Hatutan.com, (29 Maiu 2023), Díli—Parlamentu Nasionál (PN), iha Segunda 29 Maiu aprova no ratifika ona akordu servisu Aéreo nian entre Governu Timor-Leste, Nova Zelándia ho Qatar.

Plenária PN, Segunda (29/05/2023). Foto/Média PN.

Rezultadu votasaun bá propósta rezolusaun númeru 30/V (5a), kona-bá akordu servisu sira aéreo nian ho Governu TL no mós Nova Zelándia, pasa ho votus afavór 44, kontra 0, no abstensaun 0.

Lee Mós: Ramos-Horta ho Primeira Ministra Nova Zelándia  Diskute Asuntu Pás Mundiál

Nune’e mós propósta rezolusaun númeru 31/V (5a), kona-bá akordu servisu sira aéreo nian ho Governu TL ho Qatar, pasa ho votus afavór 44, kontra 0, no abstensaun 0.

Propósta rezolusaun rua ne’e aprezenta hosi Ministra Negósiu Estranjeiru no Kooperasaun (MNEK), Adalzija dos Reis Magno ho Ministru Transportes no Komunikasaun (MTK), José Agostinho da Silva.   

“Rezultadu votasaun, afavór 44, kontra 0, abstesaun 0. Nune’e, akordu servisus aéreos entre TFimor-Leste ho governu Nova Zelándia ratifikadu, 2222. Nune’e mós propósta de rezolusaun númeru 31/V (5a), aprovadu. Passa no akordu servisus aéreo entre Timor-Leste ho Estadu Qatar mós aprovadu,” Prezidente Parlamentu Nasionál (PPN), Aniceto Longuinhos Guterres deklara rezultadu votasaun iha Plenária PN, Segunda (29/05/2023).

Aniceto Guterres hateten, akordu ka tratadu sira sé Parlamentu la introdús alterasaun iha ne’e, opsaun ne’e rua de’it. Ratifika ka la ratifika. Tanba, sé iha alterasaun ne’e la’ós PN mak halo maibé Governu mak tenke bá hamutuk ho ninia kontra-partida (Governu Nova Zelándia ho Estadu Qatar) atu halo negosiasaun, ka liuhosi negosiasaun mak sira bele altera.

“Entaun, desizaun polítika iha ne’e, ratifika ka la ratifika. Ho esplikasaun sira ne’e hotu, komentárius, observasoens hothotu ne’e ita rona hotu ona,” nia hateten.

Iha biban hanesan, Ministra Negósiu Estranjeiru no Kooperasaun (MNEK), Adalzija dos Reis Magno dehan, Governu tenta atu aprova akordu sira ne’e, molok konklui TL nia konstrusaun bá Aeroportu Internasionál Nicolau Lobato.

Pontu importante ida katak, tanba TL iha ona prosesu adezaun sai membru Association of South East Asean Nation(ASEAN) no tuir roteiru ne’ebé membru organizasaun ASEAN sira partilla ho TL, sira husu katak iha tinan 5 ka 6 mai ne’e TL tenke prepara infra-estrutura barak.

“Kuandu ita-nia aeroportu prontu, ema barak mai reuniaun iha ita-nia rain, entaun ita mós tenke iha akordu aero ho Paízes barak nune’e mós bele loke dalan konektividade nomós halo fásil ema atu mai iha Timor,” Ministra Adilzija hateten.

Jornalista: Rogério Pereira Cárceres