Connect with us
Pakote Ahi

Defeza & Seguransa

PNTL Deskobre Rede Tráfiku Umanu Ne’ebé Rekruta Timoroan Bá Servisu Iha Malázia

Published

on

Hatutan.com, (10 Jullu 2023), Díli—Polísia Nasionál Timor-Leste (PNTL), liuhosi Departamentu Investigasaun Kriminál (DIK) deskobre ona rede sira kona-bá Tráfiku Umanu ne’ebé durante ne’e halo rekrutamentu bá Timoroan sira liuhosi sistema online, ‘bosok’ hodi haruka bá servisu iha nasaun Malázia.

Passaporte maluk Timoroan ida nian, hosi Timoroan na’in-11 ne’ebé tuir rekrutamentu online hodi ba servisu iha Malázia, deportadu no fila hikas mai Timor Leste (TL) iha Kuarta (06/07/2023), tanba la hetan saláriu tuir promesa. Foto/PNTL.

Komandante Departamentu Investigasaun Kriminál (DIK), Superintendente Xefe Polísia, João dos Reis Belo esplika, iha Kuarta (06/07/2023), Timoroan na’in-haat (4) kompostu hosi feto ida no mane na’in-tolu, autoridade Migrasaun Malázia deporta fila mai Timor-Leste tanba deskonfia ‘lohi ka bosok’ hosi ajénsia balun ne’ebé mak na’in bá Timoroan balun iha Timor-Leste.

Lee Mós: Timoroan Na’in-11 Sai tán Vítima Iha Malázia

Vítima sira ne’e mak hanesan, Sérgio dos Santos da Costa hosi Liquiçá, Luísa Soares Sarmento hosi Manatuto, Cesaltino da Silva hosi Viqueque, Domingos de Araújo hosi Aileu ne’ebé oras-ne’e daudaun, PNTL liuhosi DIK hala’o hela prosesu identifikasaun.

Advertisement

“Semana kotuk ita-nia sidadaun na’in-haat fila hosi Malázia no ita foti ona sira na’in-haat nia deklarasaun, ita deteta katak akontese rede tráfiku umanu tanba na’in-haat ne’e rekruta liuhosi online, depois transporta bá liur, liuhosi Indonézia, tama iha Malázia, fó servisu la tuir buat ne’ebé mak sira kontrata,” Komandante João dos Reis Belo hateten liuhosi konferénsia imprénsa iha Kuartél Jerál PNTL, Caicoli, Segunda (10/07/2023).

PNTL deskobre ona mós katak, la’ós vítima na’in-haat ne’e de’it maibé, sei iha tán sira na’in-21 mak fila ona hosi Malázia ho kazu ne’ebé mak hanesan no parese sei barak tán iha Malázia, polisia sei buka-tuir nafatin.

PNTL liuhosi DIK aviza bá Timoroan tomak, liu-liu maluk sira ne’ebé buka hela servisu, atu labele fiar arbiru publikasaun kona-bá rekrutamentu sira liuhosi online ne’ebé bele habosok timoroan sira no ba haterus an iha ema nia rain.

Bainhira iha ema ruma oferese servisu,  di’ak liu buka tuir didi’ak no labele fiar arbiru, tenke konsulta ho parte Governu, liu-liu Sekretária Estadu Formasaun Profisionál no Emprégu (SEFOPE), tanba instituisaun ne’e mak iha liu kompeténsia atu haruka Timoroan sira bá servisu iha estranjeiru.

“Sé lae, ita sai vítima hanesan mós ita-nia maluk lubuk ida ne’ebé mak agora deporta ona hosi Malázia, no sai vítima bá rede tráfiku umanu hosi ema sira ne’ebé mak laiha responsabilidade. Sira ne’ebé mak rekruta ne’e dala-barak hosi Kupan. Ema hosi Kupan mak liuhosi online, oferese servisu bá sira, nú-fim ita konsidera ida ne’e, katak tama ona Rede Tráfiku umanu,” Komandante João Belo aviza.

Advertisement

Hatán kona-bá, oinsá atuasaun PNTL ninian atu kombate rede rekrutamentu ilegál sira iha Díli, komandante João Belo dehan, tanba rekrutamentu ne’e liuhosi online, polisia fó de’it informasaun bá komunidade, liu-liu alin no maun-alin sira ne’ebé mak buka servisu, atu kuidadu, atu labele fiar arbiru rekrutamentu online ne’ebé mak oferese bá sira.

Komandante João Belo konsidera rekrutamentu online sira ne’e dala-barak, parte ajénsia sira la konsege kumpri sira-nia promesa ne’ebé sira hakerek iha online. Ezemplu, sira dehan baihira servisu iha Malázia, sei hetan saláriu mensál ne’ebé boot. Maibé, to’o iha ne’ebá oin seluk no ikus mai halo Timoroan barak sai duni vítima.

“Atu fó servisu ida ne’ebá nu-fim servisu ne’e la realiza. Atu fó saláriu ida ne’e, saláriu ne’e mós laiha. Depois ita-nia maluk sira ne’ebé mak tama Malázia, laiha serteza to’o embaixada ajuda to’o fila-fali mai,” João Belo konta-tuir.

Sá tán, kompañia ka ajénsia sira ne’ebé rekruta la’os iha Timor-Leste, iha de’it rai-liur no sira halo rekrutamentu liuhosi sistema online.

Maibé, parte DIK sei aprezenta bá komandu, oinsá mak bele komunika mós ho parte autoridade sira Repúblika Indonézia (RI) nian, liu-liu Polisia Repúblika Indonézia(POLRI), inklui parte kompetente sira seluk tán hodi bele buka-tuir ema sira ne’ebé mak halo rekrutamentu online.

Advertisement

Komandu rasik hatene ona ema nia naran iha ne’ebá, maibé naran ida-ne’e sempre troka. Depois, sira-nia númeru kontaktu mós sempre troka, entaun difísil atu halo intervensaun iha ema nia nasaun.

Jornalista: Rogério Pereira Cárceres

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

Polísia Kaptura Suspeitu Ida Envolve Kazu Taa Luis Vicente iha Kampu Baru

Published

on

Hatutan.com, (23 Fevereiru 2024), Díli-Polísia Nasionál Timor-Leste (PNTL) halo ona kapturasaun no detensaun bá suspeitu ida ho inisiál JF hosi na’in-rua  ne’ebé kondús motór taa vítima Luis Vicente Tou iha estra Eskola 05 de Maio, Kampu Baru, Comoro, Díli.

(more…)

Kontinua Le'e

Defeza & Seguransa

Deskonfia Fa’an Ilegál Ai-moruk Item Neen iha Farmásia Moris-Foun, Polísia Detein Suspeitu Na’in-tolu

Published

on

Hatutan.com, (22 Fevereiru 2024), Díli—Ekipa konjunta kompostu Polisia Nasionál Timor-Leste (PNTL), Departamentu Investigasaun Kriminál (DIK) Nasionál ho Ministériu Saúde (MS), Diresaun Nasionál bá Farmásia no Medikamentus (DNFM), liuhosi atividade buska no inspesaun, konsege identifika ai-moruk hamutuk item neen (6) mak deskonfia fa’an ilegálmente iha farmásia Moris-Foun, Colmera, Díli.

(more…)

Kontinua Le'e

Defeza & Seguransa

UPF Halo Apreensaun bá Na’an Maran Ilegál, Mákina Ró ho Ró Ne’ebé Transporta Objetu Krime

Published

on

Hatutan.com, (20 Fevereiru 2024), Díli—Unidade Patrullamentu Fronteira (UPF), Domingu  (18/02/2024), hale’u tuku 20:00-liu Otl, iha Batugade, Bobonaro, halo apreensaun bá sasán ilegál sira, hanesan na’an maran ho kuantidade barak, mákina ró  nia velosidade 15 pk no ró ida ne’ebé transporta sasán ilísitu sira .

(more…)

Kontinua Le'e
Advertisement

Trending