Hatutan.com, (10 Jullu 2023), Díli–Prezidente Repúblika (PR), José Ramos-Horta, konkorda ho polítika IX Governu Konstitusionál atu reforma instituisaun Polícia Científica Investigação Criminal (PCIC).
Lee Mós : Governu Halo Duni Reforma Iha PCIC
![](https://www.hatutan.com/wp-content/uploads/2023/07/PCIC-300x183.jpeg)
PR Ramos-Horta vizita PCIC, Segunda (10/07/2023). Foto/Elio dos Santos da Costa
Iha diskursu tomada de posse bá Primeiru-Ministru, Kay Rala Xanana Gusmão, ho membru IX Governu Konstitusionál iha Palásiu Prezidensiál Nicolau Lobato, Sabadu, 01 Jullu 2023, Xanana énfaze reforma instituisaun polisiál PCIC tanba tuir Xanana katak PCIC la hatudu liu integridade no profisionalizmu.
Iha Segunda (10/07/2023), Prezidente Repúblika José Ramos-Horta hala’o vizita direita bá edifísiu PCIC hodi haree besik liután instalasaun aparellu no servisu sira PCIC nian, halo mos observasaun direita no iha mós reuniaun ho Ministru Justisa no lideransa sira instituisaun PCIC nian.
Prezidente Repúblika José Ramos-Horta hateten, ne’e hanesan vizita informasaun atu simu informasaun breve hosi Ministru Justisa, Diretór Jerál PCIC kona-ba atividade ne’ebé PCIC halo no progresu ne’ebé hahú tempu kleur ona.
PCIC nu’udár instituisaun ida ne’ebé importante agora ne’e Timor-Leste tama ASEAN, ezijensia dook hosi rai sira seluk ASEAN luta kontra krime organizadu, brakamentu kapitál ho droga preokupasaun bo’ot Timor-Leste nia adezaun bá ASEAN.
Ramos-Horta fó parabéns bá PCIC, tinan sira nia laran ne’e progressu maka’as, di’ak intermu organizasaun, infrastrutura, falta balun karik, maibé nei-neik iha tinan sira ne’e nia laran. Importante liu formasaun umanu.
“Atu halo reestrutura ba PCIC ne’e kompeténsia Governu nian, halo reestrutura ka reorganizasaun ne’e sempre kualkér organizasaun bele halo atu moderniza sai forsa liután bele preparadu liután halo servisu ho kompeténsia, integridade, ho imparsialidade,” Ramos-Horta hateten.
![](https://www.hatutan.com/wp-content/uploads/2023/07/Horta-PCIC-300x168.jpeg)
PR Ramos-Horta vizita PCIC, Segunda (10/07/2023). Foto/Elio dos Santos da Costa
Xefe estadu hatutan ema hotu-hotu sempre buka hadia organizasaun, sira hotu-hotu buka halo reforma, atu bele resposta di’ak liubá realidade ameasa ne’ebé iha époka ruma presiza, se governu liu husi Ministériu Justisa tutela PCIC no okos hanoin atu halo re-estruturasaun, re-organizasaun tanbasá mak labele ne’e normál.
Kona-bá ekipamentu servisu PCIC nian Xefe Estadu hateten di’ak ona, maibé sei presiza atu kompleta hodi fasilita diak liután servisu PCIC nian.
Iha fatin hanesan Ministru Justisa, Amândio de Sá Benevides hateten, Governu sempre avansa ho programa ne’ebé mak agora Governu prepara hela, depois sei bá defende iha Parlamentu Nasionál.
“Ita bo’ot sira rona katak Xefe Governu koalia kona-bá reestruturasaun PCIC no hanesan membru Governu tenke halo tuir nia xefe ko’alia,” Ministru Justisa Amândio de Sá Benevides afirma.
Jornalista: Vito Salvadór