Hatutan.com, (01 Juñu 2023), Díli-Komisaun Nasionál bá Eleisaun (CNE, sigla portugés), Kinta (01/6/2023), hale’u tuku 11:00 Otl, remete rezultadu provizóriu apuramentu nasionál nian bá Supremu Tribunál Justisa (STJ) ka Tribunál Rekursu.
Lee Mós : 01 Juñu, CNE Submete Rezultadu Apuramentu Nasionál bá Tribunál Halo Validasaun
Prezidente CNE, José Agostinho da Costa Belo ho akipa remete rezultadu provizoriu apuramentu nasionál bá Supremu Tribunál Justisa ka Tribunál Rekursu, Kinta (01/06/2023). Foto/Elio dos Santos da Costa
“Ohin, CNE lori rezultadu provizóriu apuramentu nasionál mai iha Tribunál Rekursu, hatudu katak servisu CNE hotu ona, tamba laiha reklamasaun ka rekursu ruma. Tamba ne’e, dokumentu hotu CNE remete bá Tribunál Rekursu hodi halo análize no deklara sai rezultadu no halo validasaun nasionál,” Prezidente CNE, José Agostinho da Costa Belo informa bá jornalista hafoin ho ekipa CNE remete dokumentu rezultadu provizóriu apuramentu nasionál bá Tribunal Rekursu iha Edisifiu Tribunál Rekursu, Caicoli, Díli.
José Belo konsidera tempu legál liu tiha ona, no laiha rekursu, servisu hotu-hotu la’o di’ak, limpu, transparente no partidu polítiku sira hotu simu rezultadu ida-ne’e, maibé tuir lei tenke liu hosi Tribunál Rekursu para halo validasaun.
Prazu bá Supremu Tribunál Justisa (STJ) ka Tribunál Rekursu atu halo verifikasaun no validasaun bá rezultadu eleisaun parlamentár iha oras 72 nia laran no bele lais liu depende bá servisu Tribunál Rekursu nian.
Tuir kalendáriu apuramentu rezultadu eleitorál tinan 2023 katak Supremu Tribunál Justisa ka Tribunál Rekursu iha loron lima nia laran, hosi loron CNE remete rezultadu provizóriu eleisaun parlamentár nian ne’e to’o loron 6 fulan-Juñu ne’e, atu halo análize no halo verifikasaun bá rezultadu provizóriu ne’e molok loron 07 fulan-Juñu, Tribunál anúnsiu rezultadu final no publika iha Jornál da Repúblika (entrada em vigor).
Tuir mós kalendáriu apuramentu rezultadu eleitorál ne’e katak iha loron 09 ka loron 12 fulan-Juñu 2023, inísiu mandatu Deputadu sira iha Parlamentu Nasionál ka posse bá Deputadu no ninia kompozisaun meza Parlamentár nian.
Hosi loron 12 to’o loron 15 fulan-Juñu, eleisaun bá kompozisaun meza Parlamentu Nasionál. Nune’e, iha loron 19 fulan-Juñu 2023, kontínua ho tomada posse bá IX Governu Konstitusionál.
Rezultadu Provizóriu Apuramentu Nasionál
Prezidente CNE, José Agostinho da Costa Belo ho akipa remete rezultadu provizoriu apuramentu nasionál bá Supremu Tribunál Justisa ka Tribunál Rekursu, Kinta (01/06/2023). Foto/Elio dos Santos da Costa
Hosi rezultadu provizóriu apuramentu nasionál ne’ebé CNE publika no eleitór sira atribui votu bá kada partidu sira iha eleisaun parlamentár, 21 fulan-Maiu 2023, mak hanesan tuir mai ne’e;
Partidu Dezenvolvimentu Nasionál (PDN) hetan votu 597 (0,1%), Partidu Libertasaun Povu Aileba (PLPA) hetan votu 3.272 (0,5%), Partidu Libertasaun Popular (PLP) hetan votu 40.720 (5,9%), Partidu Demokratiku (PD) hetan votu 64.517 (9,3%), partidu KHUNTO hetan votu 52.031 (7,5%), Partidu os Verdes de Timor (PVT) hetan votu 25.106 (3,6%), partidu Uniaun Demokratiku Timorense (UDT) hetan votu 1.256 (0,2%), Partidu Unidade Dezenvolvimentu Demokratiku (PUDD) hetan votu 21.647 (3,1%), Partidu Republikanu (PR) hetan votu 1.558 (0,2%), partidu UNDERTIM hetan votu 1.023 (0,1%), partidu FRETILIN hetan 178.338 (25,8%), partidu CNRT hetan votu 288.289 (41,6%), partidu Sentru Asosiasaun Sosiál Demokrátiku Timorense (CASDT) hetan votu 3.170 (0,5%), partidu Movimentu Libertasaun Povu Maubere (MPLM) hetan votu 642 (0,1%), Partidu Sosialista de Timor (PST) hetan votu 2.415 (0,3%), Partidu Demokratiku Krisaun (PDC) hetan votu 1.261 (0,2%), no partidu Asosiasaun Popular Monarkia Timorense (APMT) hetan votu 6.678 (1,0%).
Hosi partidu 17 ne’ebé konkorre iha eleisaun parlamentár tinan ne’e, partidu neen (6) de’it mak liu barreira 4%, hodi hetan asentu Parlamentár iha Paralementu Nasionál (PN) mak hanesan CNRT hetan votu 288.289 (kadeira 31), FRETILIN hetan votu 178.338 (kadeira 19), PD hetan votu 64.517 (kadeira 6), KHUNTO hetan votu 52.031 (kadeira 5) no PLP hetan votu 40.720 (kadeira 4).
Jornalista : Vito Salvadór