Hatutan.com, (21 Juñu 2023), Díli—Iha Missa Funeráriu ne’ebé hala’o iha Igreja Parókia Balide, Arsebispu Arkedioseze Metropolitana Díli, Dom Virgílio Cardeal do Carmo da Silva hateten, ema hotu-hotu merese agradese ba Dona Isabel da Costa Ferreira, ba di’ak tomak, tanba nia laran di’ak no buat karan ida ne’ebé di’ak liu hotu nia oferese iha nia moris tomak.

Arsebispu Arkedioseze Metropolitana Díli, Dom Virgílio Cardeal do Carmo da Silva prezide Missa Funeráriu bá Mate-isin Dona Isabel da Costa Ferreira, iha Igreja Parókia Balide, Kuarta (21/06/2023). Foto/Elio dos Santos da Costa.

Dona Isabel Ferreira koko ona moris tuir Maromak nia vontade iha nia peregrinasaun moris iha mundu ne’e to’o husik hela família no ema hotu ne’ebé sei presiza nia tulun, domin no asaun karitativa.

Lee Mós:Isabel da Costa Ferreira Husik-iis Tanba Sofre Kankru

“Ba ida ne’ebé moris tuir Maromak nia hakarak, nia manan moris rohan la’ek. Ema di’ak sira klamar iha Maromak futar liman. Ita la moris ba ita nia an rasik, no ita ida mós la mate ba ita an rasik, basa ita moris ba Nai no ita mate karik mós mate ba Nai,” Dom Virgílio Cardeal do Carmo da Silva, hateten.

Laran metin ba Maromak futar lia fuan, liu-liu iha esperansa ba moris ida Maromak nian. Hanesan Santu sira dehan, ema nia moris ne’e temporál de’it.

“Dona Isabel Ferreira nia mate la’os lakon ida ba família de’it, maibé povu tomak iha Timor-Leste sente ida ne’e. Ita haree iha loron hirak ne’e ema rihun ba rihun ne’ebé tama sai rezidénsia Metiaut atu hakbesik ba nia kaixaun hodi dehan netik obrigadu,” Arsebispu subliña.

Dona Isabel Ferreira ema ida ne’ebé moris ho perseveransa, sempre prontu ba família no ema hotu ne’ebé presiza nia tulun, hadomi ema ki’ak no kbi’it la’ek sira hodi defende ema nia direitu, esperansa Kristaun mak baze ba nia moris, maski tempu badak nia kumpri didi’ak nia misaun to’o rohan.

Durante iha serimónia funerál ne’ebé hala’o iha Semitériu públiku Becusse, Prezidente Repúblika (PR) José Ramos-Horta hato’o profunda pezar ba falesimentu saudoza Dona Isabel Ferreira, hanesan Timor-Leste lakon ativista bo’ot ida ba direitu umanu.

Prezidente Repúblika hato’o nia sentimentu pezar ne’e liu hosi karta Profundu Votu de Pezar númeru 5/2023, ne’ebé lee hosi adjunta Xefe Casa Civil, Heriqueta da Silva iha Semiteriu Públiku Becusse, Kuarta (21/06/2023).

Prezidente Repúblika hato’o nia sentimentu triste ne’ebé kle‘an tebes ba Dona Isabel Ferreira, inan no kaben ne’ebé mate iha loron 18 fulan Juñu tinan 2023.

Isabel da Costa Ferreira, hanesan Jurista, ativista direitus umanus, ne’ebé luta ba autodeterminasaun no independénsia, membru Governu, membru Komisaun Verdade no Amizade, promotór ba pás no rekonsiliasaun ne’ebé defende igualdade jéneru, direitu feto, inan no labarik sira nian, ho nesesidade espesiál.

“Prezidente Repúblika hato’o nia sentidas kondolénsias ne’ebé kle‘an ba espoza Primeiru-Ministru, Taur Matan Ruak, oan-feto no oan mane ba membru familia hotu ne’ebé iha lutu metan no terus,” Heriqueta da Silva lee karta ne’e.

lsabel Ferreira sei hela nafatin hanesan lembransa no lisaun inspiradora ne‘ebé fó valór ba dignidade, onestidade no espíritu dignidade ne’ebé di’ak atu servi ema sira ne’ebé ki’ak liu no mukit.

Reprezentate familia hosi Same ho Baguia, Francisco Maria de Vasconselhos lori alin, maun Taur Matan Ruak ho nia oan na’in tolu, hato’o agradesimentu ba ema hotu-hotu.

“Ha’u hodi ami nia alin, maun Taur Matan Ruak ho oan na’in tolu hakarak hato’o agradesimentu ba ita bo’ot sira hotu. Ita boot sira nia apoiu iha fulan hirak nia laran, durante saudoza nia moras to’o nia mate,” Francisco Maria de Vasconcelhos agradese.

Eis xefe Casa Civil ne’e hatutan, família laiha buat ida, maibé reza ba Nai Maromak atu bele rekompensa buat ne’ebé ema hotu-hotu kontribui ba família Taur Matan Ruak nian.

Ba doutór sira iha HNGV ne’ebé la sente kolen, loron no kalan kualkér momentu ne’ebé sira sempre prontu halo atendimentu ba bin, feton, oan, alin to’o nia iis kotu. Ba Forsa Defeza Timor Leste, PNTL ne’ebé fó atensaun tebes-tebes durante loron hirak nia laran.

Jornalista: Vito Salvadór