Hatutan.com, (11 Maiu 2023), Díli—Partidu Congresso Nasionál Reconstrução Timorense (CNRT), iha planu prioridade atu dezenvolve munisípiu Bobonaro iha área infraestrutura bázika, bainhira hetan fiar hosi povu atu ukun iha Governu tuir mai.

Povu Maliana espressa sira nia aspirasaun liu hosi hakerek iha kaixa, husu ba Prezidente Partidu CNRT, Kay Rala Xanana Gusmão bainhira ukun karik tau-matan bá problema estrada iha postu administrativu sira iha munisípiu Bobonaro, Kinta (11/05/2023). Foto/CNRT.

Prezidente Partidu CNRT, Kay Rala Xanana Gusmão hateten, sei hadi’a infraestrutura bázika liu-liu estrada ligasaun munisípiu Bobonaro bá postu administrative sira, atu povu bele hala’o atividade no movimentasaun ho di’ak no lais.

Lee Mós: KHUNTO Lakohi Povu Hela Nafatin Iha Uma Duut Ho Piku

“Programa CNRT nian tau prioridade ba iha seitór infraestrutura. Sei rehabilita no konstrui estrada no ponte nasionál, munisipál no rurál hodi promove partisipasaun komunidade iha prossesu dezenvolvimentu lokál no iha assesibilidade di’ak ba edukasaun, saúde no merkadu hodi lori produtu ba merkadu no kontribui ba hadi’a rendimentu ekonomia komunidade nian,” Kay Rala Xanana Gusmão hateten iha Kampaña aberta ne’ebé hala’o iha Kampu Futeból Maliana, Kinta (11/05/2023).

Advertisement

CNRT observa katak, estrada hosi ponte Nunura mai to’o iha Maliana-Villa no hosi Maliana ba Postu Administrativu Bobonaro, Cailaco no Lolotoe kuaze la di’ak, tanba ne’e sei tau liu prioridade ba estrada ne’ebé temi.

CNRT iha vizaun no programa atu hadi’a povu nia moris, tanba ne’e bainhira manán hodi ba kaer ukun sei tau prioridade ba hadi’a infraestrutura bázika iha munisípiu ba to’o Postu administrativu no suku sira atu bele hatan ba povu nia nesesidade.

Kay Rala Xanana Gusmão mós deklara katak, bainhira CNRT manan, nia mak sei assume kargu hanesan Primeiru Ministru iha Governu tuir mai.

CNRT sei asegura fornesimentu eletrisidade ne’ebé seguru, efisiente no barratu ba ema hotu. Assegura assesu ba bee-moós, saneamentu, barájen no irrigasaun ba ema hotu, implementa ordenamentu territóriu no abitasaun dignu ba povu.

CNRT mós sei tau-matan ba Ferik no katuas, ema ho defisiénsia no veteranu sira hanesan prioridade atu sira bele goza ukun an ne’ebé sira ho mate, terus no sofrimento oin-oin manán.

Advertisement

Partidu CNRT hanesan partidu polítiku ne’ebé iha vizaun no misaun atu servi povu no nasaun Timor-Leste, tan ne’e iha mós kompromisu atu gasta osan povu nian iha fundu petrolíféru ho kuidadu no sei iha transparensia no akontabilidade atu bele benefisia povu no lori povu ba prosperidade.

Númeru eleitór iha Munisípiu Bobonaro ne’ebé mak Sekretariadu Tékniku Administrasaun Eleitorál (STAE) rejista atu partisipa iha eleisaun Parlamentár 2023 hamutuk 72.537, mane 37.335 ho 51% no feto 35.202 ho 49%.

Kampaña partidu CNRT ne’ebé hala’o iha munisípiu Bobonaro ne’e hetan seguransa másimu hosi Polísia Nasionál Timor-Leste (PNTL) no hetan mós observasaun direta hosi órgaun eleitorál Comissão Nasionál das Eleições (CNE) no Provedoria dos Direitos Humanos e Justiça (PDHJ).

Jornalista: Vito Salvadór

Advertisement