Hatutan.com, (11 Maiu 2023), Díli—Partidu Kmanek Haburas Unidade Nacional Timor Oan (KHUNTO) lakohi atu povu Timor Leste (TL), kontinua moris iha uma duut, piku ho au tanba ne’e, promete sei kontinua programa Uma Naroman ba Povu (UNP) atu bele oferese uma ho dignu ba povu.

Militante no simpatizante hulan Prezidente Partidu Kmanek Haburas Unidade Nacional Timor Oan (KHUNTO) Armanda Berta dos Santos ho líder Supremu partidu KHUNTO, José dos Santos “Naimori Bucar” iha Komísiu da-sanulu resin-walu, iha Kampu Futeból Gleno, Munisípiu Ermera, Kuarta (10/05/2023). Foto/KHUNTO.

Kompromissu polítika ne’e hato’o hosi Prezidente Partidu KHUNTO, Armanda Berta dos Santos iha Komísiu da-sanulu resin-walu, iha Kampu Futeból Gleno, Munisípiu Ermera, Kuarta (10/05/2023).

Lee Mós: APMT Hakarak Diversifika Ekonomia no Halakon Dezempregu

“KHUNTO lakohi nia povu hela nafatin iha uma duut ho piku no au. Ami hamriik iha ne’e tán imi. Ami kompromete atu oinsá bele hela iha fatin dignu,” Armanda Berta dos Santos, hateten.

Bainhira kontinua hetan fiar hodi kaer ukun, KHUNTO sei implementa nafatin subsídiu $200 ba povu Timor-Leste iha fim-do-anu no fó subsídiu ba inan isin-rua hodi hadi’a nutrisaun ba inan ho bebé.

Alende ida ne’e, iha mós programa seluk tán ne’ebé KHUNTO nia Governantes hotu atu implementa hodi serví povu ida-ne’e ba moris di’ak.

Iha fatin hanesan, líder Supremu partidu KHUNTO, José dos Santos “Naimori Bucar” hateten KHUNTO hamriik hodi hametin paz no unidade ba joven sira, nune’e timor-oan sira labele estraga malu ba beibeik, tanba joven sira mak futuru nasaun ida-ne’e nian.

“Joven sira mak futuru nasaun nian, tanba ne’e KHUNTO hamrik atu joven hotu-hotu hamutuk iha pas no hametin estabilidade,” José dos Santos Naimori Bucar hateten.

Koordenadór KHUNTO Munisípiu Ermera, Horacio Borges hateten, partidu KHUNTO nia votus hamutuk 4.750 iha eleisaun Prezidensiál tinan 2022.

Militante no simpatizante sira ne’ebé rejistra hodi tuir Kampaña iha loron ohin, hamutuk na’in 6.600 no ida-ne’e seidauk sura ho sira ne’ebé iha hela toos laran no hala’o hela atividades seluk iha Munisípiu seluk.

Iha Eleisaun Parlamentár iha tinan 2017, Partidu KHUNTO hetan votus 36.547. Maibé wainhira KHUNTO kandidata nia Prezindente, Armanda Berta dos Santos hodi kompete iha Eleisaun Prezidensiál iha tinan 2022, KHUNTO nia kandidatu hetan votus hamutuk 56.690.

Kampaña aberta partidu KHUNTO ne’e hetan seguransa máximu hosi Polísia Nasionál Timor-Leste (PNTL), no observa direta hosi órgaun eleitorál Comissão Nasionál das Eleições (CNE) no Provedoria dos Direitos Humanos e Justiça (PDHJ).

Jornalista: Vito Salvadór