bareira eleitorál ho kadeira hitu (7) iha eleisaun Parlamentár, loron 21 fulan-Maiu 2023, maka partidu sei utiliza  Orsamentu Subvensaun Públiku hodi implementa programa sira hanesan mensiona daudaun.

Partidu Os Verdes de Timor (PVT) bá lidera Governasaun da-IX maka iha programa impotente 10 maka sei implementa, hanesan halais desentralizasaun no podér lokál, investe iha setor Edukasaun, Agrikultura, Turizmu, no apoiu projetu tasi-mane.

Atividade kampaña ne’e hetan seguransa másimu husi PNTL Munisípiu Ainaro  no supervizaun  husi observadór nasional no husi brigada CNE Munisípiu Ainaro.

Munisípiu Ainaro kompostu husi Postu Administrativu haat (4), Suku 21, Aldeia 131. Eleitór ne’ebé maka sei partisipa iha Eleisaun Parlamentár, loron 21 fulan-Maiu hamutuk 46.908 ho nia Sentru Votasaun (CV) 90 no Estasaun  Votu (EV) hamutuk 115.

Jornalista       : Moises Magno