Connect with us
Pakote Ahi

Polítika

Povu Fó Fiar Bá CNRT Tanba Hakarak Mudansa

Published

on

Hatutan.com, (30 Maiu 2023), Díli- Sekretáriu Jerál Partidu Congresso Nasionál Reconstrução Timorense (CNRT), Francisco Kalbuadi Lay, hateten rezultadu eleisaun parlamentár, 21 fulan-Maiu 2023, hatudu povu nia deseju bá mudansa tamba ne’e CNRT hakruuk bá desizaun ne’ebé povu fó no komprometidu atu serbí povu no kontinua esforsu bá dezenvolvimentu nasionál.

Lee Mós : 01 Juñu, CNE Submete Rezultadu Apuramentu Nasionál bá Tribunál Halo Validasaun

Sekretáriu Jerál Partidu CNRT, Francisco Kalbuadi Lay, haktuir Partidu CNRT ho nia prezidente Kay Rala Xanana Gusmão hakarak hato’o parabéns bá órgaun eleitorál sira hanesan Sekretariadu Tékniku Administrasaun Eleitorál (STAE) no Comissão Nasionál das Eleições (CNE), bá líder komunitáriu sira, observadór nasionál no internasionál, Autoridade Seguransa no Defeza, Konfisoins Relijiozu, lider igreja Katólika iha Timor-Leste no espesiál liu bá povu Timor-Leste ba susesu iha eleisaun parlamentár 2023.

Advertisement

Sekretáriu Jerál Partidu CNRT, Francisco Kalbuadi Lay. Foto/Elio dos Santos da Costa

Partidu CNRT hakruuk ho respeita bá desizaun ne’ebé povu fó liu husi eleisaun parlamentár ne’ebé liu tiha ona. Tamba ne’e, Francisco Kalbuai Lay hateten, Partidu CNRT sei la haluha sakrifisiu no domin ne’ebé povu tomak fó, hodi hili CNRT hanesan partidu mais votadu iha eleisaun parlamentár, tinan ida-ne’e.

“Apresia bá militante no simpatizante inklui apoiante sira nia domin bá partidu CNRT no avô Xanana Gusmão ne’ebé hatudu dezde kampaña too iha eleisaun. Bá militante no simpatizante sira hotu no povu doben Timor-Leste, imi hotu nia esforsu, ami sei hanai no hakruuk, hodi tane imi nia konfiansa ne’e,” Francisco Kalbuadi Lay bá jornalista sira iha konferénsia ba imprensa ne’ebé hala’o iha sede partidu CNRT, Bairo dos Grilhos, Díli, Tersa (30/05/2023).

Sekretáriu Jerál Partidu CNRT ne’e hatutan, povu fó ona fiar mai iha partidu CNRT no fiar ida-ne’e la’ós ki’ik, tamba hosi kadeira 21 iha eleisaun parlamentár 2017 sa’e bá kadeira 31 iha eleisaun tinan ne’e, ida ne’e hatudu povu nia vontade no konfiansa polítika bá partidu CNRT boot no povu iha mós espetativa atu partidu CNRT bele halo mudansa bá rai no povu ida-ne’e.

“Vitória ne’ebé partidu CNRT iha, la’ós vitória militante no simpatizante CNRT nian de’it, maibé vitória povu nian tamba ne’e CNRT komprometidu atu serbí povu tomak tuir kompromisu polítiku ne’ebé iha atu povu hotu hetan moris di’ak,”  Francisco Kalbuadi Lay tenik.

CNRT La Halo reklamasaun

Partidu CNRT ne’ebé sai hanesan partidu mais votadu iha eleisaun parlamentár 2023,  sei la halo reklamasaun bá desizaun hosi orgaun eleitorál tamba la hetan akta inisial ka akta modelu C husi CNE.

Advertisement

Reprezentante parte legal partidu CNRT, Carmelita Moniz hateten, partidu CNRT iha tabulasaun rasik ne’ebé mai husi servisu fiskais partidu nian liuhosi halibur akta sira husi sentru votasaun tomak. Hafoin halo análize partidu CNRT nota katak mosu irregularidade balun, ne’ebé ke hamosu diferensa de votu ne’ebé atribui bá partidu politiku sira iha sentru votasaun balun iha territóriu nasionál.

Ho ida ne’e, partidu CNRT tenke halo konfirmasaun ho akta inisial ka akta husi sentru votasaun ne’ebé CNRT iha ne’ebé bolu akta modelu C, ne’ebé fiskais sira simu iha sentru votasaun sira, hodi halo konfirmasaun ho akta modelu C ne’ebé STAE foti hodi tau bá akta modelu B hodi hatama bá iha sistema tabulasaun no CNRT husu bá CNE atribui akta sira ne’e hodi halo análize hodi haree Diskrepánsia maibé CNE fó de’it akta B no la fó akta C ne’ebé fiskais sira simu hodi entrega bá partidu iha tabulasaun nasionál.

Konférensia imprensa partidu CNRT, Tersa (30/05/2023). Foto/Elio dos Santos da Costa

“Ita hanoin katak tuir prosesu tomak, lolos CNRT iha direitu tomak atu halo reklamasaun, maibé antes halo reklamasaun ita tenke halo konfirmasaun entre akta rua ne’e, ida-ne’ebé mak sai nu’udár akta auténtiku, no infelizmente ami labele hetan akta modelu C husi CNE, tamba molok halo reklamasaun ami tenke halo uluk lai konfirmasaun akta C husi CNE no partidu CNRT nian no ami la hetan tamba ne’e infelizmente ami la halo reklamasaun hodi ezije ami nia direitu,” Carmelita Moniz hateten.

Portavós Partidu CNRT bá eleisaun parlamentár, Tomas do Rosário Cabral hateten, rezultadu provizóriu hosi órgaun eleitorál Comissão Nasionál das Eleições sai tiha ona no sei haruka bá Tribunál Rekursu atu haree prosesu ne’e no sei halo validasaun tuir lei haruka.

Nia afirma, iha servisu órgaun eleitorál sira nian CNE la iha difikuldade tamba iha ema ne’ebé sufisiente bá to’o iha kraik no STAE mak iha fallansu tékniku balun, liu-liu iha inísiu abertura bá prosesu eleisaun iha ne’ebé kontroladór bá tinta la konsege halo nia kna’ar ho diak, too dalan klaran boletín  votu la too, no kontajen de votu, akta brigada no fiskais sira la hetan, ate rekonsiliasaun akta no tabulasaun iha munisípiu sira no nasionál la konsege sai iha televizaun, no ne’e hatudu STAE la preparadu ba eleisaun parlamentár tinan ida ne’e.

“Eleisaun Prezidensiál buat hotu la’o di’ak, tambasá iha eleisaun lejizlativa mosu fali kestaun sira ne’e, tamba ne’e hanesan partidu polítiku ami iha deskonfia bá servisu STAE nian no sei iha investigasaun kle’an bá STAE para sira bele hadi’a, no bele buka tambasá mak tabulasaun no rekonsiliasaun bá akta sira maibé laiha, ema ruma, liu-liu Ministériu relevante tenke asume responsabilidade,” Tomás do Rosário Cabral hateten.

Advertisement

Vise Prezidente Partidu CNRT ne’e subliña, partidu CNRT sei la halo rekursu bá desizaun ne’ebé órgaun Eleitorál sira fó sai, maibé CNRT sei buka atu hatu’ur buat hotu tuir nia dalan no sei iha investigasaun profunda para bele hatene problema nia hun loloos iha ne’ebé.

Jornalista: Vito Salvadór

 

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

Presiza Konstrui Fatin Própriu Atu Fasilita Fornesimentu Kombustível iha Sentrál Elétrika Hera-Betano

Published

on

Hatutan.com, (26 Marsu 24), Díli—Deklarasaun politíka bankada KHUNTO iha Parlamentu Nasionál (PN),  rekomenda bá Governu katak, presiza duni atu investe hodi konstrui fatin própriu bá fornesimentu kombustível iha Sentrál Elétrika Hera no Betano.

(more…)

Kontinua Le'e

Polítika

Deklarasaun Polítika Bankada FRETILIN: Tanbasá TL Seidauk Bele Manan Greater Sunrise

Published

on

Hatutan.com, (25 Marsu 2024), Díli– Bankada Parlamentár FRETILIN, Segunda (25/03/2024), halo deklarasaun polítika iha plenária Parlamentu Nasionál hodi aprezenta sira-nia duvida no kestiona projetu Greater Sunrise ne’ebé to’o ohin loron seidauk iha finalidade.

(more…)

Kontinua Le'e

Polítika

20-21 Abríl, Kongresu Nasionál Partidu KHUNTO Bá Da-III

Published

on

Hatutan.com, (21 Marsu 2024), Díli- Partidu Kmanek Haburas Unidade Nasionál Timoroan (KHUNTO) iha loron 20 to’o loron 21 fulan-Abríl, tinan ne’e, sei realiza kongresu nasionál bá da-III hodi halo reestruturasaun no prepara estratéjika polítika partidu hodi enfrenta dezafiu sira iha futuru.

(more…)

Kontinua Le'e

Trending