Hatutan.com, (21 Juñu 2023), Díli—Polísia Nasionál Timor-Leste (PNTL), liuhosi Komandu Munisípiu Díli, rejísta ema na’in-12 mate, durante kazu asidente tráfegu ne’ebé mak mosu iha kapitál Díli.

Komandante PNTL Munisipiu Díli, Superintendente Xefe Polísia Natércia Eufrásia Soares Martins informa, hahú hosi fulan-janeiru mai to’o 20 Juñu 2023, rejísta kazu asidente tráfegu hamutuk 452.

Lee Mós: Asidente Tráfegu Rezulta Timoroan 28 Lakon Vida

“Asidente sira ne’e invole hosi motór ho karreta soke-malu, motór ho motór, kareta ho kareta, kareta soke ema, ninia kontribui bá iha gráfiku ne’e maka ita rejísta 452. Hosi ne’e ema iha ema ne’in 12 mak mate. Kanek kamán iha 80, kanek todan iha 487 no sira ne’ebé la kanek iha 90,” Komandante Natércia Soares informa liuhosi konferénsia imprénsa iha kna’ar fatin Komandu Caicoli, Kuarta (21/06/2023).

Hosi asidente sira ne’e rezulta estragu bá ira-nia propriedade mak hanesan kareta ka motór, ida todan liu, komandu Dili rejísta hamutuk 57. Estragu kaman iha 639.

Hosi totál kazu asidente 452 ne’e, ninia prosesu kazu 12 mak Polísia aprezenta ona bá iha Ministéiru Públiku (MP), hodi hein ninia prosesu kontinuasaun.

Kazu sira ne’ebé oras-ne’e Polísia prosesa hela hamutuk 83 no iha totál 367 mak parte sira hakarak halo akordu hodi rezolve tuir família.

Viatura Estadu

Hosi totál kazu asidente sira ne’e, involve mós viatura sira Estadu nian ka kareta Estadu nian hamutuk 29, kompostu hosi kareta 20 no motorizada governu nian iha 9.

“Hosi asidentes sira ne’ebé mak akontese, envolve viaturas estadu ninian, liu-liu kareta hamutuk 20, hosi kareta governu, motorizadas hamutuk 9, motorizadas governu ninian, no kareta diplomátiku haat (4), ne’ebé involve iha asidente,” nia esplika.

Asidente tráfegu hirak ne’e, Polísia rejísta kareta hamutuk 304 mak hetan estragu no motór iha 453. Alende ne’e, bisikleta involve hosi asidente ho kareta iha 304, motór iha 353, involve bisikleta iha 3 no soke ema la’o ain hamutuk 94.

Fatór sira ne’ebé kauza bá asidente sira ne’e identifika katak, ida fatór ema. Tanba dala-barak motorista balun lakohi fó prioridade bá sira seluk, hadau-malu dalan, nia soke ema seluk, soke ema la’o ain, no ne’e mai hosi fatór ema.

La’ós ne’e de’it, iha mós fatór ema ho kondisaun lanu, sira halai ho velosidade aas, tanba ne’e maka, hamosu asidente. Maibé, polísia mós haree fila-fali bá iha ninia fatór sira ne’e, iha mós balu mak identifika katak, tanba kondisaun estrada.

“Estrada ku’ak, nia halai maka’as, trava la biban, prontu, bá kona tán kareta ida seluk. Fatór seluk mós, tanba  kondisaun viatura sira ne’e rasik,” nia dehan tan.

Tanba ida ne’e maka presiza atensaun mós bá iha públiku, sira ne’ebé lori viatura, atu bele haree dadus sira ne’e, importante para atu nunee bele salva, mai oin, bele redús númeru asidente ne’ebé maka iha.

Atu redús no evita asidente sira ne’e, PNTL halo ona planu oinsá mak atu hasa’e konsiénsia sidadaun sira nian, liu-liu motorista sira atu komprende Lei, regra ne’ebé maka vigór iha Timor-Leste nune’e bele la’o tuir regra ne’ebé iha, hodi hamenus asidente sira.

Koimas

Komandante Natércia hakarak mós atu aprezenta kona-bá koimas ne’ebé sira rekolla hosi infratór sira, tanba ida ne’e mós, dala-ruma mosu preokupasaun hosi ema barak, ligadu infrasaun ne’ebé maka motorista sira halo no polísia prosesa, liu-liu kondena sira ho selu multa bá Estadu ho montante ida ne’ebé mak aas.

“Ami hakarak atu aprezenta bá públiku katak, ho totál infrasaun viaturas, motorizadas ne’ebé maka mosu, ita rejista hahú jeneiru mai to’o data ida ne’e, ita hatama osan ka koima bá Estadu hamutuk $166.922,” Natércia informa.

Koimas hirak ne’ebé sei iha prosesu no ema ka infratór sira seidauk bá halo pagamentu bá multa ho totál $36.347.

Komandu Rejísta Kríme 605

Komandu Munisipiu Dili mós iha dadus hahú hosi fulan-janeiru mai to’o 20 juñu 2023 ne’e, rejísta totál krime hamutuk 605. Hosi númeru kazu sira ne’e barak liu krime ho tipu Ofensa Integridade Fízika.

“Hahú hosi janeiru, ate a data, ita rejísta kazu krime hamutuk 605. Iha númeru 605 ne’e, tipu kazu ne’ebé mak aas liu ne’e maka, ida, Ofensas Integridade Fízika, rua, Maus Tratus ka problema violénsia doméstika, depois Ameasa no Dano,” Superintendente Xefe Polisia Natércia Eufrásia Soares Martins, hateten.

Ligasaun ho totál kazu krime ne’ebé akontese, maioria mak sira submete hotu ona bá iha Ministériu Públiku (MP).

Maibé, kazu ne’ebé maka númeru la aas, hanesan ema barak akompaña, krime omesídiu sira ne’ebé mosu durante janeiru mai to’o agora, só úniku krime ida akontese iha Elemloi, maka polísia seidauk hetan ninia arguidu.

“Tanba kazu refere hetan delegasaun kompeténsias, monu bá iha PCIC. Ne’ebé, ita labele relata ida ne’e. atu hatene kona-bá ida ne’e, ita-boot sira liga bá iha PCIC, atu hatene ninia progresu, hosi ninia prosesu,” nia hateten.

Kazu krime omesídiu sira ne’ebé mak Polísia kaer, hotu-hotu, ninia autór prinsipál ne’e bá hotu ona iha prizaun. Balun prizaun preventiva, hodi hein desizaun ikus liu hosi Tribunál.

Bá kazu sira seluk nian maka, polísia sei iha barak, sei hein delegasaun kompeténsia no kazu sira balun hanesan Dano Simplés ne’e, autór balun tama ona iha prizaun preventiva.

Jornalista: Rogério Pereira Cárceres