Hatutan.com, (05 Maiu 2023), Díli—Prezidente Repúblika (PR), José Ramos-Horta promete sei loke kios ba Quintina Martins Belo no Rosa Marcal Freitas iha Suku Macalaco, Postu Administrativu Quelicai, Munisípiu Baucau.

Prezidente Repúblika (PR), José Ramos-Horta promete sei loke kios ba Quintina Martins Belo no Rosa Marcal Freitas iha Suku Macalaco, Postu Administrativu Quelicai, Munisípiu Baucau. Foto/Média PR.

Objetivu hosi loke kios ne’e tanba Xefe Estadu hakarak tulun fasilita sira bele iha kbi’it rasik hodi kontinua eskola to’o remata universidade no realiza mehi ne’ebé iha.

Lee Mós: Prezidénsia Repúblika Entrega Hikas Oan Ki’ak Na’in-Tolu Bá Autoridade Lokál Mabelis

“Prezidente Repúblika, José Ramos-Horta hasoru-malu ho Quintina Martins Belo no Rosa Marcal Freitas hosi Suku Macalaco, ne’ebé sira nia foto virál iha rede sosiál Facebook iha loron 28 fulan Abril,”  Hatutan.com sita komunikadu, Sesta (05/05/2023).

Xefe Estadu konsege hasoru-malu ho Quintina Martins Belo ho idade 13 no Rosa Marcal Freitas ho idade tinan 10  iha inísiu fulan Maiu no konsidera na’in-rua hanesan labarik ne’ebé badinas buka moris.

Ho situasaun ne’ebé iha, halo ekipa Gabinete Sosiedade Sivíl no Apoiu Sosiál hosi Prezidénsia Repúblika dezloka kedan to’o Quelicai hodi haree sira nia kondisaun moris.

“Sente orgullu tanba ne’e hanesan grasa ida ne’ebé Maromak fó ba ami, tanba bele hasoru-malu ho Xefe Estadu iha Palásiu. Ne’e difísl mai ami maibé tanba Prezidente Repúblika nia laran-luak no domin ba nia bei-oan sira, ikus mai akontese duni,” Reprezentante Inan-aman Virgílio Marçal Freitas espressa.

Quintina Belo kontente hateten Prezidente Repúblika promete atu loke kios hodi apoia nia estudu to’o universidade.

 “Xefe Estadu promote sei ajuda ami loke kios ida hodi ajuda ami ba eskola to’o universidade. Ha’u nia mehi hakarak sai Polísia. Tanbá ne’e ami agardese tebes ba Avô Prezidente,” Quintina Belo hateten.

Prezidénsia Repúblika mós entrega nesesidade bázika ba labarik na’in-rua, identifika sira nia kondisaun moris no haree espasu atu harii kios ba Rosa Marçal no Quintina Belo.

Quintina Martins Belo hanesan estudante klase 7 no Rosa Marçal Freitas klase 8 hosi Ensinu Báziku Filiál Macalaco.

Jornalista: Vito Salvadór