Hatutan.com, (16 Maiu 2023), Díli-Partidu Kmanek Haburas Unidade Nasionál Timor Oan (KHUNTO) liuhosi ekipa jurídiku partidu nian, Tersa (16/5/2023), hale’u tuku 11.30 Otl, hatama ona keixa bá Ministériu Públiku (MP) ka Prokuradória Jerál Repúblika (PGR-sigla portugés) hasoru partidu Congresso Nacional Reconstrucção de Timorense (CNRT).

Lee Mós : Polémika Sidadaun Estranjeira Na’in-Rua Hetan Kartaun Eleitorál, STAE Presiza Keixa Legál

Lider supremu Partidu KHUNTO, Jose dos Santos Naimori  Bucar. Foto/Elio dos Santos da Costa

Partidu ne’ebé lidera hosi José dos Santos “Naimori Bucar” ho Armanda Berta dos Santos ne’e loke prosesu legal kontra partidu ne’ebé lidera hosi Kay Rala Xanana Gusmão  tanba sente ofendidu  ho informasaun partidu CNRT lansa dehan KHUNTO nia ema sira mak fasilita  kartaun eleitorál bá sidadaun estranjeira na’in-rua hosi Atambua-Indonézia.

Ekipa jurídiku partidu KHUNTO nian ne’ebé hatama keixa bá Prokuradoria Distritál Díli ne’e mak hanesan Arnaldo da Costa Lopes, Agostinho de Jesus no Isamael Assunção Lopes .

Advertisement

Iha Kinta,  11 fulan-Maiu 2023, partidu CNRT realiza kampaña eleitorál ho tipu komísiu iha Maliana Villa, iha ne’ebá sidadaun estranjeira na’in-rua hosi Atambua-Indonézia, sa’e mós bá palku kampaña nian hodi ‘kesar’ bá prezidente partidu CNRT, Kay Rala Xanana Gusmão, no deklara publikamente katak, sira asesa mós bá kartaun eleitorál Timor-Leste nian tanba fasilita hosi KHUNTO nia ema balu atu bele mai Timor hodi vota partidu KHUNTO iha eleisaun parlamentár, 21 fulan-Maiu 2023.

“Ohin dadeer ida ne’e, ami hosi jurista partidu KHUNTO, mai hato’o keixa ida kontra kuadrus hosi partidu CNRT, ne’ebé maka iha loron 11 fulan-Maiu 2023, komísiu kampaña iha Maliana, ita-nia inisial feton na’in-rua ne’ebé mak mai hosi Indonézia, deklara katak, partidu KHUNTO maka fasilita no emite sira-nia passaporte para depois sira mai iha ne’e. Tanba ne’e maka, ami deskorda, no liu-liu iha mídia, sira espalla informasaun, ami mai hatama keixa ne’e, kontra sira,” reprezentante ekipa jurista KHUNTO nian, Arnaldo da Costa Lopes hateten bá jornalista sira iha Matadouro, Díli.

Arnaldo da Costa Lopes hatutan, keixa ne’ebé sira hatama kontra kuadru CNRT, tanba iha espalla no imputa bá partidu KHUNTO katak, sira maka fasilita no emite passaporte bá ema sidadaun Indonézia na’in-rua.

Maske kompeténsia bá ida ne’e, órgaun  eleitorál Sekretariádu Tékniku bá Administrasaun Eleitorál (STAE) ho órgaun kompetente sira seluk de’it mak mak bele emite iha notariadu.

Hatán kona-bá, karik KHUNTO hanoin hela atu keixa mós sidadaun Indonézia feto na’in-rua ne’e, tanba konsege temi partidu KHUNTO nian naran publikamente, iha komísiu CNRT nian iha Maliana Villa, Munisipiu Bobonaro, jurista Arnaldo dehan, ida ne’e Ministériu Públiku mak iha liu kompeténsia para depois instala prosesu ne’e bá sidadaun  estranjeiru nain-rua ne’e.

Advertisement

Kona-bá evidénsia, jurista hosi KHUNTO ne’e hateten, sira iha ona vidénsia. Ida mak, ema barak maka asesa ona iha iha mídia sosiál  iha dokumentu sira. Ida ne’e evidénsia ne’ebé mak konkretu.

Jornalista: Rogério Pereira Cárceres