Hatutan.com, (28 Abríl 2023), Díli- Partidu Desenvolvimento Nacional (PDN) iha programa prioritáriu hamutuk 11 ne’ebé sei implementa hodi hadi’a povu nia moris bainhira hetan fiar husi povu hodi bá Governa rai ida-ne’e iha períodu 2023-2028.

Lee Mós : KHUNTO Promete Hadi’a Infraestrutura Bázika Atu Povu Moris ho Dignu

Prezidente PDN, Lucas Soares Colibere. Foto/Vito Salvadór

Programa prioritáriu 11 ne’ebé PDN iha sei kobre área prinsipál sira hanesan Agrikultura no Peska, Saúde, Edukasaun, Turizmu, Infraestrutura, Dezenvolvimentu Rural, Juventude, Kultura, Setor Privadu, Habitasaun Umana no Servidor Estadu ne’ebé kobre área seguransa, defeza no funsionáriu públiku.

Prezidente Partidu PDN, Lucas Soares Colibere hateten, PDN hanesan partidu polítiku ne’ebé mai ho vizaun sosiedade ida Demokrátika, lei ordem, no prosperidade. Misaun PDN nian mak atu Defende Estadu Direitu Demokrátiku, defende Lei no Ordem, justisa bá ema hotu no harii sistema Dezenvolvimentu Ekonómiku ida reziliente no sustentavel ba ema hotu.

PDN mós iha nia prinsípiu mak fiar ba Nai Maromak no Lisan Timor nian no kompromete aan hodi defende Soberania Estadu Timor-Leste nian, hodi halo konsolidasaun ba Estadu Direitu Demokrátiku tuir Konstituisaun Repúblika Demokrátika Timor-Leste.

PDN  defende metin justisa ida ne’ebé imparsiál no independente, nune’e sidadaun sira hotu laiha diskriminasaun no mós sujeita bá Lei.

Nia afirma, PDN nia programa prioritáriu 11 ne’ebé iha hatuur iha ne’e nu’udár programa prioridade bá povu tamba povu nia prioridade mak dezenvolvimentu  nasionál no dezenvolvimentu ida ne’ebé multi dimensional katak setór xave bá ema moris.

Programa prioritáriu ne’ebé PDN hatuur, tau setór Agrikultura no Peska iha leten tamba setór ida-ne’e presiza iha atensaun másimu husi PDN hodi hadi’a povu nia moris tamba maioria populasaun iha Timor-Leste moris ho vida agrikultór.

“Kuandu povu fó konfiansa, joven sira fo konfiansa, ferik no katuas sira fó konfiansa bá PDN maka orsamentu jerál estadu bá setór agrikultura boot liu setór sira seluk tamba setór ne’ebé fó moris bá ema mak setór agrikultura ne’ebé kobre Horticultura, Pekuária, Peska no industria agríkola sira tamba ne’e mak PDN konsidera setór Agrikultura no Peska sai prioridade primadoma bá Timoroan tomak.” Prezidente PDN, Lucas Soares Colibere bá Hatutan.com iha sede PDN Vila Verde, Sesta (28/04/2023).

Prezidente PDN, Lucas Soares Colibere. Foto/Vito Salvadór

Prezidente PDN hatutan ho investimentu iha setór agrikultura no peska bele hasae rendimentu populasaun nian ne’ebé sei kontribui bá hamenus kiak, hasae nutrisaun no halo redusaun bá má-nutrisaun ne’ebé sai problema b’ot iha Timor-Leste bá tinan sira ikus ne’e.

PDN mós kontinua tau prioridade bá setór Saúde liuhosi melloramentu kualidade atendimentu bá ema hotu liuliu iha área remotas ho efikásia, lais no responsabilidade. Halo mós melloramentu bá fasilidade no ekipamentu saúde inklui ai-moruk, melloramentu bá laboratóriu nasionál saúde.

Iha setór edukasaun, PDN sei tau atensaun liuliu bá melloramentu manorin na’in, dezenvolvimentu siénsia no teknolojia, no mellora kualidade eskola tékniku vokasionál sira hodi responde bá kampu servisu.

Iha setór turizmu sei tau atensaun ba iha ekoturizmu, turizmu relijiozu no turismo komunitáriu sira hodi hasae reseita doméstika Timor-Leste nian.

 Iha setór infraestrutura PDN iha hanoin atu kontinua kompleta estrada no ponte nasionál sira, mellora estrada  no ponte sira iha área rurais no remotas liu atu bele hafasil povu asesu ba fasilidade públiku sira, hanesan saúde, edukasaun merkadu no seluk tan.

PDN mós iha prioridade bá dezenvolvimentu rurál iha ne’ebé sei desentraliza kualidade atendimentu bá too área remotas, hodi asegura grupu vulneráveis sira-nia partisipasaun.

Iha área setór privadu, PDN sei halo melloramentu ba empreza mediu no ki’ik sira, kria kampu servisu atu hasae produtividade nasionál no oportunidade ba ema hotu.

Iha Habitasaun Umana, PDN sei investe iha uma ne’ebé adekuadu ba populasaun ho kréditu hodi reduz expansaun habitasaun dezorganizadu, mellora bee-moos, no mellora mós asesu bá eletrisidade.

Iha prioridade ikus liu mak servidor estadu ne’ebé kobre área seguransa, defeza no funsionáriu, hadi’a fasilidade ne’ebé adekuadu no dignu bá forsa no polísia, hasae funsionamentu funsionál bá seguransa, defeza no funsionáriu no ikus liu mak hasae saláriu.

Prezidente PDN, Lucas Soares Colibere, hatete PDN moris atu luta hamutuk ho povu bá dezenvolvimentu nasionál, tamba ne’e PDN komprometidu sei garante partisipasaun ativa povu Timor-Leste nian iha prosesu dezenvolvimentu nasionál hahú husi baze.

Iha fatin hanesan I Vise-Sekretáriu jerál PDN, João Freitas de Câmara, hateten bainhira povu fó konfiansa bá PDN sei halo esforsu tomak atu liberta povu husi kiak ba moris di’ak.

Nia afirma, PDN iha programa prioritáriu bá povu nia moris di’ak, iha ne’ebé konsentra ba setór hotu-hotu atu lori mudansa no dezenvolvimentu bá povu nia moris.

“Se povu fó konfiansa ba PDN sei servisu hamutuk ho Prezidente Repúblika no aliadu polítiku sira hotu atu hasai povu husi susar laran, terus no mukit ba moris di’ak liu husi dezenvolve nasionál,” João Freitas de Câmara hateten.

Planu Estratéjiku Dezenvolvimentu Nasionál ne’ebé Timor-Leste iha oras ne’e paradu, tamba ne’e bainhira povu fó fiar bá PDN sei kontinua hikas atu bele lori dezenvolvimentu bá povu.

Jornalista: Vito Salvadór