Hatutan.com, (12 Maiu 2023), Díli—Sekretariadu Tékniku Administrasaun Eleitorál (STAE) husu Timor Oan sira ne’ebé durante ne’e mai buka moris, servisu no eskola iha kapitál Dili maibé kartaun eleitorál munisípiu, tenke fila bá vota iha ninia munisipiu oríjen tanba eleisaun Parlamentár tinan ne’e laiha sentru votasaun paralelu.

“Eleisaun ida-ne’e, tanba ita falta tán de’it semana ida, entaun husu bá eleitór sira ne’ebé mak hela iha Dili, atu informa katak, bá eleisaun Parlamentár ida-ne’e sei laiha tán sentru votasaun paralelu,” Diretór Jerál STAE, Acilino Manuel Branco hateten hafoin serimónia distribuisaun materiál sensitivu ho naun-sensitivu iha edifísiu STAE, Caicoli, Sesta (12/05/2023).

Lee Mós: CI Sei Haruka Karta Bá STAE-CNE Fasilita Jornalista Vota Móvel

Diretór Acilino fiar katak, eleitór sira ne’ebé tinan 2022 vota iha eleisaun Prezidensiál, atualiza ona sira-nia kartaun, bainhira sira hakarak vota de’it iha Dili.

Maibé, sé eleitór sira ne’e mak la atualiza sira-nia kartaun eleitaral, karik sira hanoin katak atu kontinua vota iha Dili, tanba sentru votasaun paralelu, dala-ida tán, iha oportunidade ne’e Diretór Acilino Manuel Branco hato’o katak, iha loron 21 fulan-maiu sei la eziste sentru votasaun paralelu iha Dili.

“Husu bá eleitór sira ne’ebé utiliza hela kartaun hosi Munisipiu, inklui Ataúro no RAEOA favór boot ida, bele organiza aan, atu loron rua ka loron tolu ka loron ida antes bá loron votasaun, tenke fila bá ida-idak ninia munisipiu,” Acilino Branco husu.

Votasaun Ambulante

Acilino informa tán katak, bá pasiente sira ne’ebé mak moras, hosi munisipiu mai halo tratamentu saúde iha Hospitál Nacional Guido Valadares (HNGV), husu responsável ospitál atu submete lista pasiente sira nian ne’ebé sei baixa hela.

Diretór Jerál STAE ne’e dehan, bá pasiente baixa hela iha Ospitál, iha situasaun rua. Iha eleisaun Prezidensial, pasiente sira ne’ebé mak mai hosi munisipiu, halo tratamentu maibé, rekomendasaun hosi doutór sira katak, nia hela lai iha uma, atu hetan akompañamentu ruma hosi doutór. Ida ne’e mós, uluk, lei fó dalan nune’e nia bele submete bá vota, liuhosi sentru votasaun paralelu.

Maibé, iha eleisaun Parlamentár tinan ida-ne’e sei laiha tán sentru votasaun paralelu, lori mós akomoda eleitór sira balun, karik hosi munisipiu mai halo tratamentu iha Dili maka rekomendasaun doutór dehan tenke hela lai iha Dili, hodi halo akompañametu lai bá ninia kondisaun saúde.

Sé nia uza hela kartaun eleitór munisipiu ninian, STAE husu dala-ida tán katak sei la atende nia iha loron votasaun, tanba laiha sentru votasaun paralelu iha kapitál Dili.

Agora, bá eleitór sira ne’ebé mak hosi kapitál Dili rasik, nomós hosi munisipiu ka hosi Rejiaun Administrativa Espesial Oecusse Ambeno(RAEOA), mak mai hala’o tratamentu iha HNGV ne’ebé mak tuir doutór sira haree katak, nia tenke internatu ka baixa, maka sira bele iha direitu atu vota de’it iha Ospitál.

“Maibé, tuir Lei sira-nia naran, tenke haruka bá STAE, tarde liu to’o horiseik Kinta (11/05/2-2023). Ne’e, la’ós bá de’it HNGV, maibé, Lei fó dalan atu aplika mós bá iha ospitál referál sira seluk. Hanesan Covalima, Bobonaro, Oecusse, Ainaro, Maubisse, nomós ospitál referál Baucau,” diretór Acilino informa tán.

Maske nune’e, iha lista ne’ebé STAE simu ona hosi Ospitál referál balun hanesan Covalima ninian, tuir Lei katak, aplika votasaun ambulante ka votasaun iha Ospitál sira, kuandu iha pasiente.

Maibé, saida mak STAE simu lista hosi Ospitál referral Covalima ninian, katak estudante estajiáriu sira mak barak loos no laiha pasiente.

“Ne’e labele. Entaun, ami komunika ona liuhosi diretór STAE Covalima nian atu informa hikas bá iha responsável ospitál Covalima, atu informa tutan estudante sira bele fila bá ida-idak ninia munisipiu orijen, lori vota tuir ida-idak ninia unidade jeográfika,” Acilino Branco esplika.

PNTL ho F-FDTL

La’ós ne’e de’it, kona-bá Votasaun Ambulante ida ne’e, iha eleisaun Parlamentár tinan ne’e, STAE kontinua uza hodi fasilita sidadaun ka prizioneriu sira ne’ebé mak oras-ne’e kumpri sentensa iha prizaun tolu, Becora, Gleno no Covalima, inklui guarda prizionál sira.

Bá membru Polisia Nasionál Timor-Leste (PNTL) ho FALINTIL Forsa Defeza Timor-Leste (F-FDTL), sira ne’e bele vota lívre iha fatin ka sentru votasaun hirak ne’ebé hala’o seguransa bá.

Enkuantu, bá jornalista sira, diretór Acilino dehan STAE fasilita de’it mak jornalista sira hosi média estatál rua mak hanesan, Ajénsia Tatoli, I.P no Rádiu no Televizaun Timor-Leste, Empréza Públika (RTTL,E.P), maibé bá jornalista hosi média priváda sira, bele fila vota iha ida-idak ninia munisipiu oríjen.

Jornalista: Rogério Pereira Cárceres