Hatutan.com, (10 Maiu 2023), Dili— Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri, observa katak, povu kontinua halerik ba dezenvolvimentu iha área hotu-hotu maski Governu gasta ona fundu mina-rai billiaun $16 durante tinan 20-resin.

“Liu tiha ona tinan 20-resin, Governu no Estadu gasta ona osan fundu mina-rai ho montante billiaun $16, maibé povu TL sei halerik nafatin,” Marí Alkatiri hateten liuhosi Konferénsia Imprénsa iha Otél Timor, Dili, Kuarta (10/05/2023).

Lee Mós: Xefe Estadu Promulga OJE 2023 Billiaun $2,16

Alkatiri dehan, tuir loloos tempu ona atu halo ballansu, lideransa tomak tenke aseita atu halo ballansu bá saida mak gasta ona, haree rezultadu saida mak hetan ona atu bele hamutuk hateke bá oin.

“Hadi’a buat ne’ebe ita tenke hadi’a, harii ponte mós ita tenke harii. Hametin saida mak ita tenke hametin, haburas saida mak ita tenke haburas no habelar bá TL tomak saida mak ita tenke habelar,” Alkatiri fó-hanoin.

Prezidente bá lideransa Troika FRETILIN ne’e dehan, partidu no lider sé de’it mak atu ukun rai ida-ne’e, tenke iha objetivu ida atu hasai povu hosi mukit, hosi ki’ak, korre povu hosi nakukun.

“Sé de’it mak ukun rai ida ne’e tenke hatene katak, atu povu sai hosi nakukun, tenke iha seriedade kombate pobreza. Atu eradika ki’ak só bele akontese, bainhira ema hotu kombate frontal bá korrupsaun, no bá koluzaun,” nia hateten.

Kampaña eleitorál ne’ebé la’o besik semana tolu ona ne’e, Alkatiri konsidera hanesan festa boot, tanba FRETILIN atu fila hikas bá povu, haree bá abut, hahú hosi suku bá aldeia, bá knua no hahú fila-fali servisu ida kle’an tebes.

Alkatiri fó ona orientasaun katak, kampaña eleitorál tinan-ne’e, la hanesan ho kampaña tinan sira seluk ne’ebé halo ona.

Tanba kampaña eleitorál ida-ne’e, FRETILIN bá hato’o polítika no programa sira kona-bá mudansa nian, atu hadi’a Estadu sai loloos Estadu Direitu Demokrátiku.

Jornalista: Rogério Pereira Cárceres