Hatutan.com, (24 Juñu 2023), Díli—Prezidente Repúblika (PR), José Ramos-Horta ohin hala’o vizita Estadu ba Berlin, Repúblika Federal Alemaña hodi ko’alia kona-bá situasaun globál inklui hametin kooperasaun Timor-Leste ho Alemaña no esplora oportunidade sira hodi lori indústria mai Timor-Leste.

Vizita Estadu ba Alemaña, Prezidente Repúblika  José Ramos-Horta alem de buka oportunidade hodi lori indústria Alemaña mai investe iha Timor-Leste, sei buka mós oportunidade atu oinsa haruka traballadór Timoroan sira ba servisu iha Alemaña.

“Preszidente Repúblika ohin hala’o vizita ofisiál ida ba Berlin, Repúblika Federal Alemaña, hosi loron 25 to’o 26 fulan juñu, tinan ida ne’e. Vizita ida ne’e tanba hetan konvite ne’ebé hato’o hosi Prezidente Alemaña, Frank -Walter Steinmeier, iha inísiu tinan 2023,” Hatutan.com sita komunikadu Sábadu, (24/06/2023).

Iha Berlim, Prezidente Repúblika, José Ramos-Horta sei hala’o enkontru bilateral ho ninia omólogu Alemaun ho mós Chanceler Olaf Scholz, Xefe Governu Alemaña nian.

Iha enkontru bilateral rua ne’e, líder sira sei ko’alia kona-ba situasaun prinsipál sira ne’ebé akontese iha nível globál no rejionál, nune’e mós Prezidente, José Ramos-Horta sei atualiza ba Prezidente Frank – Walter Steinmeier no Chanceler Olaf Scholz situasaun Timor-Leste nian, liu-liu kona-bá hafoun hikas proposta kooperasaun entre rai rua ne’e. 

“Alemaña nu’udár ekonomia boot liu iha Europa, importante tebes atu Timor-Leste sai nu’udar rai ida ne’ebé prioriedade liu ba nia. Daudaun ne’e, Alemaña ho Timor-Leste iha hela komunikasaun namanas atu reformula kooperasaun alemanha liga ho envíu ka haruka traballador timoroan sira ba servisu iha Alemaña,” sita iha komunikadu.

Adezaun Timor-Leste nian ba ASEAN, ne’ebé posibilita asesu ba merkadu ida ho ema hamutuk 700 milloens, sei loke oportunidade ideal ba indústria alemanha atu estabelese iha Timor-Leste, iha área espesializada sira. 

Prezidente Repúblika iha vizita ho durasaun menus hosi oras 48 iha Berlim, sei akompaña hosi Embaixador Timor-Leste nian ba Uniaun Europeia no mós Kónsul Jeral Honoráriu Timor-Leste nian iha Berlin.

Viajen ne’ebé hala’o ba Kontinente Europeiu, iha ajenda atu inkui mós partisipasaun Prezidente Repúblika nian iha Cimeíra “New Global Finance” konvite hosi Prezidente Frances, Emmanuel Macron, entre loron 21 to’o 23, fulan juñu, maibé, partisipasaun refere kansela hikas tamba koinsidénsia ho falesimentu Dra. Isabel Ferreia, espoza hosi Primeiru Ministru Taur Matan Ruak.

Ho vizita ida-ne’e, Prezidente José, Ramos-Horta reafirma ninia empeñu kona-bá dezenvolvimentu no fortalesimentu kontínua ba lasus kooperasaun entre rai rua ne’e iha futuru.

Tuir ajenda, Prezidente Repúblika sei fila hikas mai Dili prevista iha loron 28 fulan juñu tinan 2023.

Jornalista: Vito Salvadór