Hatutan.com, (11 Maiu 2023), Díli—Komandu Polísia Nasionál Timor-Leste (PNTL) munisípiu Díli, prepara ona planu operasaun nian, sei hatuun rekursu hotu-hotu, hodi asegura Partidu Polítiku (Parpol) sira-nia kampaña eleitorál ikus nian iha kapitál Díli.

Membru PNTL hosi Unidade Espesiál Polísia (UEP). Foto/Dok.Hatutan.com

Komandante PNTL Munisipiu Díli, Superintendente Xefe Polísia Natércia Eufásia Martins Soares hateten, Komandu Jerál fó konfiansa bá komandu Dili atu jere seguransa bá apoia partidu polítiku sira ne’ebé mak halo kampaña, liu-liu partidu polítiku boot sira.

Lee Mós: FONGTIL Husu Partidu Polítiku Sira Promove Unidade Nasionál Iha Kampaña

“Hahú dia 12 to’o 18 Maiu. Ita halo ona planu no prontu ona. Lokraik, ita halo enkontru ho Komandu Jerál, sei halo aprezentasaun ida kona-bá forsa hira mak ita hatuun. Ida-ne’e mak estratejia komandu ninian la presiza publika iha ne’e. Maibé, ita sei mobiliza forsa hotu-hotu atu tuun bá iha terrenu,” Komandante Natércia Eufásia Martins Soares hateten iha Postu Administrativu Verra Crus, Dili, Kinta (11/05/2023).

Komandante Natércia mós relata katak, iha semana kotuk, durante kampaña Partidu Unidade Dezenvolvimentu Demokrátiku (PUDD) iha Dili, Polísia halo apreensaun bá motorizada 60-resin.

Motorizada sira ne’e polísia halo apreensaun tanba kontra regra tránzitu, kódigu estrada. Iha infratór balun rezolve ona, balun seidauk, motorizada sira balun laiha dokumentus, ne’e sei para iha komandu Caicoli.

Iha loron tuir mai, Polísia preende mós motorizada balun hosi partidu konkorrente partidu Os Verdes de Timor no Polísia sei halo ida-ne’e kontinua bá partidu sira seluk, durante sira-ninia kampaña eleitorál ikus iha Dili.

“Lei no regra ita aplika bá ema hotu-hotu. Operasaun ida-ne’e sei halo to’o bainhira sidadaun Timor liu-liu ema sira ne’ebé uza estrada Dili nian bele iha konsiénsia atu kumpri regras,” Komandante Natercia afirma.

Tuir oráriu kampaña eleisaun Parlamentár tinan 2023 nian ne’ebé órgaun eleitorál Comissão Nacional de Eleições (CNE) fó sai ona katak, partidu sira ne’ebé atu hala’o sira-ninia kampaña ikus iha Dili mak hanesan, Partidu Demokrátiku (PD) iha (18/05/2023) tuku 09:00 to’o 18:00, tipu kampaña, enkontru.

Partidu Kmanek Haburas Unidade Nasionál Timor Oan (KHUNTO), sei realiza iha loron (12/05/2023) tuku 14:00 to’o 17:00, fatin Tasi-tolu, halo komísiu. Partidu Libertasaun Populár (PLP) iha (17/05/2023) tuku 14:00 to’o 18:30, iha Tasi-tolu.

Partidu Congresso Nacional de Reconstrucção Timorense (CNRT), sei konklui ninia kampaña komísiu iha loron (18/05/2023), tuku 14:00 to’o 18:00, lorokraik, iha Tasi-tolu.

Partidu FRETILIN, sei akontese mós iha Dili, maibé kona-bá loron, oras no fatin seidauk konfirma. Maske nune’e iha (16/05/2023), tuku 10:00 to’o 14:00, FRETILIN sei hala’o diálogu iha Suku Santa Cruz, Postu Administrativu Na’in-Feto, Munisipiu Dili.

Jornalista: Rogério Pereira Cárceres