Hatutan.com, (24 Maiu 2023), Díli—Polísia Nasionál Timor-Leste (PNTL) liuhosi Departamentu Investigasaun Kriminál (DIK), iha kuarta 24 Maiu identifika ona sidadaun na’in-tolu ne’ebé deskonfia halo gravasaun audiu “voice record” hodi ‘ameasa’ militante no apoiante hosi partidu polítiku balun.

Komandante Departamentu Investigasaun Kriminál (DIK), Superintendente Xefe Polísia, Jorge Monteiro ho ekipa hala’o konferénsia imprensa iha Kuartél Jerál PNTL, Caicoli, Kinta (04/05/2023). Foto/PNTL.

Gravasaun audio ne’e, lider Partidu Politiku sira ne’e halo no espalla iha média sosiál, hafoin rona no haree rezultadu provizóriu Eleisaun Parlamentár tinan ne’e nian, ne’ebé fó-sai hosi Sekretariadu Tékniku Administrasaun Eleitorál (STAE), hatudu katak, sira-nia partidu lakon no votu la to’o atu atinje barreira 4%.

Lee Mós: Rezultadu Final STAE: CNRT Hetan Kadeira 31 no FRETILIN Kadeira 19

Komandante Departamentu Investigasaun Kriminál, Superintendente Xefe Polísia Jorge Monteiro hateten, informasaun, mensajen, voice recorder ne’ebé atualmente sirkula iha públiku, relasiona ho atividade Estadu ninian, eleisaun Parlamentár ne’ebé Povu Timor-Leste, foin liu daudaun.

Advertisement

“Voice recorder ne’ebé ke atualmente sirkula iha média sosiál ne’e PNTL bolu ona pessoál na’in-rua ka na’in-tolu hodi halo identifikasaun,” Superintendente Xefe Polísia Jorge Monteiro hateten liuhosi konferénsia imprensa iha Kuartél Jerál PNTL, Caicoli, Dili, Kuarta (24/05/2023).

Sidadaun sira ne’e, oras ne’e iha ona ekipa Investigasaun Kriminál Nasionál nia liman, halo hela identifikasaun. 

Polísia mós halo komparasaun kona-bá voice recorder ne’ebé mak sirkula iha média sosiál ho sira-ninia lian atuál.

“Ne’ebé, komparasaun ne’e ita sempre halo, no prosesu identifikasaun ne’e, polisia halo hela dadaun. Karik iha indisius krime ruma, klaru ita sei rejista iha Ministériu Públiku,” Komandante Jorge Monteiro esplika.

Gravasaun voice ‘ameasa’ ida ne’e, PNTL deskonfia lansa hosi apoiante no militante sira hosi partidu polítiku balun, no konsege tranzmite iha média sosiál sira. Maibé, atualmente, gravasaun audiu sira ne’e, la’ós ida de’it.

Advertisement

Polísia detekta gravasaun audio sira ne’e kuaze hosi pessoál sira ne’ebé mak diferente, nomós hosi apoiante partidu ne’ebé diferente inkui voice no mensajen ne’ebé mak diferente.

“Sé ita haree iha voice balu ne’e, sira trata, sira insulta, sira ameasa ema ou lideransa, ho individualmente. Sé ita haree iha voice balu, ne’e sira halo voice ne’e, sira hato’o sira-nia lamentasaun bá iha partidu polítiku sira ne’ebé sira afilia bá, tanba iha promesa sira ne’ebé sira-nia lider hato’o,” Jorge Monteiro esplika.

Iha gravasaun audiu (voice) balun mak iha relasiona ho lian kultura ninian, tradisaun grupu artes marsiais sira, ka grupu arte rituais sira liga ho eleisaun Parlamentár tinan ne’e nian.

“Maibé, atualmente, polísia halo hela identifikasaun bá iha pesoal sira ne’ebé ke grava voice recording ida ne’e, hodi tranzmite bá iha públiku, depois de ita halo identifikasaun, ita sei determina prosesu nia kontinuasaun ne’e, bá iha ministériu públiku, karik iha indísius kríme ruma,” Komandante Jorge Monteiro hateten. 

Kona-bá identidade inisiál hosi sidadaun na’in-tolu ne’e, komandante Jorge Monteiro dehan, seidauk bele fó-sai bá públiku, tanba sei iha prosesu identifikasaun nia laran.

Advertisement

Jornalista: Rogério Pereira Cárceres